Kɔlɔnikɔ Maa-ŋuŋ 10 - Yálá laawoo hɛɓɛ (dc)

Davidə nwɔ heeɓo laa yələ Saulə haa mɛ̨nį

¹ Filisti nuą di kɔ́ pɛlɛ Israɛlə ɓa; Israɛlə nuą di pu Filisti nuą tɔwɔ, di mɔlɔ ɓɛlaa paa Gilboa yee ɓa.

² Filisti nuą di hvilɛn Saulə da nonnii di pulu. Di yee ə lɔ, di Saulə lonnii: Ɉonatan, Avinadavə da Malki-Sua di paa.

³ Gɔ ə wiɛ Saulə mɛ̨i: gilɛn bilinuą di gaa, di kaai ə mo, mąą ə kpɛlin.

⁴ Ya ɓə, Saulə a kɛ nwɔ ɓíítiɛ̨i ɓa: «'Ə́ wɔɔ ɓɔwai kulɔ daai, ə́ gbə́li paa, əgɛ, gɛ́nɛ̨ kpolɔwaɠaa ŋɛ̨i di hvo pa di nɔ̨nwɔ̨ lɔ mą́ą́.» Kɛlaa, nwɔ ɓíítiɛ̨i hvo gɛ, mąąhɔlɔɓo ə kɛi ɲɔw. Saulə yaa kpįnįi, ə mowa kwɛa həɠə ə lɔ ɲą.

⁵ Yii kɛa Saulə nwɔ ɓíítiɛ̨i ə gaa yɛ a haa, yaa kpɛlimąn ə gbɔwɔ lɔ mowa kwɛa ŋą, da yaa di haa.

⁶ Bələ ɓə Saulə da nonnii haaɓai bɛlɛɛ nwɔ ɓíítiɛ̨i ɓa, da Saulə nwɔ nuą kəlee di haa la a voló tɔ̨nɔ̨i tii.

⁷ Gaai di mo diɛ kɛ Israɛlə aa pu gɔ́ ɓa, ɛlɛɛ, Saulə da nonnii daa haa, Israɛlə nuą tii kɛ ɲɛɛ kɔ́wɔ pulu pələ, da yiiɠaai kɛ Ɉurdɛn pulu pələ, di kulɔ di wɔ taaɠaa hu, diɛ pu. Filisti nuą lɛa di pa di hee laa.

⁸ Mąą yələ laa ɓoɔ, Filisti nuą di pa nu powaɠaa mąą kpoloon mɛ̨nį ɓa, ya ɓə pai di mo, di Saulə da nonnii di kaa tooni Gilboa yee ɓa.

⁹ Di Saulə nwun dee ŋą, di mąąkpoloon, di nwɔ kɔ́ kɔ́ kwɛli hɛnŋąą həɠə, di mɛ̨nįi tii bələ taɠa taɠa Filisti lɔi hu, diɛ ɉukulɔ di wɔ haliɠaa kɔ́ pɛlɛ́ɠaa mu, da nɔi lonnii diɛ.

¹⁰ Di Saulə nwɔ kɔ-kɔ kwɛli hɛnŋąąi laa di wɔ hali pɛlɛ́i ta mu, di nwun ganin gbɔ̨n Dagɔn yəi bɛlɛ́n.

¹¹ Mɛ̨nįi Filisti nuą di naa Saulə ɓa, Yavɛsə-Galaadə nąą nuą di bələ mɛ̨n.

¹² Gɔkulaa wala-walaɠaai kɛ Yavɛsə, di pa, di Saulə da nonnii di powa həɠə, di li la Yavɛsə; di di kɔ́wɠaa loo Yavɛsə wulu kɛnɛ̨i mu. Yili pulu, di hín nɔ a hvóló mɛ̨ihveelɛ.

¹³ Saulə ə haa mąąhɔlɔɓo, nwooi da Yai-Laa di mo, hvo kɛ lɛɛ li bulu, mɛ̨nįi Yai-Laa ə mo mą, hvo bɔ mɛ̨nį kɛ li; ə lɛɛ, gɛ mɛ̨nį ə li tɔɔi, yɛ nwun dɔɔ a ɲąmuątaa tɔlikpɛ mun da,

¹⁴ Hvo kɛ li diɛ, Yai-Laa ɓə a nwɔ́ nwun dɔɔ kpɔlɔ. Yili mąą mɛ̨nį ɓə gɛ, yɛ haa, ə lɛɛ, heeɓo laa yɛ tɛɛ Ɉɛse lon Davidə pɔ.