Yosue 24 - BII BILA

Israɛlla cuungian Sikɛm má yii kpemaa a Mɛlɛka

¹ Mí Yosue veelu Israɛlla kpow Sikɛm, mɛɛ nda va a polama ndan yɛ́-yɛ́ yɛ, kaasoŋaa kɔlkalua Israɛlla, simlacia ndaa, vanaa kialaa n'yamaa ndaa a vanaa ndaa sɛvaa, mí nda kpede a sim Hala o hɔl.

² Mí Yosue dimul sɛ́lɛ́ Israɛlla kpow aa: «Nuaa Mɛlɛka Hala Israɛlla dimi ni aa: ‹Sindɛ, o peo Efrate leeloo fuɲaa niaa mamaa va icali ni. Lon Tera fuɲa velu Abraham nda Nahɔr-o va icali ni, lon nda va halaa celen sooloo ni.

³ Mí faŋa Abraham fuɲa niaa mama nɛɛ o va icali peo leeloo-a, mí yaa ndu o lɛŋnde Kanaan-nden nin, mí keeliaa ndu lenin kpow, mí soli cuawva sɛ́lɛ́ bɛndoo ndu o ipulu, mí yɔngu ndu Isaak.

⁴ Mí yɔngu Isaak poaa nda ŋiɔn: Yakɔb nda Esau, mí yɔngu Esau fonda calaa o tàndá n'pemboo Seir nin, kɛ mí Yakɔb nda poaa ndɔa nda tuusun Esipte.

⁵ O kon kɔɔli, mí viam Moise nda Aarɔn, mí tuisi Esiptea sangalan coo a dɛnnda kɔndɔfilta ya tosa nda tɛɛn-nda. O kon kɔɔli, mí soli niaa Esipte.

⁶ Mí soli fuɲaa niaa mamaa Esipte. Mɛɛ nda tiiya o mɛmma ihɛlma makpɛ̀ndɛ̀an, mí Esiptea kuel nda a ɲɛla ɲaanannda soa nan-ndan a á vanaa ɲaanun o soa coo-a háá lon.

⁷ Mí fuɲaa niaa mamaa mɛli yeelan o ya Mɛlɛka lo haliko mi mala nda. Mí tuisi ɲumma bɛnduan Esiptea a niaa tɛɛn, mí mingi vɛlɛ mɛmma ihɛllan nda coo, mí nda kpow a cuu lenin. Niaa pila ce ɲɛ-ɲɛ ya tosal Esiptea. O kon kɔɔli, mí la viaw taw o lɛŋnde veselɛilen nin.

⁸ Hiovɔɔ o kon coo, mí yaa niaa Yurdɛn leeloo o lɛŋnde Amoriia va icali nin-nden nin. Mí Amoriaa kan kɔ simul niaa a cɔwvo, kɛ mí mal nda niaa o ba, mí la hialu lɛŋnde ndalen.

⁹ Mí Balak, po Sipɔr-o, ó va masaa Moab-o ndu can le Israɛlla delɔɔ coo a cɔwvo, mó viam kilaa le Balaam po Beɔr-o veeloo le hunɔɔ niaa dangaa dɔvɔɔ.

¹⁰ Kɛ, i yeŋ Balaam lani le, mó muungu nda duaa dɔvɔɔ. Nuaa ya soli niaa Balak o ba ni.

¹¹ O kon mí la taŋ peo Yurdɛn, mí la tiiya Yeriko, mí Yerikoa, Amoriia, Perisiia, Kanannda, Hitiia, Kirkasiia, Hiviia a Yebusiia kpow a ciŋilan niaa a cɔwvo. Kɛ mí mal nda niaa o ba.

¹² Mí viam sunbungaa niaa laci, má toaw masaa ŋiɔŋaa Amoriia. O ve a mɔɛi cɔw le, o ve vɛlɛ a kpaasiaa le niaa tow nda le.

¹³ Mí yɔngu niaa lɛŋnden, le niaa sanga le len te len, a kobilan la niaa tengul te lan, nduyɛ la co icali lenin. Mí yɔngu niaa nakɔla n'rɛsɛnndan a nakɔla olivieelan, la niaa tol te lan, nduyɛ la co ɲɛm mun dioo.›»

¹⁴ Mí Yosue dimul nda aa: «O laan, siòòŋii Mɛlɛka-e va niaa, mì la tosal ndu baalaa a kɔlta niaalan kpede, mì la lo o lediom coo a ndu. La mal halaa fuɲaa niaa mamaa va biiloo peo leeloo-a, halaa Esiptea pɛɛn, mì la tosal Mɛlɛka baalaa.

