Yosue 8 - BII BILA

Yosue tɛɛmbuu kobio Ai

¹ Mí Mɛlɛka dimul Yosue aa: «Siòòŋii bii nɔm te, vu n'dial te. Cua vanaa nɔmaa cɔwva kpow, mì la kɔ del kobio Ai coo a cɔwvo. Kani i cii kobi kalaa, masa ndɔɔ, vanaa ndɔa a lɛŋnde ndɔlen kpow malɔɔ nɔm o ba.

² Tosa a kobi kon a masa ndɔɔ mɛɛ n tosa a kobio Yeriko a á masa ndɔɔ yɛ. Kɛ, nɔm a vanaa nɔmaa cɔwva, la tiwba mì la cua ɲɛm niaa poondiaanin o cɔwvo-on a cɔlua vanaa kan. A bɛnda ma miinguu yaŋɔɔlen a makɔɔ le kobi kon delɔɔ coo.»

³ Mí Yosue can a vanaa ndɔa cɔwva kpow le kɔlan Ai delɔɔ coo a cɔwvo. Mó hɛli kuubaa cɔwva vaalan beleyaa, mó viam nda icɔllo.

⁴ Mó dimul nda aa: «La caa taw! La kɔ vionnun o kobio kɔɔli, la kɔa ndu levil te, mì la va a bɛɛndiannda le cɔwvo.

⁵ Ya a vanaa lonin nanu-a n koma kuelnin vanaa co o kobi kon nin-nda vakpa. Tuma nda fulanin le naa hinullo-o, n ɲaanun nda maa o tasendɔ.

⁶ A delnin naa kiltan kɔɔli, mì n nɛlanɛla nda háá mì n kɔɛ a nda lándán. Kani a vanin ko yiyanndo maa ɲaanɔnndo naa n co nda maa o tasendɔ ni.

⁷ O kon niaa koma fula niko a makɔɔ, la bii kobio, kani Mɛlɛka Hala niaa cii ndu malɔɔ niaa o ba.

⁸ Te la bii dɔ́ɔ́ kobio pɛ, la mal ndu yin mɛɛ Mɛlɛka dimi yɛ. Ɲɛ ya dimul niaa le tosaa-o co kon ni.»

⁹ Mí Yosue viam nda, má kɔa o fonda ndáà bɛnda le kɔlan mɛngɛlaa-o. Má cal Betɛl a Ai tɛɛn, Ai a ba paalen le del-lo. Icɔl kon, mí Yosue lɔl vanaa cɔvaa tɔ̀a ikɛi.

¹⁰ Diimandɔɔ idiiyo púŋ, mí Yosue can, mó mɛɛndian vanaa ndɔa cɔwva, mó sim nda laci nda kaasoŋaa kɔlkalua Israɛlla le kobio Ai kuello a cɔwvo.

¹¹ Mí vanaa cɔwva kpow a kɔa ndu kɔɔli. Mɛɛ nda tiiya Ai ciee-lekɔɔ, má kila dɔ́ɔ́ngɔ́ ndaa a ba luaŋ-ndo. Bóllo ndóò sɛi nda a kobio ni.

¹² Mí Yosue cua vannda vàálan tan ŋuɛɛnu, mó kɛsi nda mɛngɛlaa Betɛl a Ai tɛɛn, Ai a ba paalen le del-lo pɛɛn.

¹³ Mí vanaa cɔwva kila dɔ́ɔ́ngɔ́ɔ̀ o kobio a ba luaŋ-ndo, vanaa va mɛngɛlaa-a nda vannun a ba paalen le del-lo. Icɔl kon, mí Yosue toal o bóllo kɔllo.

¹⁴ Masaa Ai cɔu dɔ́ɔ́ Israɛlla idiiyo, mó can fɔ́ɔ́fɔ̀ a vanaa ndɔa cɔwva kpow le kɔlan nda cɔlɔbaa o fonda nda cɔlɔba nda o tasendɔ-o, a kpengii bóllo Araba. O ve bɛɛ sina maa vanaa celen va ndu mɛngɛlaa o kobio kɔɔli le.

¹⁵ Mí Yosue nda Israɛlla tɔ̀a ɲaanun nda, má kɔa a kpengii lɛŋnde veselɛilen.

¹⁶ Mí vannda dimul vanpiaandua va o kobio nin-nda kpow le ɲaanɔnndo nda kɔɔli. Má kuel Yosue, má mɛi kobio lándán.

¹⁷ Hali vanndo o pilɛ lo Ai ciee le, má mɛi kobio fondo, má ɲaanun Israɛlla kɔɔli.

