Kɔlɔnikɔ Maa-ŋuŋ 22 - Yálá laawoo hɛɓɛ (dc)1 Yili ɓə gɛ, Davidə yɛ kɛ diɛ: «Ɓɛ ɓə Yai-Laa Heeɓo kəlee Nąmu Yálá nwɔ pɛlɛ́i kaa laa, ə lɛɛ; ɓɛi Israɛlə nuą da haláá kulɔ laa!» Yálá nwɔ pɛlɛ́i tɔɔ mɛ̨nį 2 Davidə ə mo nwɛ̨ąąi kpɔ kɛ Israɛlə lɔi hu, di gəlee ɲąąkpɔn, ə lɛɛ, ə kwɛni kulɔ nuą kulɔ, diɛ pɛli kwɛni haɠai, əgɛ, di pa Yálá nwɔ pɛlɛ́i tɔɔ la. 3 Davidə ə kwɛli tiɛ̨ geemɛ̨i, yii di kaa pai gɛi a bɛlɛ́ kpon gbanwo hɛn, da ɲili hɛn. Ə kwɛli kpɔlu kwɛli kpɔ kɛnɛ̨, yii di hva pɛli kɛ gɔɔn ɉii. 4 Ə kpitili wulu tiɛ̨ geemɛ̨i, lonon və kɛ mą, mąąhɔlɔɓo, Sidɔn nuą, da Siri nuą di pa kpɔ a kpitili wulu kpɔ kɛnɛ̨. 5 Davidə ə kɛi giliŋąhiɛ, yɛ kɛ: «Nón Salomɔn kaa nii a hulɔnon, ə lɛɛ, kɔ́lɔ hvo mą; yaan, bɛlɛ́i mąąnɛ̨ɛ̨ ə tɔɔ Yai-Laa ɓa, mąąnɛ̨ɛ̨ ə kɛ a gɛnɛ̨ɛ̨, mąąwia, lɔi kəlee ɲɛ̨i ɓa. Gáá mɛ̨nįɠaa kəlee pɛlii ɲəi.» Bələ ɓə Davidə ə gɛ la, ə mɛ̨nį tamąą pɛli gɛɛ hvo kɛ pai haai. Davidə ə kólo laa Salomɔn ɓa 6 Davidə ə non Salomɔn təli, ə Yai-Laa Israɛlə nwɔ Yálái nwɔ pɛlɛ́i tɔɔ mɛ̨nį gbɔw laa nwuɔ̨. 7 Davidə yɛ non Salomɔn ɓa: «Nón! Yii kpɔ gɛ lii ə kɛ gwə́i, ya ɓaa, ŋį́ pɛlɛ́ tɔɔ, ə kɛ a Yai-Laa nwɔ́ Yálái laa. 8 Kɛlaa, Yai-Laa ə mo ŋɛ̨i mą́ą́, yɛ mą́ą́: ‹Yáá nu ɲąmą tamąą pu, ɛlɛɛ, yáá kɔ́ kpɛa-kpɛaa kɔ́, hva pɛli pɛlɛ tɔɔi, ə kɛ a náá. Mąąhɔlɔɓo, yáá nu ɲąmą tamąą pu nɔi ɓa nííla. 9 Yii yáá lon ɉulɔnu kaai, yaa ɓə pai liilaa lɔi nɔi, gáá pai liilaa lɔi da gwɛlɛ lɔiɠaa di lɔwai. Naa ɓaa pai kɛi a Salomɔn. Yaa tii nwɔ hvólói hu ɓə Israɛlə kaa pai liilaa hɔlɔɓoi la. 10 Yaa tii ɓə pai pɛlɛ tɔɔi ə kɛ a náá. Gaa pai kɛi a nón, gɛ́ ɓo a nąn. Gáá pai nwɔ heeɓo laa heei kpílin, ŋą nwɔ tɔɔlaa hu nɛ̨ɛ̨ Israɛlə nuą kəlee diɛ a yələ kəlee mɛ̨nį…› 11 «Nón! Yii hu kɛa, gɛ́, Yai-Laa ə kɛ ə́ pɔ, əgɛ, ə́ yee ə lɔ Yai-Laa ə́ wɔɔ Yálái nwɔ pɛlɛ́i tɔɔ mɛ̨nį ɓa, yɛ bələi ə mo la ə́ laa mɛ̨i! 12 Gɛ́! Yai-Laa ə mɛ̨nį hukpɛ kili tɛɛ ə́ pɔ, ə bɛlɛ nwun gɛ ɉu laa ɓa, ɓɛlɔwai gaa pai ə́ heei la Israɛlə nwun na; əgɛ, ə́ Yai-Laa ə́ wɔɔ Yálái nwɔ tɔ́n naahɔnmo! 13 Akɛ, dɔ́n bɔ liɛwooɠaa, da mąą pamą wooɠaai Yai-Laa ə dɛɛ Moisə pɔ Israɛlə mąą mɛ̨nį ɓa, yá bɔ mɛ̨nįɠaa kɛ, nąąlɔwai, ə́ yee kɔ́nwɔ̨n ɉu a ɓɛlɛ, ə́ yee ə lɔ ə́ kɛ mɛ̨nįɠaa diɛ. 'Ə́ liikpələ, ə́ ə́ hvaŋąlɔ, hvó ɲɔw hɛn nɔpee ta ɓa, ə́ mąą hvó kpɛlin. 14 «Ə́ ɲɛ̨i hee, bələi mąn hɛn və la ɲə́i, ŋą́ą́ tɔɔ a nwąnąi, ŋą́ą́ Yai-Laa nwɔ pɛlɛ́i tɔɔ hɛnŋąą kwɛli, ŋą́ą́ hɛni waa nwundɔ̨nɔ̨ laaikɛ, da wali kwɛli waa nwun damąą. Yii ɓaa mala kwɛli da gwɛli kpɔɔkpɔ, nu hva pɛli giliin ɉii, damą pələ ɓa. Ŋą́ą́ nwɔ̨nɔ̨ wulu kwɛli, da kwɛni, yɛ́ kpįnįi da kwɛli ə bɛlɛ mą nwɔ̨nɔ̨. 15 Kólo kɛ nuą kaa ə́ yəi a gbulu kɛnɛ̨. Kwɛni haɠa nuą yɛlɛɛɠaa di ɓo ə́ yəi, da wulu haɠa nuą, ə mą kɛ, yɛlɛ huwui lɔpee gəlee kɛ nuą. 16 Yii ɓaa, hɛni, wali kwɛli, ɓala kwɛli da kwɛli kpɔɔkpɔ, nu hva pɛli nonon ɉii. 'Ə́ muhəɠə, ə́ ə́ kɛ kólo kɛ; Gɛ́, Yai-Laa ə kɛ ə́ pɔ!» 17 Davidə ə mo Israɛlə nwun nąmįną kəlee diɛ, di kpɔnmąą tɛɛ non Salomɔn pɔ. Yɛ diɛ: 18 «Kɛlɛi Yai-Laa ka wɔɔ Yálái kaa ka pɔ-é! Kɛlɛi ya ɓə hvįitɔɔ tɛɛ ka pɔ, ka ká kwɛlɛ lɔiɠaa ka lɔwai-é! Nɔiɠaa tii ka háákələi daa kɛ a Yai-Laa nwɔɔ, da nwɔ nu huwuɠaai. 19 Akɛtii kani, ka ká kili, da ka wɔɔ yɛnɛ̨ɛ̨ kɛ a Yai-Laa ka wɔɔ Yálái kwɛliɛ. 'Ka ká muhəɠə, ka Yai-Laa Heeɓo kəlee Nąmu nwɔ pɛlɛ́i tɔɔ, əgɛ, ka pa a Yai-Laa nwɔ mįnɛ̨ Kəhii, ka ɉee mu, da Yálá kɔ́ hɛn ɲąŋąɠaa, ka ɉee nwɔɔ pɛlɛ́i mu, yaai ka dɔɔ Yai-Laa laa ɓa.» |