Kɔlɔnikɔ Maa-ŋuŋ 23 - Yálá laawoo hɛɓɛ (dc)

Davidə ə Levi lonnii hee kpəlin na kɛ

¹ Davidə pɔlɔɔ kɛa kɛ, gaa kwɛlan gɛnɛ̨, ɓɛlɔwai ə non Salomɔn hee la a heeɓomun Israɛlə nwun na.

² Yili pulu, Davidə ə Israɛlə ɲɛ̨itɔwɔ nuą kəlee təli, ə bɛlɛ ɉaláá laa həli nuą da Levi lonnii diɛ.

³ Levi lonnii di kaa kwɛlan ə kɛ pow haaɓa, da yiiɠaa di wɛi tɛɛ ɉu; ə di kəlee di lonon. Di di lonon tɛitɛi, di kɛ a nu waa pow haaɓa kɔ́w mɛ̨ihaaɓa,

⁴ nuą tii lɔwai, nu waa pow hveelɛ kɔ́w nąąn ɓə di di həɠə, di di tɔɔ Yai-Laa nwɔ pɛlɛ́i tɔɔ mɛ̨nį nwun na. Di nu waa mɛ̨ida həɠə, di kɛ a hɛɓɛ́ kɛ nuą da mɛ̨nį hutɔɔ nuą.

⁵ Di nu waa nąąn ɉəɠə, di di kɛ a bɛlɛ́ laaləi mɛ̨ikaa nuą, di nu waa nąąn ɉəɠə ɉu, diɛ Yai-Laa mąątɛ̨nɛ̨ a hvɛli kɛ hɛnŋąą, diɛi ɲą́ą́ Davidə, ŋį́ pɛli a mąątɛ̨nɛ̨ kɛ hɛn.

⁶ Davidə ə di hee kpəlin na kɛ a kpulu, lɔ yɛ bələi Levi lonnii di kɛ la: Gɛrsɔn, Kehatə da Merari.

⁷ Yii ɓaa Gɛrsɔn lonnii di wɛi, diɛ ɓaa: Laedan da Simei.

⁸ Laedan lonnii: Yehiɛlə, ɓə kɛ a di nwun nąmu, Ɉetamə da Yoɛlə; di kɛ a nu haaɓa.

⁹ Simei lonnii: Selomitə, Haziɛlə da Haran; di kɛ a nu haaɓa. Diɛ ɓə kɛ a Laeda pɛlɛ́i mu a pɛlɛ́ nąmįną haaɓa.

¹⁰ Simei ə lon ɉinąą nąąn dakpɛli hɔlɔɓo, diɛ ɓaa: Yahatə, Ɉiza, Yeusə da Beria.

¹¹ Yahatə ɓə kɛ a dɔlɔɔ, Ɉiza ə ɓo a veelɛnąą. Kɛlaa, Yeusə da Beria di hvo lon damąą kaa, di pɛlɛ di kee ɓa, di kɛ a pɛlɛ tɔ̨nɔ̨, di mąą mɛ̨nį ə ɓo gee ɓa.

¹² Kehatə lonnii ɓaa: Amramə, Yiseharə, Hebrɔn da Uziɛlə; diɛ ka tii a nu nąąn.

¹³ Amramə lonnii ɓaa: Aarɔn da Moisə. Di Aarɔn həɠə ɉu a dee, yɛ kólo kɛ gɛɛnąą mąąhəɠɛɛ ɓa a yələ kəlee, yaa da nonnii, diɛ haláá hɛn gun nɛ̨ɛ̨ laa həli Yai-Laa ɓa; diɛ tí mą, ə lɛɛ, diɛ luwɔ too naa hu a yələ kəlee.

¹⁴ Moisə ə kɛ a Yálá liiɓamun, nonnii da Levi huwu di tɔɔi ə kɛ tanɔ̨n.

¹⁵ Moisə lonnii ɓaa: Gɛrsɔmə da Eliezɛrə.

¹⁶ Gɛrsɔmə lon Sevuɛlə ə kɛ a tɔɔmun.

¹⁷ Eliezɛrə lon Rehavia ə kɛ a tɔɔmun. Eliezɛrə hvo lon dakpɛli hɔlɔɓo; kɛlaa, Rehavia ə lon damąą kaa.

¹⁸ Yiseharə lon Selomitə ə kɛ a tɔɔmun.

