Yosue 23 - BII BILA

Sɔɔn mɛɛlan Yosue dimul simlacia-on

¹ Tuma Mɛlɛka cii Israɛlla pɛngio yɔngu yaamɔaa ndaa balu nda-a tɛɛn-ndo, mí vɔsila bɔɔ-bɔɔ la hiaw o kon kɔɔli, a vannun o kɔlɲuloo nin. Mí Yosue yuuva kudɛɛ-kudɛɛ, ndóò nɔ nin vɔsilan taw,

² mó veelu Israɛlla kpow: kaasoŋaa kɔlkalua ndaa, simlacia ndaa, vanaa kialaa n'yamaa ndaa a vanaa sɛvaa ndaa, mó dimul nda aa: «I yuuva nin taw, vɔsila nilan la co nin labɔɔ.

³ Niaa pila ce ɲɛ-ɲɛ Mɛlɛka Hala niaa tosa a lɛŋnde he le niaa, kani ndu pila va cɔlɔbaa le niaa ni.

⁴ La yiyan-ndɔ mɛɛ ya yɔngu niaa lɛŋii ken kɛ́ɔ o siondei malɔɔ mɛɛ polama niaan ma va yɛ́-yɛ́ yɛ. Kandɔɔ Yurdɛn o peelo kɔ bii háá o mɛmma ihɛlma bɛnduan a ba paalen le del-lo, lɛŋii ya handu baa coo-e a i ya hendu vɔ ba coo lei kpow i co nin le niaa.

⁵ Mɛlɛka Hala niaa pila toawnin vanaa co o lɛŋii ken nin-nda, mò faŋa nda o fondala ndalan niaa laci, mì lɛŋii ken siŋnun lɛŋii niaa mɛɛ ndu pila ndóò yiilu niaa kpemaa yɛ.

⁶ Kɛ nduyɛ, la bii sɔɔn co n'sɛvaa o sɛbɛ tɔŋ Moise-o nin-ndon kpáŋ, mì la kela lecoo. La sei o ba kɛndɛ coo le, la sei o ba mɛl coo le.

⁷ La mɔ́sɔŋàn a vanaa-mangalaa-isɔaa lo vɔ kan icali niaa tɛɛn-nda le. La pial diola halaa ndaa le, la mɛnan o diola ndalan te, la sooluu nda le, la baŋ vulan nda o labɛngunin te.

⁸ Kɛ la lo o diomnden coo a Mɛlɛka Hala niaa, mɛɛ niaa co tosaa háá hau yɛ.

⁹ Mɛlɛka faŋa vanaa-mangalaa-isɔaa co haa sɛ́lɛ́ bɛndoo má nɔ kpaayaa taw-va niaa laci ni. Háá hau, vana-vana nɔla vɔ niaa simullo le.

¹⁰ Vana pilɛ kpé o niaa tɛɛn tiwba mò tow n'van vàá pilɛ. Kani Mɛlɛka Hala niaa co cɔlɔbaa le niaa mɛɛ o yiilu niaa kpemaa yɛ.

¹¹ Lelan, la caa taw le niaa pila, mì la kaola Mɛlɛka Hala niaa.

¹² Kɛ te la mulul ndu pɛ kɔɔ mì la mɔsɔŋan a vanaa-mangalaa-isɔaa celeŋaa co niaa tɛɛn-nda, te nɔlan la luɛì pɛ niaa tɛɛn niaa ndaa, mì la cal niaa ndaa latulu,

¹³ mɛɛ la sina niko maa Mɛlɛka Hala niaa hiw lɛnin laci a vanaa kan tovɔɔ niaa laci le. Kɛ a siŋnunnin maa yala toandaa, maa yaŋɔɔle miinguaa le niaa, a siŋnunnin maa lesiondoo le niaa lungbon lɔɔ, te kon te maa n'yɔɔ le niaa hɔltan hovihovio, háá mì la cuu o lɛŋnde kɛndɛle Mɛlɛka Hala niaa yɔngu niaa len-nden coo.

¹⁴ La tofa vɔ, ya Yosue, i co hau hunɔɔ faŋan o ceendo ho coo. Kɛ niaa, la sina o kɔlta niaalan kpow nin a o yoomu niaa kpow nin maa sɔɔn kɛndɛn Mɛlɛka Hala niaa ndóò dimi le niaa-on kpow, i pilɛ bɛɛ i ló le kɛɔ peelɔnndo le.

¹⁵ Nduyɛ, maa mɛɛ Mɛlɛka Hala niaa peelu kpemala kɛndɛla ndóò yiilu niaa lan yɛ, lende koni o peelunin dɛnnda palaala o kɔngɔlan le niaa tuisio coo lan ni, háá mì la hun cuu itambu o lɛŋnde kɛndɛle o yɔngu niaa len coo.

¹⁶ Te la tɛɛmbuu pɛ kpema Mɛlɛka Hala niaa yiilu niaa-o, mì la beŋ halaa celennda vulan le nda sooloo, mɛɛ kɔltuw Mɛlɛka-o tamalanin le tolɔɔ niaa coo le, o kon la cuunin o lɛŋnde kɛndɛle o ke niaa len coo kpow.»