Kɔlɔnikɔ Maa-ŋuŋ 16 - Yálá laawoo hɛɓɛ (dc)1 Di pa a Yálá nwɔ mįnɛ̨ kəhii, ɉəɠə pɛlɛ́i ŋɛ̨i Davidə ə dɔɔ mįnɛ̨ kəhii tii laa ɓa, di ɉee mu. Yili pulu, di nɛ̨ɛ̨mą, di haláá hɛn da gəlee kələn da nɛ̨ɛ̨yɔwɔ laa haláá, di gulɔ laa Yálá ɓa. 2 Ɓɛlɔwai Davidə ə kpɛɛ laa ɉaláá hɛn da gəlee kələn da nɛ̨ɛ̨yɔwɔ laa halááɠaa tii kəlee kulaa, ə lúwɔ́ too nuą diɛ Yai-Laa laa hu. 3 Yili pulu, ə lɛɠɛ kpįnįn dɛitɛi, datə nwɔ̨míi tɛitɛi, da viɲə nwɔ̨míi tɛitɛi tɛɛ Israɛlə lonnii kəlee pɔ, nɛ̨ąą mąn, ɉinąą mąn. Levi lonnii di Yálá mąątɛ̨nɛ̨ wələ too 4 Davidə ə Levi lonnii taɠaa hee Yai-Laa nwɔ mįnɛ̨ kəhi nwɔ tíɓo ɓa, əgɛ, diɛ Yai-Laa Israɛlə nwɔ Yálái mąą hɛli pu, diɛ mąątɛ̨nɛ̨. 5 Di nwun nąmu Asafə da ɉee gwɛlɛmun Ɉekaria, yili pulu, Aziɛlə, Semiramotə, Yeriɛlə, Matitia, Eliavə, Benayahu da Ovɛdə-Edomə; Yériɛlə ɓə gwɛnįnŋąą da bɛlɛgwəi gwɛnįnŋąą ə kɛ ɲəi, Asafə ɓə kɛi náloɠaa yɔw. 6 Ɉaláá laa həli nuą: Benayahu, da Yahaziɛlə diɛ ɓə kɛi dulu hvɛɛ Yálá nwɔ mįnɛ̨ kəhi tɔwɔ. 7 Mąą yələi tii ɓə Davidə ə Asafə da gaayɔwɔɠaa kɛ la a Yai-Laa mąątɛ̨nɛ̨ wələ too nuą. Yálá mąątɛ̨nɛ̨ wələ 8 'Ka Yai-Laa mąątɛ̨nɛ̨, 'ka naa tɛ! 'Ka gɛ mɛ̨inɛ̨ɛ̨ɠaa hukulɔ hį́iɠaa diɛ! 9 'Ka Naa too a wələ, 'ka mąątɛ̨nɛ̨ a hvɛli! 'Ka nwɔ kpalo mɛ̨nįɠaa kəlee hukulɔ! 10 'Ka ká ɲɛ̨i pɔ̨nɔ̨ a Naa mąąhəɠɛɛ tii! Kaai Yai-Laa kwɛlii a ka lii kəlee, 'ka ka kwəinɛ̨ɛ̨! 11 'Ka Yai-Laa ɲɛ̨ilaa kwɛli da nwɔ huwalawala! 'Ka nwɔ huwalawala kwɛli! 12 'Ka ká kili lɛɛ gɛ mɛ̨nį nɛ̨ɛ̨ɠaa hu! Nwɔ kwɛlɛɛn mɛ̨nįɠaa da nwɔ mɛ̨nį hutɔɔ pələɠaa, 'ka ká kili lɛɛ ɉu! 13 Kaai ɓaa nwɔ tínuą, Israɛlə nu huwu, kaai a Ɉakɔbə lonnii, kaai ə ka həɠə ɉu, 'ka ká kili lɛɛ Yai-Laa hu! 14 Ya ɓə gaa a Yai-Laa, gu wɔɔ Yálá, Ya ɓə a lɔi kəlee ɲąąwooɓomun. 