Kɔlɔnikɔ Maa-ŋuŋ 20 - Yálá laawoo hɛɓɛ (dc)

Davidə ə Raba taa hon a kɔ́

¹ Gwɛlan gɔwɔ tɔɔi lɔwai, ɓɛlɔwai tɔɔɓɛlaa di kɛi li la kɔ́ ɓa, Davidə ə Ɉoabə tɔɔ, da ɲee pɔ nuą kəlee, ə mą kɛ Israɛlə kɔ́kuláá kəlee. Di Amɔn lonnii tamąą paa, yili pulu di kɔlaɠa pɛlɛ Raba taa kwɛlɛ. Davidə nwɛi, hvo li, ə lɛɛ Ɉerusalɛmə daai.

² Dɔɔ ɓɔlɔi tii kɛ Milkomə nwuɔ̨, Davidə ə ɉəɠə, nwiɛ yee ə ɓo a kilə pow haaɓa, Kúwɔ́-kwɛni ə ɓo ɉu. Di ɉee Davidə nwuɔ̨, ə həɠə daa tii hu a kɔ́ hon gɛnɛ̨.

³ Yii ɓaa daa nuą di wɛi, ə di hon a kɔluwɔɠaa; ə daɠaa tɔɔ wulu haɠa koló ɓa, daɠaa di ɓo a kwɛni haɠa nuą da kwɛi kwɛli nuą. Bələ ɓə Davidə ə Amɔn lonnii di wɔɔ taaɠaa kəlee hon na. Yili pulu, Davidə da Israɛlə nuą di pənə di pa Ɉerusalɛmə daai.

Di kɔ́ pɛlɛ Filisti nuą diɛ

⁴ Yili pulu, di kɔ́ pɛlɛ Filisti nuą diɛ Gɛzɛrə. Nąąlɔwai ɓə Husa mun Sibekai ə Sipai hon na a kɔ́, yai kɛ a Refaitə lon da. Filisti nuą di lɛɛ Israɛlə yee mu.

⁵ Di pənə nwɔ̨nɔ̨ di kɔ́ takpɛli pɛlɛ Filisti nuą diɛ, Yairə lon Ɛlhanan ə Lami hon a kɔ́, ɉulɔnui tii ə kɛ a Gatə mun Goliatə gaayɔwɔ ta. Lami nwɔ kpalai ə kɛ yɛ nįnįgban.

⁶ Kɔ takpɛli ə bənə nwɔ̨nɔ̨ ə muhəɠə Gatə. Nu kwɛa ta ə kɛ laa, di yowoɠaa pɔ, ɲeekpiɛɠaa da gɔɠɔkpiɛɠaa da ɓo mɛ̨ida mɛ̨ida; ɲeekpiɛɠaa pɛlɛɛ gɔɠɔkpiɛɠaa diɛ ə kɛ pow hveelɛ kɔ́w nąąn. Yaa kpɛli ə kɛ a Harafa huwu ta.

⁷ Ɉulɔnui tii ə Israɛlə nuą paapɔlɔn dɔɔ; ya ɓə Davidə niɛ Simea lon Yohanatan ə ɉulɔnui tii paa.

⁸ Nu huwui tii di kɛ a Harafa lonnii Gatə daai, Davidə da ɲee pɔ nuą di di paa.