Yosue 6 - BII BILA

Israɛlla nɔla kobio Yeriko

¹ Diola luɛyaala va o kpaki va Yeriko balɔɔ lan la va lakindaa kpáŋ, yɔŋii Israɛlla ndáà luɛi lon, vanáà fula le, vanáà luei vɛlɛ le.

² Mí Mɛlɛka dimul Yosue aa: «Tofa vɔ, i mal kobio Yeriko, masa ndɔɔ a kuubaa cɔvaa co lon-nda nɔm o ba.

³ Niaa vanaa cɔwva kpow, la va kobio balɔɔ. Idii oo idii la bɛnda mì la balu ndu bɛmbɛ lepilɛ sɔ́, mì la tosa lende háá palɛi ndii ŋɔmpum.

⁴ Vanaa-solia-lasálàá nda ŋɔmmɛw a cuanin bulula hɔŋaalan tan ŋɔmmɛw o laba, mà va kɔlan kesu kpemaa laci. O paale ŋɔmmɛwndɔlen coo, la balu kobio bɛmbɛ leŋɔmmɛw, mì vanaa-solia-lasálàá nda nda va bululan hɔŋndo.

⁵ Lɔ́ɔ́ nda hɔŋnin buloo, mí la tuei bulu kon diom taw-taw-vo, vannda kpow a yonda yonda cɔwvo. O telen kon, kpaki kobio tɛɛndiaanin, mò del. O kon, vana-vana kɔɛ ndu pila o hɔl sanaa le cɔwvo.»

⁶ Mí Yosue, po Nun-ndo veelu vanaa-solia-lasálàá, mó dimul nda aa: «La siilun kesu kpemaa, mì vanaa ŋɔmmɛw o niaa tɛɛn cua bulula hɔŋaalan tan ŋɔmmɛw, leela saa kóndólan pɛɛn, mà sim kesu Mɛlɛka-o laci.»

⁷ O kon kɔɔli, mó dimul vanaa tɔ̀a aa: «La kɔ mì la balu kobio, mì vanaa nɔ ɲɛm cɔwvon o laba-a sim kesu Mɛlɛka-o laci.»

⁸ Mí vanaa-solia-lasálàá ŋɔmmɛwva cua bululan tan ŋɔmmɛw, leela saa kóndólan pɛɛn, má hiaw kesu kpemaa laci mɛɛ Yosue ndóò dimul vannda yɛ, má va lan hɔŋndo, mí kesu kpema Mɛlɛka-o va hunɔɔ nda kɔɔli.

⁹ Vanaa cɔvaa va laci-a va kɔlan vanaa-solia-lasálàá va bululan hɔŋndo-a laci. Vanaa cɔvaa va kɔɔli-a va kɔlan kesu kpemaa kɔɔli. Nda kpow va kɔlan, diom labuloo va sɔɛi.

¹⁰ Kɛ mí Yosue dimul vannda aa: «Vana-vana yonda yonda cɔw le, vana-vana heelu diom te, vana-vana solin isɔɔ-sɔɔ o sondo le. Paale ya dimulnin niaa le yonda cɔwvo len, la yonda ɲinkon kpélén le cɔwvo.»

¹¹ Má balu kobio lepilɛ sɔ́ a kesu kpema Mɛlɛka-o. O kon kɔɔli, má muungu, má kɔ lɔl o dɔ́ɔ́ngɔ́ nin.

¹² Diimandɔɔ idiiyo púŋ, mí Yosue can, mí vanaa-solia-lasálàá siilun kesu Mɛlɛka-o o lacongú.

¹³ Mí vanaa-solia-lasálàá ŋɔmmɛvaa va kɔlan a bulula leela saa kóndólan-nda hiaw kesu kpema Mɛlɛka-o laci a bulula ndalan hɔŋndo, mí vanaa cɔwva sim nda laci. A va kɔlan, mí bululan la va hɔŋnɔnndo a labɛɛla kpeekpei.

¹⁴ O paale diinndɔle len coo, má kɔ balu vɛlɛ kobio lepilɛ, má muungu o dɔ́ɔ́ngɔ́. Má tosa lende palɛi ndii ŋɔmpum.

