Yosue 4 - BII BILA

Powta tɔ́ a latiɔnnda loonanndan

¹ Telen vannda kpow cii Yurdɛn taŋɔɔ-o, mí Mɛlɛka dimul Yosue aa:

² «La hɛli vanpiaandua tɔ́ a à ŋiɔn o vannda tɛɛn, o pilɛ o lepola oo lepola coo,

³ mì la dimul nda ma cɔwviaa powtan tɔ́ a latiɔn o fonda vanaa-solia-lasálàá va isisi Yurdɛn o peo kɔllo-o, mà kɔɛ a lan, mà kɔ kɛsi lan nɛɛ niaa lɔlnin-nda.»

⁴ O kon, mí Yosue veelu vanpiaandua tɔ́ a à ŋiɔŋaa ndóò hɛli kan o Israɛlla tɛɛn o lepola oo lepola coo vana pilɛ-a,

⁵ mó dimul nda aa: «La hiow kesu Mɛlɛka Hala niaa laci, mì la tol Yurdɛn o peo kɔllo, mì vana-vana o niaa tɛɛn siilun powvo o pilɛ o congú, mì powta lan la va mɛɛ polama Israɛlla ma co sɛ́lɛ́ yɛ.

⁶ Lan la vanin tɔɔmaseloo le niaa ni. O kon, te poaa niaa ɲuna niaa siɔdii laci pɛ aa: ‹Kɔlɔ yɛɛ powtan ndan la nɔ yɛ le niaa?›

⁷ La mulul nda aa: ‹Lɔ́ɔ́ kesu kpema Mɛlɛka-o va Yurdɛn taŋɔɔ-o, mí mɛnndan ma kiolu tɛɛn ndu laci, mí ma sɛyan. Powtan ndan la co ɲɛ loonanndo le Israɛlla le fɛɛn a fɛɛn ni.›»

⁸ Mí Israɛlla tosa ɲɛ Yosue dimul nda-o. Má soli powtan tɔ́ a latiɔn Yurdɛn o peo kɔllo, lepola oo lepola powvo o pilɛ, maa mɛɛ Mɛlɛka ndóò dimul Yosue yɛ. O kon, má taŋ a powta lan, má kɔ kɛsi lan o fonda ndáà bɛnda le lɔan-ndo.

⁹ Mí Yosue dii vɛlɛ powtan tɔ́ a latiɔn kundaa o peo kɔllo, nɛɛ vanaa-solia-lasálàá vá kɔlan a kesu kpemaa-a ndáà kɛsi pelon-nda. Háá paalen nden, powta lan la co vɔ o fonda kon.

¹⁰ Mí vanaa-solia-lasálàá vá kɔlan a kesu kpemaa-a lo isisi o pee kɔ́llo lon háá mí vannda cii ɲɛ Mɛlɛka ndóò dimul Yosue le vannda tɛɛngullo-o tosa, maa mɛɛ Moise ndóò dimul Yosue yɛ. O kon kɔɔli, mí vannda keleŋa taŋɔɔ cɔ́-cɔ́.

¹¹ Lɔ́ɔ́ nda cii taŋɔɔ kpow-vo, mí vanaa-solia-lasálàá hiaw nda laci a kesu kpemaa.

¹² Mí vanaa fula o polale Rubɛn-nden nin-nda, a fula o polale Kad len nin-nda a á fula o polale tálále Manase len nin-nda bɛɛndian bɛɛndian cɔwvo, má hiaw Israɛlaa tɔ̀a laci maa mɛɛ Moise ndóò dimul nda yɛ.

¹³ Mí vanaa cɔwva vaalan belehiɔɔlu a hiaw Mɛlɛka o hɔl a ɲɛm cɔwvon o laba le cɔwvo tosaa a kpengii dɛngbɔɔ Yeriko.

¹⁴ Paale len, mí Mɛlɛka kundiaa Yosue Israɛlla kpow o hɔl, má ke ndu bɛɛlen o palɛi o tosa yoomu-e kpow nin maa mɛɛ ndáà ke Moise bɛɛlen yɛ.

¹⁵ O kon kɔɔli, mí Mɛlɛka dimul Yosue aa:

¹⁶ «Dimul vanaa-solia-lasálàá co kɔlan a kesu kpemaa-a mà faŋan Yurdɛn o peelo, mà hel o kɔngɔ.»

¹⁷ Mí Yosue dimul nda aa: «La hel o kɔngɔ.»

¹⁸ Vanaa-solia-lasálàá kesu kpemaa va o lacongú-a solio dɔ́ɔ́ pelon o peelo le helɔɔ o kɔngɔ, mí mɛnndan Yurdɛn ma muungu o fonda ndɔɔ, mí ma muungu hiovɔɔ mɛɛ máà dema hiovɔɔ yɛ.

¹⁹ Paangii tasei va malɔ tɔ́, mí Israɛlla faŋan Yurdɛn, má kɔ kila caltan Kilkal, o pɛɛngulan Yeriko a ba paalen le can-ndo.

²⁰ Mí Yosue dii powta ndáà soli lan Yurdɛn o peelo lan bémboo Kilkal.

²¹ O kon kɔɔli, mó dimul Israɛlla aa: «Te poaa niaa ɲuna pɛ niaa siɔdii laci aa: ‹Kɔlɔ yɛɛ powtan ndan la nɔ yɛ le niaa?›

²² La tɛɛsial nda aa: ‹Sindɛ, mí Israɛlla taŋ Yurdɛn niaa co hoo cɔu-vo a pelon n'vesɛi sɛ́ɛ́n.›

²³ Kani Mɛlɛka Hala niaa veesiaa pee kalaa niaa laci, háá mí la cuu taŋɔɔ kpow mɛɛ o tosa lɔ́ɔ́ kon a mɛmma ihɛlma makpɛ̀ndɛ̀an yɛ, ma o veesiaa naa laci háá mí n cuu taŋɔɔ-an pɛɛn.

²⁴ O tosa kon, haliko mi vannda o lɛŋnden kpow coo a sina mɛɛ o nɔ kpaayaa yɛ, mì siòònde bii nda a ndu Mɛlɛka Hala niaa le lɔ́ɔ́-lɔ́ɔ̀.»