Yosue 20 - BII BILA

Kobila va le vionnɔnndo lenin-ndan

¹ Mí Mɛlɛka soaa o Yosue lo, mó dimul ndu aa:

² «Soo o Israɛlla lo mà dimul nda aa: ‹La hɛli kobilan le vannda vaa vionnɔnndo lenin maa mɛɛ yáà dimul Moise yɛ.

³ Te sulalle fula pɛ vanndo o ba, mo dii vanacieo, vana kon ɲaanun, o kɔ vionnun o kobila lan o pilɛ nin. O kon, o hɛlun vana bɛnda le màá mingio le vana o dii-yo-o.

⁴ Vana dii kon vanndo-o ɲaanun pɛ mò tiiya le luɛyɔɔ o kobi kon nin, o sim o dio luɛyaa kobio, o downun kaasoŋaa kɔlkalua kobi-a kona a dɛnɛ komal ndu-o o kɔɔ, nda sɛɛna ndu, a ke ndu yiyaa, o cal ciee lon.

⁵ Te vana yeema le màá mingio-o kuel ndu pɛ, vanaa co o kobi kon nin-nda cɛl lɛ mà mal vana dii kon vanndo-o ndu o ba le. Kani kpundɔɔ fula ndu o ba mó dii vana kon ni, o co nɛyɔn te ndóò nɔ a ndu le.

⁶ O bɛnda mò lo o kobi kon nin háá mì vannda kelu yamɛi ndɔɛi, háá mì vana co bolle vanaa-solia-lasálàá le telen kon-ndo vi. O kon kɔɔli, o tiwba mò muungu niko o ndu lo, o kobi ndóò faŋan nin-ndo nin pɛɛn.›»

⁷ Le hee, mí Israɛlla hɛli kobio Kedɛs o tàndá Kalile-o nin, o lɛŋnde n'pembule polale Nɛftali len le sɔla len nin, má hɛli vɛlɛ kobio Sikɛm, o tàndá n'pembu Efraim-ndo nin a kobio Kiriat-Arba (o ndáà veelu vɛlɛ aa Hebrɔn-ndo), o co o tàndá n'pemboo Yuda nin-ndo.

⁸ Yurdɛn leeloo, Yeriko a ba paalen le can-ndo, má hɛli kobio Besɛr o lɛŋnde veselɛilen nin, o dɛɛla co o tàndá Rubɛn-ndo nin-ndo nin, kobio Ramɔt va o tàndá Kalaad-o nin o lɛŋnde polale Kad len nin-ndo, a kobio Kolan o lɛŋnde Basan-nden nin, o tàndá Manase-o nin.

⁹ Kobila lan láà hɛlin le Israɛlla kpow a le mialaa va nda icali tɛɛn-nda ni, haliko vana-vana sulalle ndíì fula pɛ o ba, mì ndóò dii vanacieo, vana kon ndóò kɔ vionnun ndon háá mì yamɛi ndɔɛi ndíì kiolu, yɔŋii ndáà dii ndu o màá mingio.