¹⁹ Hebrɔn lonnii, Yeriyahu ɓə a dɔlɔɔ, Amaria ə ɓo a veelɛnąą, Yahaziɛlə ə ɓo a ɉaaɓanąą, ə lɛɛ, Yekameamə ə ɓo a nąąnnąą.

²⁰ Uziɛlə lon Mika ɓə a dɔlɔɔ, ə lɛɛ, Yisiya ə ɓo a veelɛnąą.

²¹ Merari lonnii: Mali da Musi. Mehi lonnii: Eleazarə da Kisə.

²² Eleazarə ə haa, hvo lon ɉulɔnu hɔlɔɓo; kɛlaa lon nɛ̨ąą lɔ ɓə ə ɉɔlɔɓo. Eleazarə kaayɔwɔ Kisə lonnii di nonnii nɛ̨ąą tii həɠə a di nɛ̨ąni.

²³ Musi lonnii ɓaa: Mali, Edɛrə da Yeremotə, diɛ ka tii a nu haaɓa.

²⁴ Bələ ɓə Levi huwu ə kɛ la, da bɛlɛ́ɠaa laa; da bɛlɛ nąmįną laa, yɛ bələi di di lonon na tɛitɛi. Diɛi tii ɓə di yee ə kɛ Yai-Laa nwɔ pɛlɛ́i mu tíɓoɠaa diɛ, ə həɠə di kaa kwɛlan a kɛ pow hveelɛ ɓa, da ə laa mɛ̨i.

²⁵ Davidə ə gbɛa mo yɛ kɛ diɛ: «Yai-Laa Israɛlə nwɔ Yálái aa liilaa yɛnɛ̨ɛ̨ tɛɛ ŋą nuąi pɔ, daa hee Ɉerusalɛmə a yələ kəlee mɛ̨nį.

²⁶ Yili a li a kɛ tii, Levi lonnii di hvo kɛa pai kɛi Yai-Laa nwɔ pɛlɛ́ lon gbəŋəi diɛ hiɛ la da bɔ hɛnŋąą.»

²⁷ Kɛlaa, yɛ bələi Davidə ə mo la, bələ ɓə Levi lonnii lonon ŋąą ə kɛ la, ə həɠə kwɛlan bow hveelɛ ɓa, yɛ li la tɔwɔ pələ.

²⁸ Diɛi tii, mąąnɛ̨ɛ̨ kɛ di kɛ Aarɔn lonnii yee mu, diɛ di tí Yai-Laa nwɔ pɛlɛ́i mu; yii hvilɛn na gwəli hąąiɠaa diɛ, bɛlɛ́ɠaa mu, ɉɛnŋąą naakwɛlanmoɔ, da Yálá nwɔ pɛlɛ́i mu kólo.

²⁹ Diɛ ɓə Yálá kɔ́ lɛɠɛ mɔ̨n mɛ̨nį kaa diɛ, Yálá kɔ́ lɛɠɛ hunwɔ̨, da nwɔ̨míi dɛ hɛn və ɉu, da nwɔ̨ míi huwu lɔpee. Diɛ ɓə kɛ ɉɛnŋąą kɔ́ɔn mɛ̨nį nwun na.

³⁰ Gɔ̨nɔ̨nŋąą tii mąąnɛ̨ɛ̨ kɛ ə kɛ laani Yai-Laa lííla yələwulii da yələwala, naa mąą yɛ wiɛ la.

³¹ Ɓɛlɔwai lɔpee di kɛi Yai-Laa kɔ́ la a tuwɔ́ lɔwɔ yələ, a ɲąnįn nwɔ hvóló dɔlɔɔ, awala kɛ tii a hɛli yələ ta, da gɛ a haláá hɛn da gəlee kələn, yɛ bələi ɉaláá hɛn nonon ŋąą kaa la a yələ kəlee, diɛ gɛ tii Yai-Laa lííla.

³² Diɛ ɓəgee kaa kələ mąą mɛ̨nį hɛlɛn ŋąą kɛ diɛ, diɛ ɲɛ̨i kulɔ, ə pɛlɛ la di kaayɔwɔɠaai kɛ a Aarɔn lonnii da kólo kɛ Yai-Laa nwɔ pɛlɛ́i mu, di mąą mɛ̨nį, da ɉɛnŋąąi naakwɛlanmoɔ Yálá ɓa.