Kɔlɔnikɔ Maa-ŋuŋ 14 - Yálá laawoo hɛɓɛ (dc)

Davidə ə li Ɉerusalɛmə

¹ Hiramə ɓə kɛ a heeɓomun Tirə. Ə wəlɛɛ tɔɔ Davidə pɔ, ə bɛlɛ kpitili wulu ɓa, da pɛlɛ́ tɔɔ nuą, ə mą kɛ, wulu haɠa nuą; əgɛ, di nwɔ tɔɔ pɛlɛ́i tɔɔ.

² Nąąlɔwai, Davidə ə gɔlɔn yɛ kɛ, Yai-Laa aa nwɔ heeɓo laai hee kpɔ a neelee Israɛlə lonnii mɛ̨i, ɛlɛɛ, mɛ̨lɛ kpɔɔkpɔ ə kɛ mą Israɛlə nu huwu mąą mɛ̨nį ɓa.

³ Davidə ə tinɛ̨n nwɔ̨nɔ̨, ə nɛ̨ąą takpɛliɠaa həɠə, ə lonŋaa kaa diɛ.

⁴ Nonŋąąi ə di kaa Ɉerusalɛmə, diɛ ka: Samua, Sovavə, Natan, Salomɔn,

⁵ Yivharə, Elisua, Ɛlpalɛtə,

⁶ Noga, Nɛfɛgə, Yafia,

⁷ Elisama, Beɛliada, da Elifɛlɛtə.

⁸ Filisti nuą di mɛ̨n, diɛ kɛ, daa Davidə kɛ a tɔɔmun Israɛlə nwun na. Filisti nuą kəlee di hvilɛn diɛ Davidə kwɛli. Davidə ə bələ mɛ̨n, ə kulɔ, yɛ li di laakwiɛn ɉii.

⁹ Filisti nuą di pa, di di huhiɛ Refaitə ɲɛɛ kɔ́wɔ hu.

¹⁰ Davidə ə Yai-Laa mąąni kɛ, yɛ mą: «Akɛti mąąnɛ̨ɛ̨ ŋą́ li ŋą́ pɛlɛ Filisti nuą diɛ a kɔ́, ə́ kaa pai di lɔi ɲéé ŋą?» Yai-Laa yɛ Davidə ɓa: «'Li! A tɛ̨ą, gáá pai Filisti nuą lɔi ə́ yee ŋą.»

¹¹ Yili ɓə gɛ, Davidə da nwɔ nuąi di li Baalə-Perasimə, nąą ɓə Davidə yee ə tɛɛ laa diɛ. Davidə yɛ kɛ diɛ: «Yálá aa gɛ, ŋą́ą́ kwɛni kulɔ ɲówo kɔ́wɔ mu, yɛ bələi yá a hɛnŋąą mukulɔ la.» Mɛ̨nįi gɛ, di gɛɛnąą tii laa hee a: Baalə-Perasimə yaa li.

¹² Filisti nuą di ɓo di wɔɔ haliɠaa diɛ di bu laa, Davidə yɛ diɛ: «'Ka ɉaliɠaa ŋɛ̨i kələn!»

¹³ Filisti nuą di pənə nwɔ̨nɔ̨ di pa ɲɛɛ kɔ́wɔ hu.

¹⁴ Davidə ə tinɛ̨n nwɔ̨nɔ̨ ə Yálá mąąni kɛ, Yálá yɛ mą: «'Hvó hvilɛn di pulu, 'di mąą laa, 'ə́ laa di tɔwɔ, ka diɛni ka kwiɛn nwɛla koo ɓa, nwuluɠaa tii tənən ma.

¹⁵ Ɓɛlɔwai ə́ kaa pai nu kɔ́wɔ mu tín mɛ̨n ɉii la nwuluɠaa tonna, nąąlɔwai ɓə, yá kulɔ la, ə́ pɛlɛ diɛ. Mąąhɔlɔɓo, Yálá a kɛ kɛa hvilɛn ni ə́ tɔwɔ, yɛ Filisti nuą di wɔ kɔlaɠai huwolo.»

¹⁶ Bələi tii Yálá ə Davidə tí la, ə gɛ tii. Davidə yee ə tɛɛ Filisti nuą diɛ; ə di paa həɠə kpɔ Gabaɔn, ə həli Gɛzɛrə.

¹⁷ Davidə laa ə tɛ nɔi kəlee hu, Yai-Laa ə Davidə yee kɔ̨nwɔ̨n ɉu ɓɛlɛ lɔi kəlee diɛ ɲɔw mą.