Yosue 2 - BII BILA

Yosue vem suansuaanda Yeriko

¹ A lo Sitim, mí Yosue, po Nun-ndo viam langbaa pum nda ŋiɔn o vionnɔnndo nin, le kɔlan lɛŋnden a kobio Yeriko fɛfɛlaa. Ndáà kɔlan, má kɔ luɛi o yiya o vanalanɔ suundɛiyo pum ndo cɛinin, diolan ndu Rahab. Má lɔl lon.

² Mí vannda kɔ dimul masaa Yeriko aa: «Poaa Israɛlla pum hin cɔɛllɛn nanu le lɛŋnden fɛfɛlaa.»

³ O kon, mí masaa Yeriko viam vanndo o Rahab lo le ndu kɔlan dimullo aa: «Soli langbaa hun luɛi o yiya o nɔm ndo cɛinin-nda, kani le lɛŋnde naalen kpow fɛfɛlaa nda hin ni.»

⁴ Mí Rahab cua langbaa ŋiɔŋaa kalaa, mó vian nda kpíŋ. Mó kɔ muli aa: «I co toɲa, langbaa pum ndáà hin o ya lo, kɛ i sina nɛɛ nda cɛn te.

⁵ A paale delaalen, telen nda va dio kobio kindaa-o nda fulan ni. I sina ba-ba nda kɔɛ le. La diom ndɔ nda haw a kiltan, la co nda bendal.»

⁶ Nduyɛ, o konda ndóò heelu nda ni, mó vian nda o bɛngula lefunnda ndóò kɛsi lon-ndan bɛngu.

⁷ Mí vanaa masaa vem kan-nda can ɲaanɔnndo nda kɔɔli. Mɛɛ nda fula, mí vannda koma mingi dio kobio kinda, má kɔa nda nuwviaa háá o nɛi kɔɛ a peo Yurdɛn-ndo, nɛɛ mɛnndan ma yingila le-a.

⁸ Lɔ́ɔ́ pá nda hini, mí Rahab hel nɛɛ nda va o konda-a,

⁹ mó kɔ dimul nda aa: «I sina maa Mɛlɛka cii niaa lɛŋnden nden ke. A siòòŋii niɛi kínɛí naa vanaa co o lɛŋnden nden nin-nda n cal nuaa ni. Diallon n vi vana-vana a niaa.

¹⁰ Kani n tuei mɛɛ Mɛlɛka veesiaa mɛmma ihɛlma makpɛ̀ndɛ̀an niaa laci lɔ́ɔ́ niaa va fulaa Esipte-o yɛ, n tuei vɛlɛ ɲɛ niaa tosa a masaa ŋiɔŋaa Amoriaa va Yurdɛn leeloo-a-o, Sihon nda Ɔk pɛɛn, a niaa tɛɛmbuu-a.

¹¹ Kabi naa n tuei sɔɔn mun, mí kɔlta naalan la laasian, nduyɛ vana-vana nɔ lɛ mayoomu le niaa simullo le. Kani Mɛlɛka Hala niaa co Hala co coocoo o halataala, a lɛŋ o ceendo coo-o ni.

¹² Lelan, yandi, la mɛnalan ya sunsun o diola Mɛlɛka lan maa la tosalnin yungu fuɲa nuu dɛnɛ kɛndɔɔ mɛɛ ya tosal niaa dɛnɛ kɛndɔɔ yɛ, la yɔngu ya vɛlɛ tɔɔmasele kpeekpeiyo.

¹³ La yiilul-la kpemaa maa la diinin fuɲa nuu, kala nuu, puapilɛa nia a vanaa co nda o ba bɛngu-a le, nduyɛ maa la mɛinin naa yoomu.»

¹⁴ Mí vanpiaandua kan mulul Rahab aa: «N co a bɛɛndiannda le vuo le niaa, te la cɔɔmuu tuu naa le. Lɔ́ɔ́ Mɛlɛka malnin lɛŋnden nden naa o ba-o, n lonin o lediom coo mì n tosal nɔm dɛnɛ kɛndɔɔ.»

¹⁵ O kon kɔɔli, mí Rahab tuisi nda a yoei o dio-pɔmbɔɔ, kani o kpaki kobio nin cɛi ndɔɔ va ni.

¹⁶ Mí Rahab dimul nda aa: «La kɔ a ba pembon, yɔŋii vanaa co niaa nuwviaa-a saalun niaa. La kɔ vionnun ndon o palɛi ndii yáá bɛngu háá mì vanaa co niaa nuwviaa-a muungu. O kon la tiwba niko mì la bii nɛiyo le kɔnndan.»

¹⁷ Mí vanpiaandua kan mulul ndu aa: «Tofa vɔ mɛɛ naa n peelunin kpemala n vem naa cuaa lan yɛ:

¹⁸ lɔ́ɔ́ naa n tiiyanin o lɛŋnde nɔmnden nin-ndo, a yii yoole kolale siaŋalen o dio-pɔmbɔ n co naa hoo tuisio-o, o kon kɔɔli a mɔɔsiaa fuɲa nɔm, kala nɔm, puapilɛa nɔmnda a yungu nɔmndo kpow o nɔm ndo cɛinin.

¹⁹ Vana-vana fula pɛ o nɔm ndo cɛinin le kɔlan o bɛ́ɛ̀, mɛɛ ndu pila nuwviaa piɔ́m ndɔɔ ni, naa n sɔlanin yaala le. Kɛ vana-vana lo pɛ o nɔm ndo cɛinin mi n yɔŋ ndu ɲɛ, mɛɛ kooma vana kon ma delnin naa o lebol.

²⁰ Kɛ nduyɛ, te o va pɛ ma cɔɔmuu dɛnɛ naa, naa bɛɛ n nɔnin yaala le kpemala n vem naa cuaa lan kɛɔ peeloo le.»

²¹ Mí Rahab mulul nda aa: «Màá i yɔŋnun mɛɛ niaa dimi yɛ!» O kon, mó mal poaa ŋiɔŋaa kan, má kɔannun. Mó yii yoole siaŋale kolalen o dio-pɔmbɔ cɛi ndɔɔ.

Suansuaanda muungu Yosue o ibuŋ

²² Ndáà biyɔɔ nɛiyo le kɔnndan, má tiiya o pembei, má lo lon palɛi ndii yáá, háá lɔ́ɔ́ vanaa va nda nuwviaa-a muungu-o. Mí vanaa va nda kan kɔlan kɔɔli-a nuwviaa nda taw o nɛilan kpow coo, kɛ a ci nda le.

²³ O kon mí langbaa ŋiɔŋaa kan toal pembei, má taŋ peo Yurdɛn. Má muungu Yosue po Nun-ndo o ibuŋ, má downun ndu kona a ɲɛ-ɲɛ kei nda coo.

²⁴ Má dimul ndu aa: «Mɛlɛka cii naa lɛŋnden nden kpow malɔɔ o ba, vanaa co o lɛŋnde len nin-nda kpow a vi vɛlɛ diallon a siòòŋii nɛi.»