Kɔlɔnikɔ Maa-ŋuŋ 19 - Yálá laawoo hɛɓɛ (dc)

Amɔn nuą di Davidə nwɔ kɛlaɠaa ɓɛlɛ kpɛɛ diɛ

¹ Mɛ̨nįɠaa tii tɛɛ pulu, Nahasə Amɔn tɔɔmun, ə haa. Non ə hee a mąąhvalin.

² Ya ɓə Davidə a kɛ diɛ: «Hvo kɛli ŋą́ Nahasə lon Hanun hon a wɛlikɛmąąlaa, nąn nwɔ wɛlikɛmąąlaa mąą mɛ̨nį ɓa.» Davidə ə nuą tɔɔ Hanun pɔ, diɛ li gbəlaɓoi nąn ɉaa mɛ̨nį hu. Davidə nwɔ nuąi də li, di həli Amɔn nuą di wɔ lɔi hu, əgɛ, di gbəlaɓo.

³ Kɛlaa, Amɔn kalanɉonŋaa di mo di wɔ tɔɔmun Hanun ɓa, diɛ mą: «Gaa ə́ kwəi yɛ́ ə́ nąn mąąwiɛ mɛ̨nį ɓə Davidə ə nwɔ nuąi tɔɔ la? Hvó gɔlɔn yɛ́ kɛ di pa nɛ̨lɛ̨ɛ̨n naa kɛi? Ə́ gɛ yələ ta di pa ə́ kulɔ dɔɔ kpəlin ɉu di ə́ too? Yili mąą mɛ̨nį ɓə Davidə ə nwɔ nuąi ŋɛ̨i tɔɔ la!»

⁴ Hanun ə Davidə nwɔ nuąi hon, ə di kpɛlɛ bələ tɔ̨nɔ̨ kalaan, ə di mąąhəɠəɠaa mąą tee kpɔ, ə gbɛla di wulɔn mu, ə ɓo diɛ di li.

⁵ Di mɛ̨nįi tii hukulɔ Davidə ɓa, ə nuą tɔɔ diɛ li nwɔ wɛlɛɛɓo nuą laakwiɛn ɉii, mąąhɔlɔɓo, yiliɠaai di nwumɛ̨ kpɔ kɛnɛ̨. Tɔɔmun ə mo yɛ diɛ: «Ka lɛɛ Ɉeriko daai, ka kpɛlɛɠaa di tɛ, yili pulu kaa kɛa pa.»

Amɔn nuą da Siri nuą di lɔwai kɔ́

⁶ Yii kɛa Hanun da Amɔn nuą di gaa diɛ, daa túwɔ́ pələ ɲɔ̨n gulɔ a Davidə, di wali kwələ waa tɔ̨nɔ̨ tɛɛ, diɛ li kɔ-kɔ wotoloɠaa da hoo mɛ̨i nuą həɠəi la, Aramə nuą pɔɔli, ɲalee hveelɛi kwɛlɛ da Aramə nuąi kɛ Maaka da Sova.

⁷ Di paa kɔ-kɔ wotolo waa pow haaɓa gɔw hveelɛ, ə lɛɛ, Maaka tɔɔmun da nwɔ nuą di pa, di gɔ́ ɓuwu pɛlɛ Madaba tənən ma, Amɔn lonnii di kulɔ di wɔ taaɠaa hu, di di ɲąąkpɔn, diɛ pa gɔ́ ɓa.

⁸ Davidə ə bələ mɛ̨n, ə Ɉoabə tɔɔ da gɔ́kuláá walawalaɠaa di wɔ kɔlaɠai kəlee.

⁹ Amɔn lonnii di kulɔ di tɔɔ daa kpala, kɛlaa, dɔɔɓɛlaa tii pa, di tɔɔ a di tee gɔ́ kpalan ŋą.

¹⁰ Ɉoabə ə gaa gɔ tínɛ̨nŋąąi mą bələ kəlee, bulu pələ da dɔwɔ pələ, ə nuą həɠə Israɛlə lɔi kɔ́kulááɠaa kəlee lɔwai, a nu walawalaɠaa, ə di tɔɔ Aramə nuą tɔwɔ.

¹¹ Ə nu kpulu kpəli tɛɛ nəɠə Avsai pɔ, di tɔɔ a di yɛli Amɔn lonnii tɔwɔ.

¹² Yɛ nəɠə ɓa: «Aramə nuą yee a kɛ ə tɛɛ mą́ą́, yá pa ə́ kpɔmąą tɛɛ bɔ́. Amɔn nuą yee a kɛ ə tɛɛ yɛ́, ŋą́ pa ŋą́ kpɔmąą tɛɛ ə́ pɔ.

¹³ 'Tɔɔ a ə́ nwąnąi, gu gɛ a kpakololaa gu wɔ lɔi mąą mɛ̨nį ɓa, da gu wɔ Yálái nwɔ taaɠaai mąą mɛ̨nį ɓa. Yai-Laa ə gɛ kani, yɛ bələi niiɓa kaa la!»

¹⁴ Yili pulu, Ɉoabə da nwɔ kɔlaɠai diɛ kɛa li woloi Aramə nuą diɛ, yiliɠaa di pu di tɔwɔ.

¹⁵ Yii kɛa Amɔn lonnii di Aramə nuą kaa diɛ pu, diɛ kpɛli, di pu Avsai tɔwɔ, di tɛ taai. Ɉoabə ə pənə ə pa Ɉerusalɛmə.

¹⁶ Yii kɛa Aramə nuą di gaa diɛ Israɛlə yee a tɛɛ diɛ, di wəlɛɛ tɔɔ Aramə nuą tii kɛ ɲa pulu pələ di pɔ, əgɛ, di Hadadɛzɛrə nwɔ kɔlaɠa təli, nwun nąmu ɓa kɛ a Sofakə, ya ɓə kɛ gɔlaɠa ɲɛ̨i tɔwɔ.

¹⁷ Di pa di mo Davidə ɓa. Davidə ə Israɛlə kəlee ɲąąkpɔn, di Ɉurdɛn teen, di həli diɛ, di tɔɔ Aramə nuą tɔwɔ a kɔ́.

¹⁸ Aramə nuą di pu Israɛlə tɔwɔ, nuąi Davidə ə baa Aramə yəi, nwotolo hu nuą, nu waa mɛ̨ihveelɛ; nuąi kɛ a nɔi ɓa kɔ́ kɔ́ nuą, nu waa pow nąąn. Ə gɔlaɠa nwun nąmu Sofakə paa.

¹⁹ Yii kɛa Hadadɛzɛrə nwɔ tɔɔɓɛlaa di gaa, diɛ Israɛlə yee aa tɛɛ diɛ, di nɛɛ mą, di di nɛ̨ɛ̨ kwɛli Davidə hu, di di lɔwai ponnaa kulɔ, di kɔ́-tɛ́ɛ́ pili Davidə ɓa, di lɔ Israɛlə nuą yeemu. Aramə nuą di kɛi kɛa ɲɔw kpɔmąą tɛɛi Amɔn lonnii pɔ.