Kɔlɔnikɔ Maa-ŋuŋ 17 - Yálá laawoo hɛɓɛ (dc)Natan ə Yálá kwəi mɛ̨nį hukulɔ Davidə ɓa ( Samuɛlə veelɛ 7.1-29 ) 1 Ɓɛlɔwai Davidə ə kɛ kɛa la ɲəi bɛlɛ́n, ya ɓə a kɛ Yálá kwəi mɛ̨nį hukulɔ mun Natan ɓa: «Ɓɛ kaa ləi! Ɲą́ą́ gá pɛlɛ́n, dɔɔ a kpitili wulu, ɛlɛɛ, Yai-Laa nwɔ mįnɛ̨ kəhii ə ɓo kələ mu, mɛ̨i kɛɛ a həɠə. Ə́ wɔɔ kiliŋąhiɛ kaa ləi?» 2 Natan yɛ Davidə ɓa: «Mɛ̨nii lɔpee gɛ kili kaa ə́ ŋą, yá pɛli ə́ gɛ. Mąąhɔlɔɓo, Yálá kaa ə́ pɔ.» 3 Kɛlaa, mąą yələ kpiníi, Yálá ə mɛ̨nį ɓo Natan ɓa, yɛ mą: 4 «'Li yɛ́ nwɔ́ tímun Davidə ɓa, mɛ̨nįi Yai-Laa ə mo ya ka, yɛ diɛ: ‹Yɛ́ hvəi pai pɛlɛ́ tɔɔi mą́ą́, gɛ́ lɔ mu. 5 Mąąhɔlɔɓo, və́ ta lɔ li pɛlɛ́ kpɔ-kpɔɔ mu, ə həɠə ɲələi ŋą́ Israɛlə lonnii kulɔ la Eziptə, ə həli la háákələi ɓa. Ŋą́ kɛ həɠə pɛlɛ́ mu, gɛ́ gbáán dee laa, di kɛɛ ɉiɛ pələi. 6 Ɲələɠaa kpɔ tii ku gɛ ɉiɛ hu kwa Israɛlə lonnii kəlee, ŋą́ ta tɔ́nwɛ̨nɛ̨ haɠa Israɛlə ɲąąwooɓomun da ɓa, a diɛi tii ŋą́ di hee diɛ nwɔ́ nu huwu Israɛlə ɲąąkɔn, gɛ́ kɛ diɛ: Lə ɓə kɛ yaai ka hvo pɛlɛ́ tɔɔ li mą́ą́ a kpitili wulu?› 7 Yiihu ŋɛ̨i, mɛ̨nįi ə́ kaa lii moi nwɔ́ tímun Davidə ɓa, ya ka; yá kɛ mą: Yai-Laa Mɛ̨nį Kəlee ŋą Hééɓomun woo ka, yɛ diɛ: Ɲą́ą́ ɓə ə́ həɠə taatɛlɛɛɠaa pulu lɔwɛi, ŋą́ ə́ hee nwɔ́ nu huwui Israɛlə nwun na. 8 Ŋą́ kɛ a ə́ tɔɔ bulu, ɓɛi lɔpee ə́ kɛi li laa, ŋą́ ə́ yowoɠaa kəlee hutaɠa ə́ ɲɛ̨i tɔwɔ, gáá pai ə́ laa kɛnɛ̨i yɛ yɛnɛ̨ɛ̨ nu kpɛa-kpɛaa di wɛi. 9 Gáá pai lɔi tɛɛi nwɔ́ nu huwu Israɛlə pɔ, gɛ́ di hamu hvilɛn, diɛ hee kpɔ tin-tin, di mąą hvo kɛa pai kpɛlin ɉii, ɛlɛɛ, nwąnąlɔ nuą di hva kɛa pənə di hvo hee di mɛ̨i yɛ bələi di kɛi gɛ la tɔlɔɔ tɔlɔɔ yələ. 10 Ə həɠə kpɔ ɲələi ŋį́ kɛi nuą həɠə la ɉu, gɛ́ di hee Israɛlə nwɔ́ nu huwui nwun na, ə həli la háákələi ɓa, ŋį́ ə́ yowoɠaa pɛlɛ ə́ kɔ́wɔ mu, ɛlɛɛ, ŋį́ mo yɛ́, gɛ́ yɛ́: Yai-Laa ɓə pai pɛlɛ́ tɔɔi yɛ́. 11 Ə́ wɔ yɛnɛ̨ɛ̨ laa a pa kulɔi, yá pa kɛa laai ə́ nąnni kwɛlɛ, gáá pai ə́ huwu mąąwiɛi ə́ pulu, ə́ kwəi lon da ɓə gáá pai heeɓolaa tɛɛi bɔ, ŋą́ nwɔ tɔɔlaai kɔ́wɔ hvilɛn kpɔ gbilin. 12 Ə́ lon tii ɓə pai pɛlɛ tɔɔi mą́ą́, ɲą́ą́n, ŋį́ nwɔ heeɓolaa kɔ́wɔ hvilɛn gbɔ tin-tin a yələ kəlee mɛ̨nį. 13 Gáá pai kɛi a nąn, yɛ ɓo a nón,. Nwóói ŋį́ gwɛlɛ, vá ɲali bulu yaa tii mą, yɛ bələi ŋį́ gɛ la, a nui kɛ dɔɔkpəlin ɉu ə́ tɔwɔi. 