Kɔlɔnikɔ Maa-ŋuŋ 18 - Yálá laawoo hɛɓɛ (dc)

Davidə ə gwɛlɛ lɔiɠaa hon a kɔ́

¹ Mɛ̨nįɠaa tii tɛɛ pulu, Davidə ə Filisti nuą hon a kɔ́, ə di nwun nɔ ɲee mu. Ə nɛɛ mą, ə Gatə lɔi pɛlɛɛ ɲee mu lɔiɠaa diɛ kulɔ Filisti nuą yəi.

² Ə pənə nwɔ̨nɔ̨, ə Moabə nuą hon a kɔ́, di lɛɛ ɲee mu, diɛ nįįhɔ̨nwɔ̨ kulɔ mą.

³ Davidə ə pənə ə Hadadɛzɛrə ŋɛ̨i kɛ a Sova tɔɔmun ə ɉon a kɔ́, Hamatə pələ, nąą bələ ɓə Hadadɛzɛrə ə kɛi kɛ ə ŋą tɔɔlaai hee la, Eufratə ɲálee ɓa, di nąą kulɔ ɲəi.

⁴ Davidə ə kɔ́ kɔ́ wotolo waa tɔ̨nɔ̨ həɠə, ɛlɛɛ, ə hoo mɛ̨i nuą nu waa mɛ̨ihveelɛ da nuąi di kɔ́wɔ ŋą diɛ kɔ́ kɔ́, nu waa pow hveelɛ hon a luwɔ. Davidə ə ɉooɠaa kəlee kɔ́wɔ pulu laną tee, nwun dɔ̨nɔ̨ lɔ ɓə ə nɛɛ.

⁵ Aramə nuąi kɛ Damasə, di pa kpɔnmąą tɛɛ Sova tɔɔmun Hadadɛzɛrə pɔ. Kɛlaa Davidə ə nu waa pow hveelɛ kɔ́w hveelɛ paa Aramə nuą lɔwai.

⁶ Davidə ə nɛɛ mą, ə lɔi nwun nąmįną hee Aramə nuą mɛ̨i Damasə. Aramə nuą di lɛɛ Davidə yee mu, diɛ nįįhɔ̨nwɔ̨ kulɔ mą. Ɓɛi lɔpee Davidə ə kɛi li laa, Yai-Laa ə kɛi gɔ́ nɛ̨ɛ̨ mą.

⁷ Nu mąąkɔ̨nwɔ̨ kwɛli hɛnŋaai kɛ Hadadɛzɛrə nwɔ kɔ́kulááɠaa yəi, a hɛni, Davidə ə gəlee həɠə, ə paa la Ɉerusalɛmə daai.

⁸ Ɓala kwɛli kpulu kɛnɛ̨ ɓə Davidə ə ɉəɠə Hadadɛzɛrə yəi Tivhatə daai da Kun daai. Mala kwɛliɠaa tii ɓə Salomɔn ə mala kwɛli gboloyá pɛli la, da bɛlɛ́ dɔɔmuɠaa, bɛlɛɛ mala kwɛli hɛnɲąŋąɠaa diɛ, diɛi kɛ Yálá nwɔ pɛlɛ́i mu.

⁹ Hamatə tɔɔmun Tou, ə bələ mɛ̨n, yɛ kɛ, Davidə aa Sova tɔɔmun Hadadɛzɛrə hon a kɔ́, bɛlɛɛ nwɔ kɔlaɠai ɓa.

¹⁰ Ə nɛɛ mą, ə non Hadoramə tɔɔ tɔɔmun Davidə pɔ, əgɛ, ə Davidə ŋą lúwuɲɛ̨n, gɛ mɛ̨nį ɲee aa tɛɛ Hadadɛzɛrə ɓa a kɔ́. Tou ə gɛ tii, mąąhɔlɔɓo, ɲowo ɓa kɛ a Hadadɛzɛrə. Tou ə Davidə nwɔ lúwuɲɛ̨n ɉɛnŋąą kɛ a hɛnŋaa huwu ɲɛ̨i tamąą, di ɓo a: Hɛni, wali kwɛli, da ɓala kwɛli.

¹¹ Ɉɛnŋąą tii, tɔɔmun Davidə ə di laakwɛlanmo Yai-Laa ɓa; ə bɛlɛ, nwali kwɛliɠaa, da ɉɛniɠaai ə gulɔ nɔiɠaa tii yəi, yɛ bələi Edɔmə, Moabə, Amɔn lonnii, Filisti nuą da Amalɛkə nuą.

¹² Seruya lon Avsai yee ə tɛɛ Edɔmə nuą diɛ gbolo yee koo mu; ə nu waa pow kɔ́w mɛ̨ihaaɓa paa laa.

¹³ Ə lɔi nwun nąmįną hee Edɔmə, di kəlee di lɛɛ Davidə yee mu, a Davidə nwɔ tínuą. Ɓɛi lɔpee Davidə ə kɛi li laa, Yai-Laa ə kɛi kɔ́ nɛ̨ɛ̨ mą.

Davidə nwɔ tɔɔɓɛlaai laa ka

¹⁴ Davidə ə heeɓo laa kɛ Israɛlə kəlee nwun na. Ə kɛi nwɔ nuąi hutɔɔ a tələnmolaa, da kwəi kwələlaa.

¹⁵ Seruya lon Ɉoabə ɓə gɔlaɠa nwun na. Yehosafatə Ahiludə lon yɛ ɓo a tɔɔmun naa woo tɛɛmun.

¹⁶ Ahituvə lon Sadɔkə da Abiatarə lon Abimelɛkə ɓə kɛ a ɉaláá laa həli nuą, ɛlɛɛ Sawsa ə ɓo a ɉɛɓɛ́ kɛmun.

¹⁷ Yehoyada lon Benayahu ɓə kɛi Kereti nuą ɲąąwooɓo da Peleti nuą. Davidə lonnii ɓə kɛ a dɔɔ kwɛlɛ nuą dɔlɔɔ.