¹⁵ Te ɲɔɔ hɛnan yɛ niaa le Mɛlɛka baalaa tosallo le, mɛɛ la hɛli hau vana niaa yeema le baalaa tosallo-o, o va halaa fuɲaa niaa mamaa ndáà sooluu paandu peo leeloo-a, o va halaa Amoriaa niaa co icali o lɛŋnde ndalen nin-nda co sooloo-a. Kɛ ya a yungu nuu, Mɛlɛka naa n vanin baalaa tosallo ni.»

¹⁶ Mí vannda muli aa: «Kɛì-kɛì bɛɛ! N melnin Mɛlɛka mì n tosal halaa celen baalaa le.

¹⁷ Kani Mɛlɛka co Hala naa ni. Ndu soli naa a fuɲaa naa o cɛlen nin Esipte ni. Ndu koni tosa dɛnnda kɔndɔfilta bɛndula naa n ce lan ni. Ndu kanda naa o tiŋ vilɛi naa n kei nin-ndo nin a á vanaa naa n kei tɛɛn-nda kpow ni.

¹⁸ Mɛlɛka tow vanaa kan kpow naa laci ni, kɛ taama-taama Amoriaa va icali o lɛŋnde len nin-nda. Lelan, naa bɛɛ, Mɛlɛka naa n vanin baalaa tosallo ni, kani ndu co Hala naa ni.»

¹⁹ O kon kɔɔli, mí Yosue mulul nda aa: «La nɔlanin Mɛlɛka baalaa tosal te, kani Hala diandaa o co ni, Hala paŋalaa o co ni, o melnin nila kalula niaalan a hakila niaalan haki le.

²⁰ Te la mal ndu pɛ, mì la sooluu halaa celen, o mululunnin niaa, mò saangiaa niaa, mò diw niaa.»

²¹ Mí vannda mulul Yosue aa: «Ɛ-ɛ, Mɛlɛka naa vanin baalaa tosallo ni.»

²² Mí Yosue ɲuna nda aa: «Vɛ̀ɛ̀ niaa pila le co seiya maa la hɛli Mɛlɛka le ndu baalaa tosallo le?» Má mulul ndu aa: «Oi, naa pila n co seiya ni.»

²³ Mí Yosue dimul nda aa: «Te lende ni, mɛɛ la mal halaa celeŋaa co niaa tɛɛn-nda, mì la biilu Mɛlɛka Hala niaa a kɔlta niaalan kpede.»

²⁴ Mí vannda dimul Yosue aa: «Mɛlɛka Hala naa naa vanin baalaa tosallo ni, n vanin diom ndɔɔ biyɔɔ.»

²⁵ Paale len, mí Yosue yii kpemaa Sikɛm a Israɛlla, mó yɔngu nda tɔŋndan a silalan.

²⁶ Mí Yosue sɛva sɔɔn mun o sɛbɛ tɔŋ Hala-o nin. O kon kɔɔli, mó cua pow bɛndoo, mó simi ndu o yálán bɛndu va lon-ndo bɛngu. Yɔm va o cɛi-kola-toandaa diandaa Mɛlɛka-o ikɛi-yo.

²⁷ O kon mó dimul nda kpow aa: «La tofa vɔ, powvo ho co seiyo le naa ni, kani o tuei sɔɔn Mɛlɛka dimul naa-on kpow. Ndu vanin seiyo le niaa ni, yɔŋii niaa mulul Hala niaa kɔɔ.»

²⁸ O sɔɔn mún kɔɔli, mí Yosue mal nda, mí vana-vana muungu o lɛŋnde o sɔla kɛ́ɔ len nin.

Piɔ́m Yosue-o

²⁹ Sɔɔn mún cuvɔɔ kpede, mí Yosue po Nun-ndo, vana baala Mɛlɛka-o vu. Vɔsilan kɛmɛ a tɔ́ ndóò nɔ ni mó sɔla piɔ́mndo.

³⁰ Má kumbu ndu Timnat-Sera o lɛŋnde ndóò sɔla kɛ́ɔ len coo, o tàndá n'pembu Efraim-ndo nin, o pembei Kaas a maluaŋ.

³¹ Israɛlla va Mɛlɛka baalaa tosallo telen Yosue va yoomu-o kpow a telen kaasoŋaa koma lo yoomu Yosue kɔɔli-a va icali-o kpow, kaasoŋaa síná dɛnnda Mɛlɛka tosa le Israɛlla kpow lan-nda pɛɛn.

³² Sikɛm lon nda kumbu paala Yosɛf la ndáà fula Esipte mí ndáà hun a lan-ndan ni. O lɛŋnde Yakɔb ndóò pendu a volin latámán kɛmɛ poaa Hamɔr-a o ba len coo, Hamɔr soli Sikɛm-ndo pɛɛn. Mí lɛŋnde len le siŋnun kɛ́ poaa polale Yosɛf len.

³³ Eleasar, po Aarɔn-ndo vuo, má kumbu ndu Kibea, o kobi Pineas po ndɔ ndóò sɔla o tàndá n'pembu Efraim-ndo nin-ndo nin.