14 Yaa ɓə pai lɛɛi a heeɓo, ɲə́i bɛlɛ́n, ə mą kɛ, ŋį́ tɔɔkpəlin hu, a yələ kəlee kpɛla bələi hvó mą.» 15 Mɛ̨nįi di mo Natan ɓa, hįi pələ, ə pa, ə gəlee hukulɔ Davidə ɓa. Davidə nwɔ Yálá hvɛli woo 16 Tɔɔmun Davidə ə pa, ə hee Yai-Laa lííla, yɛ mą: «Lə kɛ hɛn mąą a ɲą́ą́ Yai-Laa Mɛ̨nį kəlee ŋą Hééɓomun Yálá! Lə kpɔɔ ɓaa nwɔ́ pɛlɛ́i, yaai, Ə́ li kpɔ giliŋąhiɛ ŋɛ̨i kɛi yɛ́ vilɛn mą? 17 Kɛlaa, nwɔ́ Yálá, yili tikpəi Ə́ ɲɛ̨i mu. Hvó gaai, yáá wɔlɔ Ə́ woo kwɛlɛ, Ə́ wɔ tímun wɔ pɛlɛ́i ɓa a ɉukwɛa. Yai-Laa nwɔ́ Yálá! Yáá ɉón bələ kɛ yɛ ŋą́ kɛ a nui mąą mɛ̨nį nwąnąą nu kəlee ɓa. 18 Mɛlɛ kɛnɛ̨i ŋɛ̨i Yáá gɛ Ə́ nwɔ tímun ma, lə kpɔ ɓə ɲą́ą́ Davidə, ŋą́ pɛli moi Yɛ́! Yɛ́n, ə́ ə́ wɔ tímun gɔlɔn. 19 Yai-Laa! Ə́ wɔ tímun mąą mɛ̨nį ɓə Ə́ yili kɛ la, ɛlɛɛ, laa ɓə ə mo a Ə́ lii, Yɛ́ mɛ̨nį kɛnɛ̨i ŋɛ̨i kɛ, əgɛ, Ə́i kpɔwɔ nwɔ kɛnɛ̨laa lɛ. 20 Yai-Laa! Ə́ ɲɔ̨nwɔ̨mąn və Yɛ́; yɛ bələi ku mɛn na a ku wəli, yálá takpɛli hvó laa, gulaa Ə́ pulu. 21 Akɛtii, hį́i ta kaa mɔ̨ɔ̨ yɛnɛ̨ɛ̨, gɛ pələ ə ɓo yɛ Israɛlə Ə́ wɔ nu huwui; A nu huwui ŋɛ̨i Yálá ə́ di kwɛli kulɔ ɓo, ə di kɛ a gwɛlin? Ə́ di nwun mąąɓo Eziptə yəi, Ə́ hį́i kəlee kpɛ di tɔwɔ, əgɛ, Ə́i wɔɔ kɛnɛ̨laa, da ə́ wɔɔ yee walawala laa lɛ. 22 Yɛ́ ɓə Ə́ Israɛlə kɛ a Ə́ wɔɔ nu huwu, a hį́i gaa a Ə́ pɔɔ, a yələ kəlee. Ɛlɛɛ, Yɛ́n, Yai-Laa, Ə́ ɓo a di wɔɔ Yálá. 23 Akɛ kani tii, Yai-Laa, nwoo ŋɛ̨i Ə́ mo Ə́ wɔɔ tímun naa mɛ̨i da nwɔ pɛlɛ́i, naa ə hon a yələ kəlee mɛ̨nį. 'Gɛ, yɛ bələi Ə́ mo la. 24 Nwoo tii Ə́ mo, ə nɛ̨ɛ̨ kani mą, Ə́ laa mąą yɛ wiɛ a yələ kəlee mɛ̨nį, ɛlɛɛ, diɛ kɛ mą: ‹Yai-Laa Mɛ̨nį Kəlee ŋą Hééɓomun Israɛlə nwɔ Yálá, ya ɓə gaa a Yálá Israɛlə mɛ̨i›, ɛlɛɛ, Ə́i ɲɛ̨i lɛlɛɛ hee Ə́ wɔ tímun Davidə nwɔ pɛlɛ́i ɓa. 25 A tɛ̨ą leelee, Yɛ́ kpįnįi kpɔɔ kpɔ ɓə kɛ Ə́ wɔ tímun ma, gáá ə́ wɔɔ pɛlɛ́i tɔɔi. Mɛ̨nįi gɛ, Ə́ nwɔ tímun yɛ nwooɠaa ŋɛ̨i laa həli la Yɛ́, yaa li. 26 Yai-Laa, Yɛ́ kpįnįi Ə́ kaa a Yálá, Yɛ́ ɓə nwun na nɛ̨ɛ̨ laakwɛlanmo Ə́ wɔɔ tímun ma. 27 Yili ɓa, Yai-Laa, lúwɔ́ too Ə́ wɔ tímun nwɔ pɛlɛ́i ɓa, Ə́i ɲɛ̨i lɛlɛɛ hee mą a yələ kəlee. Hvó gaai, Ə́ wɛi, Yá lúwɔ́ too, ɛlɛɛ, Yɛ́ ɓə a lúwɔ́i, kpɛla bələi hvó mą!» |