¹⁵ Paale ŋɔmmɛwndɔlen, má can idiiyo púŋ, má balu kobio bɛmbɛ leŋɔmmɛw a tosaa mɛɛ ndáà dema tosa yɛ. Paale len daama nda balu kobio bɛmbɛ leŋɔmmɛw ni.

¹⁶ O bɛmbɛ ŋɔmmɛwndɔɔ, mí vanaa-solia-lasálàá hɔŋ bululan, mí Yosue dimul vannda aa: «La yonda le cɔwvo, kani Mɛlɛka cii kobio ho malɔɔ niaa o ba.

¹⁷ Kobio a ɲɛm co lenin-ndon kpow n siŋnunnin teengen le Mɛlɛka. Fɔ Rahab vanalanɔ suundɛiyo a vanaa co o ndu lo cɛinin-nda kínɛí lonin yoomu ni, kani ndu ven suansuaŋaa naa n vem-nda ni.

¹⁸ Kɛ la mandan a ɲɛm co o tanaa bɛngu-on, te la cua ɲɛm niaa bɛnda le cua loon pɛ, n kuunan naa-on pɛɛn, mɛɛ dɛnɛ palaa bɛndoo toalnin Israɛlla coo o dɔ́ɔ́ngɔ́ ndaa nin le ken.

¹⁹ Volion, sianion, ɲɛm toosian a daɲan-ndon a n toosian a cilinndon-ndon kpow n siŋnunnin teengen le Mɛlɛka, mun luɛinin o bolofaa Mɛlɛka-o nin.»

²⁰ Mɛɛ vannda yonda yonda cɔwvo, mí bululan la hɔŋnun, mí kpakio komba. Fɔ́ɔ́fɔ̀, mí vana-vana kɔa ndu pila laci sanaa, mí Israɛlla luɛi ciee, má kɔ bii kobio.

²¹ Má diw vanaa va o kobi kon nin-nda kpow, vanpiaandua a vanlaandua, cɛlɛkpɛa a vanaa yuuvɛiya. Má diw vɛlɛ nawva, saa a sofɛlɛa.

Yosue ciindiaa Rahab

²² Mí Yosue dimul langbaa ŋiɔŋaa kɔ mɛɛndian lɛŋnde len-nda aa: «La kɔ o Rahab vanalanɔ suundɛiyo lo cɛinin, mì la kɔ soli ndu a vanaa co o ndu lo cɛinin-nda mɛɛ niaa mɛnalan ndu yɛ.»

²³ Mí langbaa felengia suansuaŋaa kan kɔa, má kɔ soli Rahab pila, fuɲa ndɔ, kala ndɔ, puapilɛa ndɔa, yungu ndɔɔ a vanayan ndɔn kpow. Má kɔ kɛsi nda fɛɛ o dɔ́ɔ́ngɔ́ Israɛlla kɔɔli.

²⁴ Má loam kobio a ɲɛm va lenin-ndon kpow, fɔ volion, sianion, ɲɛm toosian a daɲan-ndon a n nda toosiaa a cilinndon-ndon-ndon nda mɛi le kɛsio o bolofaa va o Cɛi-Mɛlɛka-o nin-ndo coo ni.

²⁵ Mí Yosue mɛi Rahab vanalanɔ suundɛiyo, vanaa ndɔa a yungu ndɔɔ kpow yoomu. Mí Rahab cal Israɛlla tɛɛn le vionɔɔ ndóò ven suansuaŋaa Yosue ndóò vem le Yeriko mɛɛndianndo-a-o. Háá paalen nden, cuavaa ndɔa imamaa co vɔ icali Israɛlla tɛɛn.

²⁶ O telen kon nin, mí Yosue mɛnan, mó dimi aa: «Màá Mɛlɛka tuisi dangaa vana kon coo, vana cannin le kobio Yeriko mingio tangullo-o! Màá po ndɔ tasoo vu telen o co ndu kandɔɔ kilaa-o, mì po ndɔ mɛɛlaa vi telen o co ndu cɔnɔn koŋndan lueiyo-o!»

²⁷ Mɛlɛka va Yosue ikɛi, mí Yosue fula tɔ́ɔ́ o lɛŋnden kpow coo.