Kɔlɔnikɔ Maa-ŋuŋ 12 - Yálá laawoo hɛɓɛ (dc)

Davidə mɛlaani

¹ Nuąi pa Davidə pɔ Siklagə, ɓɛlɔwai ə kɛi ni now la Kisə lon Saulə ɓa; nuąi tii lononŋąąi kɛ nwɔ kɔ́kuláaɠaai lɔwai, diɛ ɓə kɛi kɔ-kɔ.

² Kilɛn ə kɛ di yəi, diɛ kwɛni pili a di yee kəlee, diɛ nwɔnɔ̨ kilɛn bili. Nuąi həɠə Bɛnɉamɛn huwu hu, diɛi kɛ a Saulə kaayɔwɔɠaa, diɛ ka:

³ Nwun ma mun, Ahiezɛrə da Yoasə, Givea mun Semaa lon; Yeziɛlə da Pɛlɛtə Azmawɛtə lon; Beraka da Yehu, Anatotə mun;

⁴ Gabaɔn mun Yismaya, ə kɛ a kuláa, nu pow haaɓai tii lɔwai, yɛ ɓo a nu pow haaɓa nwun nąmu;

⁵ Yirmeya, Yahaziɛlə, Yohanan da Yozavadə Gedera mun;

⁶ Eleuzai, Yerimotə, Bealia, Semariahu da Sefatiahu Harifə mun;

⁷ Ɛlkana, Yisiyahu, Azarɛlə, Yoezɛrə, Yasoveamə, diɛi kɛ a Kora nuą;

⁸ Yoela da Ɉevadia, Gedɔrə mun Yerohamə lonnii.

⁹ Nuą taɠaa di kulɔ Gadə lonnii lɔwai, di pa Davidə pɔ mąąkilɛ pələi nɔi pun ɉu. Nuą tii di kɛ kpɔ a kpakoloɠaa, a kɔ́kuláaɠaa, di hąą yiliɛ kɔ́ kɔ́ mɛ̨nį ɓa; di liikpəlɛɛ yɛ yala hilɛ, di mąąhulaa yɛ hvɛlɛɛn a kɛ yee ɓa.

¹⁰ Ezɛrə ɓə kɛ a di nwun nąmu, Ovadia ə lɛɛ nąą pɔɔ ɓa, Eliavə ə kɛ a ɉaaɓa nąą,

¹¹ Nąąn nąą ɓaa kɛ a: Mismana. Nɔɔli nąą ɓaa: Yirmeya.

¹² Mɛ̨ida nąą ɓaa: Atai. Mɛ̨ihveelɛnąą ɓaa: Eliɛlə.

¹³ Mɛ̨ihaaɓa nąą ɓaa: Yohanan. Mɛ̨inąąn nąą ɓaa: Ɛlzavadə.

¹⁴ Yirmeyahu a bow nąą, Makbanai a bow kɔw tanɔ̨n nąą.

¹⁵ Gadə lonnii tii lɔwai, diɛ ɓə kɛ a kɔlaɠa nwun nąmįną. Nui kɛ di lɔwai nwɔ kɔlaɠai tiikpə, nu ə kɛ ɉu a nu nwundɔ̨nɔ̨. Nui kɛ nwɛi kɛnɛ̨, nu ə kɛ ɉu a nu waa tɔ̨nɔ̨.

¹⁶ Diɛi tii ɓə Ɉurdɛn yá teen a ɲąnįn dɔlɔɔ, ɓɛlɔwai ɲa hvɛɛi kɛ la, diɛ lɔ ɓə nwɔnɔ̨ too ɲa-ɓoloon bɔ nuą hu, di di kpɛ, voló həɠəi pələ da dooi pələ.

¹⁷ Bɛnɉamɛn da Ɉuda lonnii taɠaa, di pa Davidə pɔ, ɓɛi ə kɛ laa now pələi.