¹⁸ O kon mí Mɛlɛka dimul Yosue aa: «Siɛndi bál co nɔm o ba-o kpengii Ai-e, kani i cii ndu malɔɔ nɔm o ba.» Mí Yosue siɛndi bál va ndu o ba-o a kpengii kobio.

¹⁹ Mɛɛ o siɛndi dɔ́ɔ́ baa, mí vanaa va mɛngɛlaa-a fula a kiltan nɛɛ nda va a viannannda-a, má luɛi ciee, má bii kobio, má loam ndu.

²⁰ Vannda Ai tofanndo kɔɔli, má ca kumnde o kobi ndaa coo, i va helɔɔ coocoo ningo-ningo. A sɔla lɛ nɛɛ-nɛɛ ɲaanan te, kani mí Israɛlaa va ɲaanɔnndo a kpengii lɛŋnde veselɛilen-nda mululan vanaa va nda kan tovɔɔ-a.

²¹ Mɛɛ Yosue nda Israɛlaa tɔ̀a ce maa vanaa va mɛngɛlaa-a bii kobio má mal ndu yin, má mulin, má kuel niko vannda Ai.

²² Mí vanaa lom kobio-a bɛɛ mal kobio, má kuel nda a cɔwvo, mí vannda Ai luɛi nda tɛɛn. Mí Israɛlla diw nda kpede. Vana pilɛ bɛɛ helun te, o pilɛ bɛɛ lo yoomu le.

²³ Fɔ masa va Ai lon-ndo daama nda mɛi yoomu ni má yoo Yosue ndu.

²⁴ Mɛɛ Israɛlla cii vannda Ai diw kpow o lɛŋnde veselɛilen nin nɛɛ ndáà ɲaanun nda kɔɔli-a, má muungu ciee, ma kɔ diw vanaa tɔ̀a a mɔɔn cɔwvon.

²⁵ Faw-faw, vannda vaalan tɔ́ a latiɔn vi ɲinkon Ai ni, vanpiaandua a vanlaandua pɛɛn.

²⁶ Háá mí vanaa kan Ai cuu vu, Yosue mingi ba ndóò bii kon bállo-o tuvɔɔ le.

²⁷ Mí Yosue nda Israɛlla biw cɔlua, má cɔwviaa ɲɛm va lon-ndon le nda pila mɛɛ Mɛlɛka ndóò dimul Yosue yɛ.

²⁸ Mí Yosue loam Ai, mó siinguu ndu ciee pɔmndo le lɔ́ɔ́-lɔ́ɔ̀, háá paalen nden vanaciee cel lɛ lon te.

²⁹ Mó landu masaa Ai o yɔmndo, mí vana vílɛ́i kon lo lon háá icɔllo. Paalen delɔɔ, mó dimi le ndu tuisio. Má kɔ mal ndu o dio kobio ikɛi, má dii powtan kunda bɛndoo ndu coo, powta lan la co vɔ lon háá paalen nden.

Yosue dimi sɛbɛ tɔŋndo o pembei Ebal coo

³⁰ O kon mí Yosue cɔaw fonda-loamaa-lasálàá le Mɛlɛka Hala Israɛlla o pembei Ebal coo.

³¹ Mo cɔaw ndu a powta ciliŋii valii pilan te lan. O fonda-loamaa-lasálà kon coo Israɛlla ndáà bɛnda le sálàla loamaalan a sálàla kɔlɲululan solio ni. Lende Moise vana baala Mɛlɛka-o ndóò dimul Israɛlla ni, sɔɔn mun co n'sɛvan o sɛbɛ tɔŋ Moise-o nin.

³² Mí Yosue sɛva tɔŋnda Moise ndóò yɔngu Israɛlla lan o powtan coo lon Israɛlla o hɔl.

³³ Mí Israɛlla kpow, vanaa kɔlkalua ndaa, simlacia ndaa, vanaa kialaa n'yamaa ndaa a mialaa va nda tɛɛn-nda sim vellaa-velle leviaa-solia-lasálàá o hɔl o kpengun kesu kpemaa. Mí Israɛlla táláá pilɛ va isisi a ba pembei Karisim, mí táláá pilɔɔ va isisi a ba pembei Ebal. Lende Moise vana baala Mɛlɛka-o dimi le tosaa le Israɛlla duaa dɔvɔɔ ni.

³⁴ O kon kɔɔli, mí Yosue dimi sɛbɛ tɔŋndo kpow, mó soaa a duaa a á dangaa o kɔɔ.

³⁵ Mó dimi sɛbɛ latɔŋ Moise-o kpow, o kɛ́-kɛ̀ o pɔɛɛnun te. Mó dimi lan Israɛlla kpow o hɔl: vanpiaandua, vanlaandua, cuaambɔa a mialaa va icali nda o bɛngu coo-a.