Kɔlɔnikɔ Maa-ŋuŋ 15 - Yálá laawoo hɛɓɛ (dc)

¹ Davidə ə pɛlɛ́ɠaa tɔɔ Davidə taa, ə kɛɛnąą ta pɛli, ə həɠə pɛlɛ́ tɔɔ laa, ə Yálá nwɔ mįnɛ̨ kəhii lɔ mu.

² Davidə ə mo kɛa yɛ diɛ: Levi huwuhu nuą lɔ ɓə Yálá nwɔ mįnɛ̨ kəhii həɠə mɛ̨nį mąą laa tɛɛ di pɔ, mąąhɔlɔɓo, diɛ ɓə Yálá ə di həɠə ɉu, diɛ gbəŋə, əlɛɛ diɛ naa hɔn mo.

³ Davidə ə Israɛlə nuę kəlee ɲąąkpɔn Ɉerusalɛmə daai, ə gɛ di Yai-Laa nwɔ mįnɛ̨ kəhi həɠə di paa la ɓɛi di bɛli mąą mɛ̨nį ɓa.

⁴ Ə ɉaláá laa həli nuą ɲąąkpɔn, diɛi a Aarɔn lonnii, da Levi huwuhu nuą;

⁵ nuąi tii lɔwai, Uriɛlə ə kɛ laa, yai kɛ a Kehatə huwuhu nuą nwun nąmu, bɛlɛɛ gaayɔwɔ nwun dɔ̨nɔ̨ yeehveelɛ ɓa;

⁶ Asaya ɓə kɛ a Merari huwuhu nu waa nwun nąmu, da gaayɔwɔɠaa nwun veelɛ yeehveelɛ;

⁷ Yoɛlə ə kɛ a Gɛrsɔmə huwuhu nuą nwun nąmu, da gaayɔwɔɠaa nwundɔ̨nɔ̨ yeehaaɓa;

⁸ Semaya ə kɛ a Elisafan huwuhu nuą nwun nąmu, da nu nwun veelɛ;

⁹ Eliɛlə ə ɓo a Hebrɔn huwuhu nuą nwun nąmu, da nu pow mɛ̨ihaaɓa;

¹⁰ Aminadavə ɓə kɛ a Uziɛlə huwuhu nuą nwun nąmu da nu nwundɔ̨nɔ̨ nu pow kɔ́w hveelɛ.

¹¹ Davidə ə ɉaláá laa həli nuą təli, diɛ ɓaa: Sadɔkə da Abiatarə, ə mą kɛ Levi huwuhu nuąi a: Uriɛlə, Asaya, Yoɛlə, Semaya, Eliɛlə da Aminadavə.

¹² Ə mo diɛ yɛ diɛ: Kaai ɓaa Levi huwuhu nuą nwun nąmįną, 'ka ka mąąhəɠə, ka ká yəi bɛlɛ́n nuą kəlee, yili pulu, ka li ka Yai-Laa Israɛlə nwɔ Yálái nwɔ mįnɛ̨ kəhi həɠə, ka paa la ɓɛi ŋį́ nąą pɛli a nwɔɔi.

¹³ Gɔwɔ tɔɔi lɔwai ka hvo kɛ ɓɛ, yili ɓə gɛ Yai-Laa gu wɔ Yálái ə haa too ku lɔwai. Mąąhɔlɔɓo ku hvo kɛ hvilɛn ni nwoo pulu.

¹⁴ Ɉaláá laa həli nuą da Levi huwuhu nuą, di di mąąhəɠə kɛa, ə gɛ də li di pa a Yai-Laa Israɛlə nwɔ Yálái nwɔ mįnɛ̨ kəhii.

¹⁵ Levi lonnii di Yálá nwɔ mįnɛ̨ kəhii tii kpəŋə di kalanŋą gbɔnŋaa lɔɔ mu, yɛ bələi kɛ Moisə aa di liɛwoo ɓo la, yɛ bələi Yai-Laa ə mo la.

¹⁶ Davidə ə mo Levi huwuhu nuą nwun nąmįną diɛ, yɛ diɛ: Di di kaayɔwɔɠaai ɓaa a wələ too nuą, di di hee, diɛ pɛli kɛi di pulu, diɛ gwɛnįnŋaa yɔw, da bɛlɛgwəiɠaa, da naloɠaa, ɛlɛɛ diɛ di wɔ kwəinɛ̨ɛ̨ kulɔ pɔ̨nɔ̨ ŋą a hvɛli woo kɛnɛ̨.