¹⁸ Davidə ə kulɔ, ə di laakwiɛn, ə nwoo ŋɛ̨i ɓo diɛ, yɛ diɛ: «Akɛ ka káá pai bɔ́ a liilaa kiliŋąhiɛ da kpɔnmąą, ŋį́ hvaamą a níí kəlee, ka too bɔ́. Kɛlaa, akɛ ka pa ɲą́ą́hɛɠii, ka dɛ́ɛ́ ɲówoɠaa pɔ, yili nwɛi, gu nąnni di wɔɔ Yálá ɲɛ̨i kaa mą, nwąnąlɔɔ túwɔ́ hvo ɲéé hu, yaa ɓə a gu hutɔɔ!»

¹⁹ Ə kɛ kpɔlɔɔ tii, Yálá nwɔ Kilii ə pa Amasai pɔ, yai kɛ a nu pow haaɓai nwun nąmu, yɛ diɛ: «Ku kaa ə́ pɔ Davidə! Ɉɛse lon! Ku kaa ə́ pɔ! Ə́ liilaa! Ə́ lii ə laa! Nui a ə́ kpɔnmąą ɓo liilaa kaa mą! Hvó gaai ə́ wɔɔ Yálái ɓə a ə́ mąąkpɔnmąą ɓo.»

²⁰ Manase nuą di hvilɛn Davidə pulu, ɓɛlɔwai Davidə ə too la Filisti nuą pɔ, diɛ li kɔ́ pɛlɛi Saulə ɓa; kɛlaa, nuą tii di hvo pɛli kpɔnmąą tɛɛi di pɔ. Hvó gaai, Filisti nuą di nwun dɔɔi di mo, di Davidə yali bulu, diɛ mą: «Nui ŋɛ̨i a lɛɛ gu pɔ, da ŋą mɛ̨nį nąmu Saulə di woo tɔɔi kaa lii kɛi tɔ̨nɔ̨, di pɛlɛ guɔ.»

²¹ Ɓɛlɔwai Davidə ə bulu pənə la, yɛ li Siklagə, Manase yəi bɛlɛ́n nuą di hvilɛn bulu; diɛ ɓaa: Adna, Yozavadə, Yediaɛlə, Mikaɛlə, Yozavadə, Elihu da Siletai, yai kɛ nu waa tamąą nwun na Manase lɔi hu.

²² Diɛi tii ɓə kpɔnmąą tɛɛ Davidə pɔ, di nwɔ kɔlaɠai hu kɛnɛ̨, di kɛ a kpakoloɠaa, diɛ ɓo a kɔlaɠa nwun nąmįną.

²³ Yələ ɓɔ pələ tɛitɛi kəlee, nuą di kɛi pa Davidə pɔ, diɛ kpɔnmąą tɛɛ bɔ, yili ɓə gɛ, ŋą kɔlaɠai hu ə kɛi kɛnɛ̨ yɛ Yálá nwɔ kɔlaɠa.

Nu kwɛnii kɛ Davidə pɔ Hebrɔn

²⁴ Nuąi pa Davidə pɔ Hebrɔn, diɛ Saulə nwɔ heeɓo laa həɠə ɲəi, diɛ dɛɛ Davidə pɔ, yɛ bələi Yai-Laa ə mo la, diɛ ka:

²⁵ Ɉuda nu huwu, diɛi kɛ da pɛli kpala pilii, hémə ə ɓo di yəi, di kɛ a: Nu waa mɛ̨ida nu nwun mɛ̨ihaaɓa, di hąą yiliɛ a kuláa kɛ pələ.

²⁶ Simeɔn huwu hu nuą, nu waa mɛ̨ihveelɛ nu nwundɔ̨nɔ̨, a kuláa kpakoloɠaa.

²⁷ Levi huwu hu, nu waa nąąn pulu nwun mɛ̨ida,

²⁸ ə pɛlɛ la Yehoyada ɓa, Aarɔn nwɔ pɛlɛ́i nwun nąmu; nuąi lɛɛ bɔ diɛ pa, nu waa haaɓa pulu nwun mɛ̨ihveelɛ;

²⁹ ə pɛlɛ la, Sadɔkə ɓa, yai kɛ a kuláa laŋąlon, nuąi lɛɛ bɔ, di kɛ a nu pow hveelɛ kɔ́w hveelɛ a nwɔ pɛlɛ́ nwun nąmįną.

