Kɔlɔnikɔ Maa-ŋuŋ 13 - Yálá laawoo hɛɓɛ (dc)Mįnɛ̨ kəhi pa mɛ̨nį Ɉerusalɛmə ( Samuɛlə veelɛ 6.1-11 ) 1 Davidə da nuąi nu waa tɛitɛi nwun na, ə lɛɛ, nu nwun dɛitɛi ɲąąwooɓo nuą, bɛlɛɛ galanɉonŋąą diɛ, di di nwun dɔɔ; 2 ya ɓə Davidə ə mo Israɛlə nuą kəlee diɛ, yɛ diɛ: «Mɛ̨nįi ŋɛ̨i gáá pai moi, a laa a ka lii, ə lɛɛ, a kɛ kpɔ ə həɠə Yai-Laa gu wɔɔ Yálái pɔ, ka gu wəlɛɛ tɔɔ gu kaayɔwɔɠaa yiiɠaa tii daa lɛɛ Israɛlə lɔiɠaa kəlee hu, ə pɛlɛ la ɉaláá laa həli nuą, da Levi lonnii diɛ, di həɠə daaɠaa hu, di pa di too gu pɔ. 3 Akɛtii, gu pənə gu pa, a gu wɔɔ Yálái nwɔ mįnɛ̨ kəhii. Hvó gaai, Saulə nwɔ tɔɔlaa yələi, gu hvo kɛ gu kili lɛɛ li ɉu.» 4 Nɔi lonnii kəlee di hvaa Davidə woo tii ɓa, mąąhɔlɔɓo, ə kɛ a mɛ̨nį haŋąą di ɲɛ̨i ɓa. 5 Davidə ə Israɛlə lonnii kəlee ɲąąkpɔn, ə həɠə ɲai Eziptə lɔi ɓa, ə həli la Hamatə bələ nwun na; əgɛ, di pa, Yálá nwɔ mįnɛ̨ kəhi həɠə mɛ̨nį ɓa Kiriatə-Yearimə. 6 Davidə da Israɛlə nuą kəlee, di tɛ Baala Kiriatə-Yearimə yai kɛ Ɉuda lɔi hu; əgɛ, di Yálá nwɔ mįnɛ̨ kəhii həɠə, a gəhii Yai-Laa ə kɛ heeni mɛ̨i mąąkpɛ malakaɠaa pulu, ɓɛi di kɛi dəli laa a naa. 7 Di Yálá nwɔ mįnɛ̨ kəhii hee wotolo nįnɛ̨ hu; di həɠə Avinadavə yəi bɛlɛ́ laaləi. Avinadavə lonnii: Uza da Ahio, diɛ ɓə kɛi nwotolo hiɛ. 8 Davidə da Israɛlə lonnii kəlee diɛ mąną kpɔ kɛnɛ̨ Yálá lííla, diɛ wələ too di pulu, diɛ gwɛnįn ɲɔw, bɛlɛgwəi, ɓala da túlú. 9 Di həliɛ Kidɔn nwɔ mɔ̨nun dan ɉii. Uza ə ɲee haŋą Yálá nwɔ kəhii pɔ pələ, ə ɲee too ɉu, mąąhɔlɔɓo, nįŋɛ̨ɠaa di kɛi gɛ mu takpa-takpa, diɛ kɛ di doo. 10 Yai-Laa nwɔ liiholi ə ɓɛla Uza mɛ̨i, Yai-Laa ə nɛ̨ɛ̨ mą, ə Uza paa laa ɲąąɓa. Mąąhɔlɔɓo, aa kɛ ɲee hee mįnɛ̨ kəhi ɓa. Nąą lɔ ɓə ə haa laa Yálá lííla. 11 Mɛ̨nįi tii ə Davidə kwəi pili mą, gɛ mɛ̨nį Yai-Laa ə Uza hon bələ kɛ tii. Háá ɓaa háá, da kɛ gɛɛnąą tii laa ɓaa: «Uza nwun na pilii.» 12 Mąą yələi tii, Davidə ə ɲɔw Yálá ɓa; yɛ kɛ diɛ: «Ŋą́ pai tɛɛ pələ kɛi ləi, gɛ́ Yálá nwɔ mįnɛ̨ kəhi lɔ ɲə́i bɛlɛn?» 13 Davidə ə lənə mįnɛ̨ kəhii lɔ mɛ̨nį ɓa bɔɔli, Davidə taa. Ə mo, də li di nɔ Gatə mun Ovɛdə-Edomə yəi bɛlɛ́n. 14 Yálá nwɔ kəhii ə ɲąnin ɉaaɓa kɛ Ovɛdə-Edomə yəi bɛlɛ́n. Yai-Laa ə lúwɔ́ too Gatə mun Ovɛdə-Edomə nwɔ pɛlɛ́i ɓa. |