Kɔlɔnikɔ Maa-ŋuŋ 11 - Yálá laawoo hɛɓɛ (dc)

Di heeɓo laa tɛɛ Davidə pɔ

¹ Israɛlə nuą kəlee di di ɲąąkpɔn Davidə kwɛlɛ Hebrɔn, diɛ mą: «Gu kaa a pɛlɛ́ tɔ̨nɔ̨ mu nuą, gu ɲąmą kaa tanɔ̨n;

² Saulə nwɔ tɔɔlaa yələi, yɛ́ ɓə kɛi tɔɔ Israɛlə ɲɛ̨i tɔwɔ kaa li, kaa pa. Ya ɓə Yai-Laa ə kɛ yɛ́: ‹Yɛ́ ɓə pai Israɛlə nwɔ́ nu huwui ɲąąkɔn ɉii, ɛlɛɛ, yɛ́ ɓə pai kɛi Israɛlə nwun na.›»

³ Israɛlə kalanɉonŋaa kəlee di pa di həli tɔɔmun ma Hebrɔn, ɛlɛɛ, da tɔɔmun Davidə ni di mįnɛ̨ həɠə Hebrɔn Yai-Laa lííla. Di dɔɔ wulɔ lɔ Davidə ɓa, di gɛ a Israɛlə tɔɔmun, yɛ bələi Yai-Laa ə mo la Samuɛlə ɓa.

Davidə ə Ɉerusalɛmə hon a kɔ́

⁴ Davidə da Israɛlə nuą di kɔ́ pɛlɛ Ɉerusalɛmə taa ɓa. Nąą ɓə Ɉebusə nuą di kɛ laa, diɛ ɓə kɛ heeni nɔi tii hu.

⁵ Ɉebusə nuą di mo Davidə ɓa, diɛ mą: «Hvá pɛli lɔi ɓɛ.» Kɛlaa, Davidə aa kɛ Siɔn gulaa-kwəli hon; di nąą laa hee a: Davidə taa.

⁶ Davidə aa gbɛa kɛ mo, yɛ kɛ: «Nui pai Ɉebusə mun da paai, ŋą́ gɛ a kɔlaɠa nwun nąmu.» Seruya lon Ɉoabə ɓə kɛ a nu dɔlɔɔ ə pɛlɛ diɛ, ə kɛ a gɔlaɠa nwun nąmu.

⁷ Davidə ə hee gulaa kwəli. Mɛ̨nįi gɛ, diɛ kɛ nąą laa ɓaa: Davidə taa, yaa li.

⁸ Yili pulu, ə taa pu nąą kwɛlɛ, ə həɠə gɛɛnąą laa hvɛɛ ɓa da gwɛlɛ kəlee. Ɉoabə ɓə kɛa daa kpəli pɛli.

⁹ Davidə hvaŋą ta lɔ ɓə kɛi pɛlɛ mą, Yai-Laa Mɛ̨nį Kəlee ŋą Hééɓomun yɛ ɓo bɔ.

Davidə nwɔ kuláa walawalaɠaai

¹⁰ Davidə ŋą kuláa wala-walaɠaai kɛ di tɔɔ bulu a nwala-walaa, yaa da Israɛlə, diɛi gɛ, Davidə yɛ heeɓo laa kɛ Israɛlə mɛ̨i, yɛ bələi Yai-Laa ə mo la.

¹¹ Di laa ka; diɛ ɓaa kɛ a: Hakmoni lon Yasoveamə, nu haaɓa nwun nąmu. Yaa ɓə nwɔ kpalai pili ɲee mɛ̨i tanɔ̨n, a ɓɔ nu nwun ɉaaɓa hu a gee, ə di paa.

¹² Yaa tii a həɠə laa, nui lɛɛ bulu ya ɓaa: Dodo Ahoa mun lon Eleazarə, gɔkuláa haaɓai tii dɔ̨nɔ̨ li.

¹³ Yaa ɓə kɛ Davidə pɔ Pasə-Damimə, ɓɛlɔwai Filisti nuą di di ɲąąkpɔn na diɛ kɛ di pɛlɛ Davidə ɓa. Kpai yɛa ta ə kɛ laa, nuą di pu Filisti nuą tɔwɔ;

¹⁴ Eleazarə da nwɔ nuąi di di loo ɲɛɛ hamąi, di kulɔ, di Filisti nuą paa kpɔ kpąąn, gɔ ə nɛ̨ɛ̨ laa Yai-Laa ɓa kpɔ kɛnɛ̨.

¹⁵ Gɔkuláá pow haaɓai tii lɔwai, kuláa haaɓa ə həɠə ə li Davidə pɔ Adulamə gwɛni wolo hu; ə kɛ tii, Filisti nuą daa di wɔ kɔ́ ɓuwui pɛlɛɛ kɛ Refaitə ɲáɓoloonŋaa pɔ.

¹⁶ Davidə ə kɛ mąąkilɛ pələi, Filisti nuą di wɔ kɔ́ ɓuwui ta ə kɛ Bɛtleɛmə daai.

¹⁷ Davidə ə níiɓa hɛn ɉu hvɛli, yɛ kɛ diɛ: «Ɲálɔwai ŋɛ̨i Bɛtleɛmə daa kpala, gbɛɛ ɓə pai ɉu ya ta tɛɛi bɔ́, ŋą́ gbələ?»