³⁰ Bɛnɉamɛn huwu hu nuą, diɛi kɛ a Saulə gaayɔwɔɠaa, nu waa haaɓa. Diɛi kpɔ kɛ di yee ə kɛ Saulə yəi bɛlɛ́n goló ɓa.

³¹ Ɛfraimə huwu hu nuą, nu waa pow hveelɛ pulu nwun mɛ̨ihaaɓa, a kpakoloɠaa, a nuąi di laa tɛɛ di yəi bɛlɛnŋąą.

³² Manase huwu bələ tɔ̨nɔ̨, nu waa pow kɔ́w mɛ̨ihaaɓa; diɛ ɓə di di tɔɔ a Manase laa, diɛ pa Davidə heei gbəlin ɉu.

³³ Isakarə lonnii lɔwai, nuąi kɛ a mɛ̨nį kɔ́lɔn nuą kpɛa-kpɛaa, diɛi kɛ Israɛlə dinąą kɔ́lɔn, di kɛ a nu nwun veelɛ, diɛ ɓo di kaayɔwɔɠaa nwun na, diɛ ɓo di yee mu.

³⁴ Zabulɔn huwu, nu waa pow lɔɔli di huyiliɛ kɔ-kɔ mɛ̨nį ɓa, gəlee di pa a di wɔɔ kwɛli hɛnŋąąi, diɛ kɔ-kɔ a di kwəi kwəlɛɛ.

³⁵ Nɛftali huwu, nwun nąmįną nu waa tɔ̨nɔ̨, bɛlɛɛ nu waa pow haaɓa kɔ́w mɛ̨ihveelɛ ɓa, kpalá da həmə́ ə ɓo di yəi.

³⁶ Dan huwu, nu waa pow hveelɛ kɔ́w mɛ̨ihaaɓa pulu nwun mɛ̨ida, di huyiliɛ kɔ-kɔ mɛ̨nį ɓa.

³⁷ Asɛrə huwu, nu waa pow nąąn, di huyiliɛ kɔ́ mɛ̨nį ɓa.

³⁸ Ɉurdɛn ya pulu pələ, Rubɛn huwu, Gadə huwu, da Manase huwu bələ tɔ̨nɔ̨, di kɛ a nu waa nwundɔ̨nɔ̨ nu waa pow hveelɛ, da di wɔɔ kɔ-kɔ hɛnŋąą kəlee.

³⁹ Gɔkuláaɠaa tii kəlee huyiliɛ kɛ kɔ-kɔ mɛ̨nį ɓa, di pa Hebrɔn a di kwəi kwɛlɛɛ, əgɛ, di Davidə hee a tɔɔmun Israɛlə nuą kəlee nwun na. Israɛlə nu kpəlii tii lɛɛ, diɛ kpɛli di pa a di kwəi kwɛlɛɛ Davidə hee mɛ̨nį ɓa a tɔɔmun.

⁴⁰ Hvóló haaɓa ɓə di gɛ laa Davidə kwɛlɛ, diɛ di laa mį́i, diɛ di kpələ; mąąhɔlɔɓo, di kaayɔwɔɠaa daa kɛ di tɔwɔ hee kpɔ a nɛlɛɛ.

⁴¹ Ə həɠə kpɔ Isakarə lɔi ɓa, ə li la Zabulɔn lɔi ɓa da Nɛftali lɔi, nuąi kɛ nɔi tii hu, di kɛi pa a kɔ̨nɔ̨n hoohvaalənŋąą mɛ̨i, ɲɔ̨nwɔ̨mɛ̨ɛ̨ɠaa, tiɛ̨-həɠə hooɠaa da nįŋɛ̨ɠaa. Gɔ̨nɔ̨nŋąą tii ɓaa kɛ a: Lɛɠɛ hunwɔ̨, wulu ɓáɠaa, viɲə ɓá kpala, lɔɔ, wulɔ, taatɛlɛɛ kpɛa-kpɛaa da bɛlɛɛɠaa kpɔ a gbulu kɛnɛ̨. Mąąhɔlɔɓo, kwəinɛ̨ɛ̨ ə kɛ Israɛlə lɔi hu.