15 Mįnɛ̨i ka diɛni ka ɉəɠə, 'ka gili lɛɛ ka ŋą a yələ kəlee, nwooi tii ə gwɛlɛ kaa, gaa a wɔlɔ-wɔlɔ mɛ̨nį. 16 Mįnɛ̨i da Abrahamə di ɉəɠə, yaai ə mɛ̨i lɔ Isaakə ɓa; 17 Ə gwɛla, Ə naa a tɔ́n Ɉakɔbə ɓa, ə kɛ a yələ kəlee mɛ̨nį da Israɛlə di lɔwai. 18 Ɓɛlɔwai ə kɛ la mą: «Gáá Kanaan lɔi tɛɛi ə́ pɔ, ka hɔlɔɓo hɛn ni!» 19 Da pɛli kɛ ka lonoi, ka kɛ lɔ yɛ toonwunma nuą, ka hvo kɛ tamą li nɔi. 20 Di kɛi lɔ həɠə nɔi yiihu, diɛ li dakpɛli hu, di kulɔ tɔɔ lɔi takpɛli hu, diɛ li hį́i takpɛli pɔ. 21 Kɛlaa, Yálá hvo hvaa mą, nu ta hvo hee di mɛ̨i, Ə haŋą tɔɔɓɛlaa diɛ, di mąą mɛ̨nį ɓa, yɛ kɛ diɛ: 22 «Nwɔ́ nuą ŋɛ̨i ŋą́ą́ di mąątí, 'ka hvó tunwɔ̨n diɛ, 'Ka hvó mɛ̨nį ɲɔ̨n gɛ a gwə́i mɛ̨nį hukulɔ nuą!» 23 Lɔi mɛ̨i heeɓo nuą kəlee, 'ka wələtoo Yai-Laa gu Nąmu ɓa; 'ka gu gu ɓalo mɛ̨nį nolo ɓo, a yələɓɔ pələ tɛitɛi. 24 'Ka gɛ mɛ̨nį mąąwiaɠaa hukulɔ lɔi kəlee hu, 'ka gɛ mɛ̨nį lɛlɛɛɠaa hukulɔ hį́i kəlee ɓa. 25 Mąąhɔlɔɓo, Yai-Laa kɛnɛ̨i, mąąwiɛ ə ɓo mą kɛnɛ̨. Ɲɛ̨i mąą ɲɔwuɔi, gɛnɛ̨ dɛɛ haliɠaa kəlee diɛ. 26 Hɛn kpɔ nu kanŋaa da kwɛlihvilɛn mą, gəlee kaa a kpɛli-kpɛli. Yai-Laa ɓə yələkɔlɔn bɛli. 27 Mąą tinɛ̨nŋąąi a kɛɛpono kɛnɛ̨ɛ̨ mąąwiaa, ɓɛi gaa laa, huwalawala da mąąwiɛ ɓə nąą. 28 Yɛnɛ̨ɛ̨ nu huwu kəlee, 'ka Yai-Laa mąąwiɛ, 'Ka Yai-Laa hvaŋą tɛ, 'ka mąą mɛ̨nį hukulɔ. 29 'Ka Yai-Laa laa mąąwiaa too a wələ, 'ka pa, Yai-Laa lííla a gɔ́ hɛnŋąą, 'ka pa, ka kwɛli hvilɛn Yai-Laa lííla, ɓɛlɔwai nwɔ mąąhəɠə laa a gbɔwɔ lɛ la. 30 Lɔi kəlee piliɛ gee mɛ̨i, ə́ mąą ə kpɛlin ɲɛ̨itɔwɔ. Ée! Lɔi hvilɛnŋąąi kpɔ tin, tumɔ̨ hvo mą. 31 Yələkɔlɔn! 'Ə́ kwəinɛ̨ɛ̨; Lɔi! 'Ɓələn. 'Ka mo hį́i kəlee lɔwai, kaa diɛ: «Yai-Laa ɓə a Heeɓomun!» 