Yosue 1 - BII BILA

Yosue siŋnun simlacinɔ Israɛlla o fonda Moise-o

¹ Mɛɛ Moise vana baala Mɛlɛka-o vi, mí Mɛlɛka dimul Yosue po Nun-ndo, vana malaa Moise-o pɛɛn aa:

² «Moise vana ni baala vi, cɔn niko ma taŋ Yurdɛn n co hoo cɔu-vo niaa vannda ha kpow, mì la kɔɛ o lɛŋnde ya yɔngu Israɛlla len nin.

³ Fonda oo fonda niaa pila pɛ pelei, i ke niaa ndu maa mɛɛ ya yiilu Moise kpemaa yɛ.

⁴ Kandɔɔ o lɛŋnde veselɛilen a ba too, kɔlan háá o pembon Liban a ba luaŋ-ndo, kɔ bii a pee bɛndoo Efrate a ba paalen le can-ndo, keiyo a lɛŋnde Hitiia kpow, kɔlan delɔɔ o mɛmma ihɛllan coo a ba paalen le del-lo, lɛŋnde niaalen le vanin nden ni.

⁵ O palɛi n co tosa yoomu o ceendo coo-e kpow nin, vana-vana nɔlanin nɔm simullo le. I vanin nɔm ikɛi mɛɛ ya va Moise ikɛi yɛ, i faŋannin nɔm ikɛi le, i melnin nɔm te.

⁶ Lueinun yoomuan ma sim yili, kani nɔm tosanin ni mì vannda ha sɔla lɛŋnde ya yiilu fuɲaa ndaa kpemaa le nda len yɔngoo kɛ́ɔ len.

⁷ Kɛ nduyɛ, lueinun yoomuan ma sim yili, ma kela o tɔŋnda Moise vana ni baalaa tɛɛngul nɔm-ndan coo. Sei o ba kɛndɔɔ coo le, sei o ba mɛllo coo le, haliko mi tuula nɔmndan kpow la bɛnda nɔm o ba.

⁸ Sɛbɛ tɔŋndo ho kɔa sondo nɔmndo levil te, va ndu dimio a kɔllo keelaa lecoo idii a icɔl, haliko ma bii sɔɔn co n'sɛvaa lenin-ndon kpow. Kon tosanin ni mì tuula nɔmndan kpow la bɛnda nɔm o ba.

⁹ Ya le dimul nɔm te áá lueinun yoomuan ma sim yili? Siòòŋii bii nɔm te, vu n'dial te, kani nɛɛ-nɛɛ n kɔɛ pɛ, ya Mɛlɛka Hala nɔmndo, i vanin nɔm ikɛi.»

Bɛɛndianndo le peo Yurdɛn taŋɔɔ

¹⁰ Mí Yosue dimul simlacia Israɛlla aa:

¹¹ «La balu yondaa o dɔ́ɔ́ngɔ́ɔ̀ nin, mì la dimul vannda aa: ‹La bɛɛndiaa ɲɛm dian, kani nanu a palɛi yaa, la co peo Yurdɛn taŋɔɔ mì la kɔ hiɔlu lɛŋnde Mɛlɛka Hala niaa yɔngu niaa len.›»

¹² O kon, mí Yosue dimul vanaa fula o polale Rubɛn-nden nin-nda, a fula o polale Kad len nin-nda a á fula o polale tálále Manase len nin-nda aa:

¹³ «La loonun a diomnda Moise, vana baala Mɛlɛka-o dimul niaa lan: Mɛlɛka Hala niaa cii niaa pɛngio ke, mó yɔngu niaa lɛŋnden nden.

¹⁴ Laandaa niaa, cuavaa niaa a cɔlua niaa tiwba mà cal o lɛŋnde Moise yɔngu niaa Yurdɛn leeloo len nin. Kɛ niaa vanpiaandua nɔla cɔwvo tosaa-a fɔlɔn bɛnda ni mi la taŋ a ɲɛm cɔwvon o laba, mì la kɔ tosa cɔwvo le puapilɛa niaa,

¹⁵ háá mì Mɛlɛka ke nda pɛngio mɛɛ o ke niaa pɛngio yɛ. Mì nda bɛɛ luɛi, mà kɔ cal o lɛŋnde Mɛlɛka Hala niaa yɔngu nda len nin. O kon, la muungu niko, la cal o lɛŋnde Moise vana baala Mɛlɛka-o ke niaa o peo Yurdɛn leeloo, a ba paalen le can-ndo len nin.»

¹⁶ O kon, má mulul Yosue aa: «N tosanin ɲɛ-ɲɛ n dimul naa hoo le tosaa, nɛɛ-nɛɛ n vem vɛlɛ naa pɛ, n kɔanin.

¹⁷ Mɛɛ naa n bii diom Moise-o o dɛnndan kpow nin yɛ, lende koni naa n biinin diom nɔmndo ni. Lelan, màá Mɛlɛka Hala nɔmndo va nɔm ikɛi mɛɛ o va Moise ikɛi yɛ!

¹⁸ Vana-vana tosal nɔm pɛ nila kalulan, mò bii sɔɔn nɔmndon te, vana kon ndu sɔlanin piɔ́mndo. Lelan, lueinun yoomuan ma sim yili.»