¹⁷ Di Yoɛlə lon Heman lon ɉee, da Bɛrɛkiahu lon Asafə yii lɛɛ bulu, da Kusayahu lon Etan yii lɛɛ a ɉaaɓa nąą; diɛ kɛ a Merari huwuhu nuą.

¹⁸ Levi huwu takpɛliɠaa di kɛ di kwɛlɛ, yiliɠaai di ɓo di yee mu, diɛ ɓaa: Bɛlɛ́ laalei mąąkpɛ nuą; Zakaria, Bɛn, Yaaziɛlə, Semiramotə, Yehiɛlə, Uni, Eliavə, Benayahu, Maaseyahu, Matitiahu, Eliflehu da Mikneyahu, Ovɛdə-Edomə da Yeiɛlə.

¹⁹ Nwələ too nuą lɔwai, Heman, Asafə da Etan ɓə lalo ə kɛ di yəi a ɓala kwɛli diɛ ɲɔw;

²⁰ Zakaria, Aziɛlə, Semiramotə, Yehiɛlə, Uni, Eliavə, Maaseyahu da Benayahu, di wɛi di kɛi gwɛnin ɲɔw a nwoo təŋąą

²¹ Matitiahu, Eliflehu, Mikneyahu, Ovɛdə-Edomə, Yeiɛlə da Azaziahu di kɛi bɛlɛgwəi yɔw a nwoo mu wiaa, diɛ nwələ tənən dɔɔ la.

²² Kenaniahu tii kɛ a Levi huwuhu nuą da kɛ gəhi kpəŋəi di nwun nąmu, mąąnɛ̨ɛ̨ kɛ ə ɲɛ̨i kɛ golói tii ɓa, nwələ pələ ɓa yili kɛi.

²³ Bɛlɛ́ laalei mąąkpɛ nuąi tii kɛ a Berekia da Ɛlkana, di mąąnɛ̨ɛ̨ kɛ di ɓo lɔ tɔɔni mįnɛ̨ kəhi kwɛlɛ,

²⁴ ə mą kɛ bɛlɛ́ laalei mąąkpɛ nuąi kɛ a Ovɛdə-Edomə da Yehia. Yii ɓaa ɉaláá laahəli nuąi kɛ a; Sevaniahu, Yosafatə, Netanɛlə, Amasai, Zakaria, Benayahu da Eliezɛrə, di mąąnɛ̨ɛ̨ kɛ diɛ túlú hvɛɛ Yálá nwɔ mįnɛ̨ kəhii tɔwɔ.

Yálá nwɔ mįnɛ̨ kəhii ə pa Ɉerusalɛmə

²⁵ Davidə, Israɛlə kalanɉonŋaa da gɔ́kulaa nwun nąmįną di li di Yai-Laa nwɔ mįnɛ̨ kəhii həɠə a kwəinɛ̨ɛ̨ Ovɛdə-Edomə pɔɔli.

²⁶ Ə gɛ Yálá ə kpɔnmąą tɛɛ kɛ Levi lonnii kɛi Yai-Laa nwɔ mįnɛ̨ kəhi həɠə di pɔ, di niŋɛ̨ mɛ̨ihveelɛ da ɓɛlaa hilɛ mɛ̨ihveelɛ kulɔ a haláá.

²⁷ Həɠə kpɛli kwəlɛɛ ɓə kɛ Davidə ɓa, bələ lɔ ɓə Levi lonnii mįnɛ̨ kəhi ə kɛ di yəi, di mąąyiliɛ kɛ la, da vɛli kɛ nuą da Kenania yai kɛ gəhi həɠə mɛ̨nį nwun na; yili pulu nwɔ̨nɔ̨, ɉaláá laa həli nuą di wɔ kilɛn ɉəɠəi tii a ɲee kpɛli, ɉuwu ta ə kɛ Davidə kwąną.

²⁸ Israɛlə nuą kəlee di kɛi pa a Yai-Laa nwɔ mįnɛ̨ kəhii kwəinɛ̨ɛ̨ woo kɛnɛ̨ hu, diɛ túlú hvɛɛ, diɛ lalo yɔw, diɛ gwɛnįn ɲɔw da bɛlɛgwəi.

²⁹ Ɓɛlɔwai Yai-Laa nwɔ mįnɛ̨ kəhii ə kɛi həli la Davidə taa, Saulə lon nɛ̨ɛ̨nu Mikalə ə nwun mąą laa ə tɔɔmun Davidə kaa yɛ mąną a kwəinɛ̨ɛ̨, mɛlɛ ə kpɛɛ gwəi.