Yonas 1 - BII BILA

Yonas ɲaanun Mɛlɛka

¹ Paale pum, mí Mɛlɛka soaa o Yonas, po Amitai-yo lo, mó dimul ndu aa:

² «Cɔn ma kɔɛ o kobi bɛndoo Ninive nin, mà kɔ tɛɛngul vanaa co lon-nda sɔɔn mun, kani tɔ́ɔ́ kɔlvesɛi ndaa tiiya o ya lo dí.»

³ Kɛ, mí Yonas can le ɲaanɔnndo Tarsis, le Mɛlɛka vionɔnndo. Mó tuusu Yopé, mó kɔ saalun dɛ̀ndɛ̀ bɛndoo pum, ó va kɔlan Tarsis-o. Mó sala volion le fondaa sɔlaa, mó luɛi vanaa va lon-nda tɛɛn le kɔnndan Tarsis, Mɛlɛka levil polon.

⁴ Kɛ mí Mɛlɛka tuisi hoeyii fùkù-fùkùei o mɛmma ihɛllan coo, mí felenfelenndo can, mí dɛ̀ndɔ̀ɔ́ va le yomiyomio.

⁵ Mí siòònde bii vanaa tɛɛngaa taw, mí vana-vana va hala ndɔɔ piɛiyo. Má va volɔɔla va o dɛ̀ndɔ̀ɔ́ nin-ndan solio, má va lan viovɔɔ o peelo, haliko mi dɛ̀ndɔ̀ɔ́ ndóò cɔɔlu muungu fefele. Tuma kon, Yonas ndóò tolnun o dɛ̀ndɔ̀ɔ́ tumndo, mó kɔ hinin, mó hiawnun o lɔan cundun.

⁶ Mí vana va bolle vanaa tɛɛngaa-o sɔɔnguu ndu ikɛi, mó dimul ndu aa: «Nɔm sei, yee a connun o lɔan? Cɔn ma piɛi Hala nɔmndo, bɔɔle mò tuinun naa iɲíí, o kon n vinin te.»

⁷ Mí vanaa tɛɛngaa dimulan vellaa-velle aa: «N malnun siondei, le vana co naa dɛnɛ palaa ho tuisio coo-o sinaa.» Má mal siondei, mí sionnden le bii Yonas.

⁸ Le hee, má dimul ndu aa: «Cɔm naa vana co naa dɛnɛ palaa ho tuisio coo-o. Vali yɛɛ n co yɛ tosaa? Kuɛɛ nɛ n cɛn yɛ? Lɛŋnde kuɛɛ nɛ n fula yɛ? Vana-mangalaa-isɔɔ súú yɛɛ n co yɛ?»

⁹ Mí Yonas mulul nda aa: «Hebreenɔɔ ya co ni, Mɛlɛka ya biilù ni, Hala co o halataala-o pɛɛn. Ndu toosiaa mɛmma ihɛllan a lɛŋnde kɔngɔlen ni.»

¹⁰ Mó cɔm nda maa ɲaanɔnndo o co le Mɛlɛka vionnɔnndo ni. Mí siòònde cɔɔlu vɛlɛ vanaa kan biyɔɔ taw, má ɲuna ndu aa: «Le yɛɛ nɛ n tosa yɛ dɛnɛ vaa nuaa?»

¹¹ Le tùú mɛnndan ma va hiilɔn bɛndu-bɛndoo tuŋ-ndo, má ɲuna ndu aa: «Yɛɛ nɛ naa n tosá yɛ a nɔm haliko mi mɛnndan man ma cal?»

¹² Mó mulul nda aa: «La cua ya mì la viow ya o peelo, o kon mɛnndan ma calnin. Kani i sina maa le ya hoeyii fùkù-fùkùi bɛnduei he co niaa palaa ni.»

¹³ Kɛ mí vanaa tɛɛngaa kan va vɔ fɔlɔn kindinndo le dɛ̀ndɔ̀ɔ́ ciŋaa o kɔngɔ. Kɛ a tiwba le, kani hiovɔɔ tuŋ mɛnndan ma va laci a hiilɔnndo ni.

¹⁴ O kon, má koŋul o Mɛlɛka lo, má dimi aa: «Éé Mɛlɛka! N co nɔm tɛɛlun, dii naa kpede le langbanɔɔ ho ndu pilɛ le. Handu vɛlɛ naa piɔ́m vana tɛɛmbuu isɔɔ a naa loo coo le, kani nɔm Mɛlɛka pila tosa ɲɛ hɛnan nɔm-ndo ni.»

¹⁵ O kon kɔɔli, má cua Yonas, má viaw ndu o mɛnndan nin. Fɔ́ɔ́fɔ̀, mí mɛnndan ma pɛngi hiilɔnndo.

¹⁶ O kon, mí siòònde bii vana-vana va o dɛ̀ndɛ̀ kon nin-nda a Mɛlɛka, má solul ndu sálàá, má cua ciɛ́ɔn o ndu lo kpéŋ-kpéŋ.