Yonas 3 - BII BILA

Yonas kɔɛ vomɔɔ Hala-o

¹ Mí Mɛlɛka soaa vɛlɛ o Yonas lo, mó dimul ndu aa:

² «Cɔm mà kɔɛ o kobi bɛndoo Ninive nin, mà kɔ tɛɛngul nda yoongu ya sɔɔ nɔm o sondo-o.»

³ O laan nin, mí Yonas can, mó kɔa Ninive mɛɛ Mɛlɛka dimul ndu yɛ. Nduyɛ, kobi bɛndoo pila Ninive va ni, fɔ mì vanáà cii palɛi ndii yáá le ndu ciiyo balɔɔ.

⁴ Mí Yonas tiiya ciee. Mó niinu balɔɔ lenin a yondaa aa: «Nanu a palɛi belehiɔɔlu, Ninive co hunɔɔ itambu few-few!»

⁵ Mí vannda Ninive laalan diom Hala-o. Má hivi yondaa, mí vana-vana bii sumndo, vanaa bolofaa, vanaa bala fondoa, mí nda kpow a vownun volɔɔla dɛnɛ palaalan.

⁶ Tuma masaa Ninive sina dɛnɛ kon-ndo, mó can o kpɛŋɛ ndɔ lemasaa coo, mó hulu doma ndɔ lemasaa, mí ndu pila bɛɛ vownun volɔɔla dɛnɛ palaalan, mó cal o pultan nin.

⁷ O kon kɔɔli, mó handu tɔŋndo le Ninive aa: «Masaa nda vanaa bɛndua co ndu o ba bɛngu-a, nda kpow a cii cɛlan maa vanndacieea a cɔlua, vana-vana dia ɲɛ-ɲɛ le, vana-vana kol vɛlɛ le.

⁸ Naa kpede n bɛnda mì n vownun volɔɔla dɛnɛ palaalan. Mì vana-vana piɛi Hala a kpaaya ndɔɔ kpow, mì vana-vana mangala kela ndɔ vɔɔndo a kɔlvesɛi o co tosaa-o.

⁹ Bɔɔle mì Hala ɲulul kɔl, mò yiyan le ɲɛ o dimi le tosaa-o mangalaa, o kon mì kɔl ndɔ tuwvo ɲulul, yɔŋii naa n cuu.»

¹⁰ Telen Hala ce maa Ninivea co mangalanndo, má va dɛnnda ndala vɔɔnndan malɔɔ-o, mó tuinun nda iɲíí le dɛnɛ palaa ndóò kɔngɔlan le nda tuisio coo-o.