32 Gboloyá da ɉu hɛnŋąą! 'Ka húluun! Ɲea kɔ́ɠɔɠaa kəlee 'ka hɛli pu! 33 Wəla hu wuluɠaa! 'Ka kɔ́nɔ̨ a kwəinɛ̨ɛ̨ Yai-Laa tɔwɔ! Hvó gaai, gaa pai, gaa pai ə gɛ, Ə yɛnɛ̨ɛ̨ hutɔɔ. 34 'Ka Yai-Laa mąąwiɛ, mąąhɔlɔɓo, nwɔ mɛ̨nį lɛlɛɛi, ə lɛɛ, a kulɔ nwoo ɓa a yələ kəlee. 35 'Ka mo kpɔ a ɉələ woo, kaa diɛ: «Ku ɓalo Yálá! Ku ɓalo! Ku ɲąąkpɔn, Ə́ ku kulɔ hį́i takpɛliɠaa lɔwai. Ə gɛ, ku Ə́ laa mąąhəɠɛɛ tɛ, ɛlɛɛ, Ə́ mąątɛ̨nɛ̨ mɛ̨nį ə ɓo a ku ɲɛ̨i pɔ̨nɔ̨ hɛn. 36 Mąąwiɛ ə kɛ Yai-Laa Israɛlə nwɔ Yálái ɓa, a yələ kəlee da yələ kəlee mɛ̨nį!» Nąąlɔwai nɔi lonnii kəlee di mu hon, diɛ mą: «Ə kɛ tii! Mąąwiɛ ə kɛ Yálá ɓa!» 37 Davidə ə Asafə da nąn nonnii lɛɛ Yai-Laa nwɔ mįnɛ̨ kəhii nií la, diɛ tí mą, yɛ bələi mąą tɔɔ ɓo pələ kaa la a yələ kəlee. 38 Nuąi kɛ a bɛlɛ́ laaləi mɛ̨ikaa nuą, diɛ ɓaa: Ovɛdə-Edomə da nąn nonnii, di kɛ a nu pow mɛ̨ida kɔ́w mɛ̨ihaaɓa. Ovɛdə-Edomə ə kɛ a Yeditun da Hosa di lon. 39 Davidə ə ɉaláá laa həli mun Sadɔkə, da ɉaláá laa həli nuąi kɛ a nąn gaaɠaa di lɛɛ Yai-Laa nwɔ pɛlɛ́i la, Gabaɔn ɉaláá kulɔi; 40 əgɛ, diɛ haláá kulɔ Yai-Laa ɓa kpɛla bələi hvo kɛ mą, ɓɛi ŋɛ̨i da kɛ ɉaláá hɛn da gəlee kələn nąą. Diɛ gɛ tii a yələwala da yələwulii; əgɛ, mɛ̨nįi Yai-Laa ə Israɛlə tí la, nwɔ tɔ́n ɉɛɓɛ́i hu, diɛ gɛ. 41 Nuąi kɛ di pɔ, diɛ ɓaa: Heman, da Yedutun, ə pɛlɛ la, nuąi di di lɛ, di di laa ɓo Yai-Laa mąątɛ̨nɛ̨ mɛ̨nį ɓa, gbəli: «Hvó gaai Yai-Laa a kulɔ nwoo ɓa a yələ kəlee.» 42 Nuąi kɛ di pɔ, diɛ ɓaa: Heman da Yedutun, ə pɛlɛ la, túlúɠaa diɛ, nalóɠaa, ə mą kɛ, hvɛli kɛ hɛnŋąą, diɛ Yálá mąątɛ̨nɛ̨ wələ mu hee la. Yedutun lonnii ɓə kɛ bɛlɛ́ laaləi. 43 Nu kəlee di li di pɔ taai, Davidə ə tinɛ̨n ə lúwɔ́ too ɲəi bɛlɛ́n nuą diɛ. |