Yonas 4 - BII BILA

Yonas tambu kɔl

¹ Yonas cɔu lende, mí mɔnɛi bii ndu, mó tuulu kɔl,

² mó dimul Mɛlɛka aa: «Àá Mɛlɛka! Hee ya va dimio lɔ́ɔ́ ya va vɔ o lɛŋnde nilen nin-ndo ni. Lelan yáà cɛn vɛlɛ le ɲaanɔnndo Tarsis ni. Kani yáà sina maa nɔm Hala, vana ikɛndɔɔ n co ni. A hiw ɲííye nɔu, a yala kɔl tuulu le, a faŋan o lediom coo le. A nɛi dɛnɛ palaa nɔm óò kɔngɔlan le vannda tuisio coo-o mangala le.

³ Lelan, Mɛlɛka cua yoomu nuu, kani piɔ́mndo hiow nihau ya hɛnan a yoomoo.»

⁴ Mí Mɛlɛka mulul ndu aa: «Vɛ̀ɛ̀ a nɔ pá dí ma tuulu kɔl?»

⁵ O kon kɔɔli, mí Yonas faŋan Ninive ciee, mó kɔ calnun a ba paalen le can-ndo. Mó tangul kùùlen ndon, mó luɛi lenin o vunduan le ɲɛ óò yɔŋnunnin Ninive ciee-o cɔu.

⁶ Mí Mɛlɛka Hala soli yɔmndo pum o lepilɔɔ, mí yɔm kon hiaw Yonas bollen le ndu vunduan yɔngoo haliko mi ndóò hini kɔl. Mí Yonas naŋ kɔl taw le yɔm kon.

⁷ Kɛ diimandɔɔ idiiyo púŋ, mí Hala cuu dɛloo pum, mó dia yɔm kon, mí yɔmndo vesan sɛɛn.

⁸ Paalen kaloo, mí Hala soli hoeyii vesɛiye a kpengii paalen le can-nde. Mí paalen le tuulu Yonas bollen, mí hɔlla hiŋ ndu, mó yeema piɔ́mndo, mó dimi aa: «Piɔ́mndo co fisa le ya a yoomoo.»

⁹ Mí Hala ɲuna ndu aa: «Vɛ̀ɛ̀ a nɔ pá dí ma tuulu kɔl le yɔmndo ho?» Mí Yonas muli aa: «I nɔ dí mì tuulu kɔl háá mì kelun nande.

¹⁰ O kon, mí Mɛlɛka dimul ndu aa: «Mɔnɛi co nɔm biyɔɔ le yɔmndo ho, kɛ nduyɛ a sanga le ndu le, o co nɔm te tɔl ndu le. O lepilɔɔ daama o vil icɔllo pum ni, mó vu icɔllo pilɔɔ.

¹¹ Nɔm yɛ, a yeema mì ya i tuinun Ninive kobi bɛndoo ho iɲíí le. Kobi bɛndu vannda hiow hoo le vaalan kɛmɛ a bidiin nin-ndo, vanaa sina bɛɛ haa pɛɛngulan dɛnɛ kɛndɔɔ a dɛnɛ vɔɔndo tɛɛn te-a. Cɔlua co vɛlɛ o kobio ho nin sɛ́lɔ́ɔ́ taw-taw.»