¹⁸ Gɔkuláá haaɓai tii nɛɛ mą, di pili Filisti nuą di wɔ kɔ́ ɓuwui la, də li, ɲálɔwai ŋɛ̨i kɛ Bɛtleɛmə daa kpala, di da haɠa di paa la Davidə pɔ. Kɛlaa, hvo gɛ hvo da kpələ, ə bu nɔi ɓa, ə gulɔ Yai-Laa ɓa a haláá.

¹⁹ Yɛ mo woo ɓa: «Yai-Laa ə gíhíɓo gɛ́ li tɔɔi gɛ́ ɲái ŋɛ̨i kpələ; ɲái ŋɛ̨i hvo mɔ̨ɔ̨ a nuąi li ɉaɠai di ɲąmą, a diɛi niikpələ taa ləi ŋɛ̨i kulɔ?» Hvo gɛ hvo ɲái tii ta kpələ. Mɛ̨nįi gɔ́kuláá haaɓai tii di gɛ, yaa li.

²⁰ Ɉoabə nəɠə Avsai yaa kpɛli, ə kɛ a nu pow haaɓai nwun nąmu. Ya ɓə nwɔ kpalai pili yələi nu nwun ɉaaɓa mɛ̨i, ə di paa. Kɛlaa, naa hvo lɛɛ gɔkuláa haaɓai tii laa pɔ.

²¹ Di mąąwiɛ kpɔ kɛnɛ̨ ə tɛɛ la nu pow haaɓai tii ɓa, di gɛ a di nwun nąmu. Kɛlaa, nwɔ walawalalaa hvo həli gɔkuláa haaɓai tii pɔ.

²² Kulaa ta ə kɛ laa, diɛ kɛ non naa ɓa a: Yehoyada, yili nwɔ lon ma kɛ a Benaya. Gɛ mɛ̨nį tamąąi kɛ, ə kɛ a Kavseɛlə mun. Yaa tii ɓə Moabə hulɔnu Ariɛlə lon ɉinąą hveelɛ paa. Yaa tii ɓə nwɔ̨nɔ̨, yələ ta, a kwɛlɛ pai lɔwai, ə yɛɛ lɔwa ta hu ə yala paa laa.

²³ Yaa tii lɔ ɓə nwɔ̨nɔ̨ Eziptə mun da paa, yai kɛ a nu yee muhəɠɛɛ ta, kpala ə kɛ Eziptə mun tii yəi; nwɛi gbɔn mə kɛ ɲəi yɛ lɛɠɛ la Eziptə mun tii ɓa. Ə wolo mą, ə baa a gbɔwɔ kpalai tii kɛ ɲəi.

²⁴ Mɛ̨nįi Yehoyada lon Benayahu ə gɛ, yaa lii. Yaa kpɛli naa ə lɛɛ gɔkuláa pow haaɓai tii pɔ.

²⁵ Yaa kpɛli di mąąwiɛ kpɔ kɛnɛ̨, ə tɛɛ la guláa pow haaɓai ɓa. Kɛlaa nwɔ walawalalaa hvo həli gɔ́kuláá haɓai tii pɔ. Davidə ə gɛ a mąąkpɛ kuláá ta.

²⁶ Gɔlaɠa hu kuláá kpəɠiɛɛɠaa, diɛ ɓaa: Ɉoabə nəɠə Asahɛlə, Dodo lon Ɛlhanan, yai həɠə Bɛtleɛmə;

²⁷ Samotə Harɔrə mun, Hɛlɛsə Pelɔn mun;

²⁸ Ira Ikɛsə lon, Tekoa mun; Aviɛzɛrə Anatotə mun;

²⁹ Sibekai Husa mun; Ilai Ahoa mun;

³⁰ Marai Netofa mun; Helɛdə Baana lon Netofa mun;

³¹ Itai Rivai lon, Givea mun, a Bɛnɉamɛn lonnii taɠaa; Benaya Pireatɔn mun;

³² Hurai, yai Gaasə ya ɓoloonŋaa pɔ; Aviɛlə Arava mun;

³³ Azmawɛtə Baharumə mun; Ɛliaba Saalvɔn mun;

³⁴ Bene-Hasɛmə Gizɔn mun; Yonatan Sage lon, Hararə mun;

³⁵ Ahiamə Sakarə lon, Hararə mun; Elifalə Urə lon;

³⁶ Hefɛrə Mekera mun; Ahiya Pelɔn mun;

³⁷ Hɛsro Karmɛlə mun; Naarai Ɛzbai lon;

³⁸ Yoɛlə Natan nəɠə; Mivəharə Hagri lon;

³⁹ Sɛlɛkə Amɔn mun; Narai Berotə mun, yaa ɓə kɛ a Seruya lon Ɉoabə ŋą ɓíitiɛ̨;

⁴⁰ Ira Yitri mun; Garɛvə Yitri mun;

⁴¹ Uri Hɛtə mun; Alai lon Ɉavadə;

⁴² Adina Siza lon Rubɛn mun, yɛ ɓo a Rubɛn huwu nu kɛnɛ̨ ta, nu pow haaɓa ɓə kɛ ɲee mu;

⁴³ Hanan Maaka lon da Yosafatə Mitan mun;

⁴⁴ Uziya Astarotə mun, da Sama da Yeiɛlə Hotamə Aroɛrə mun lon;

⁴⁵ Yediaɛlə Simri lon, da nəɠə Yoha Tisi mun;

⁴⁶ Eliɛlə Mahawimə mun da, Yerivai da Yosawia Ɛlnaamə lonnii, da Yitma Moabə mun;

⁴⁷ Eliɛlə, Ovɛdə da Yaasiɛlə Sova nuą.