Yeremi 44 - BII BILA

Yoongoo le Yudaa co o vionnɔnndo nin Esipte-a

¹ Mí Mɛlɛka soaa o Yeremi lo le Yuifia co icali Esipte o kobilan Mikdɔl, Tapanɛs, Nɔf a o tàndàá Patrɔs nin-nda tɛɛngullo. Mí Yeremi dimul nda aa:

² «Diom Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: ‹Kámáá la ce dɛnnda palaala yáà tuisi Yerusalɛm a kobilan Yuda kpow coo lan te! Kobila lan kpow la tambu hau, vannda piow lan.

³ Kon tosan le vanavɔɔnyɛi nda tosa ma tɛɛmbuu ya kɔllo-e. Bau a solul halaa celennda sálàlan, nduyɛ o co halaa nda sina le, fuɲaa ndaa mamaa bɛɛ a sina nda le.

⁴ Ya yɛ, i sanga niaa vanaa nia baalaa kpow vimndo a vanaa-tɛɛngaa-diom Hala-a le niaa dimullo maa la soli pelon o dɛnnda vɔɔnnda ya yeemiaa lan nin,

⁵ kɛ la yeŋnun te, la luei yii le, la mangala kela vɔɔn niaa va-o le, la mel halaa celennda sálàlan solullo le.

⁶ O kon mí kɔl ni tuwvo saŋnun o kobilan Yuda a o nɛila bɛndulan Yerusalɛm coo maa leyin, hau kobila lan la siŋnun pɔmndan, vannda piow lan mɛɛ niaa sina yɛ.

⁷ Lelan diom Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: «Le yɛɛ niaa pila co yɛ dɛnɛ vɔɔn bɛndu vaa nuaa tosalanndo? La yeema mi vanpiaandua, vanlaandua, felengia a cɛlɛkpɛa o tàndá Yuda-o nin kpow cuu vu o lepilɔɔ? Vɛ̀ɛ̀ la yeema mi vana pilɛ bɛɛ lo yoomu o niaa tɛɛn te?

⁸ Vɛ̀ɛ̀ le ya kɔllo tɛɛmbuuo a dɛnnda niaalan, niaa co halaa celennda sálàlan solullo o lɛŋnde Esipte le niaa hin nden caltan nin-nden ni? Vɛ̀ɛ̀ la yeema mi la cuu o lepilɔɔ, mì la siŋnun tɔɔmasele dɔavaa dangaa a siɛmbula bɛndulan vanaa-mangalaa-isɔaa co o ceendo coo-a tɛɛn?

⁹ Vɛ̀ɛ̀ la pɔɛɛnun dɛnnda vɔɔnnda fuɲaa niaa mamaa, masaa Yuda, laandaa ndaa, niaa pila a la laandaa niaa tosa o tàndá Yuda-o nin a o nɛilan Yerusalɛm coo lan?

¹⁰ Háá hau, mɔnɛi bii niaa le, la ke ya lebɛɛ le, vana-vana bii silala nilan a tɔŋnda ya yɔngu fuɲaa niaa mamaa a niaa pila lan te.»

¹¹ Lelan, diom Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: «I co niaa mululɔn, mì tuisi niaa dɛnɛ palaa coo, mì cii Yudaa kpow.

¹² I biinin vanaa tɔ̀a lonin yoomu Yuda-a, a muli hɔlla le kɔlan vionnɔnndo Esipte-a, mí nda kpede a sɔla piɔ́mndo o lɛŋnde len nin o cɔwvo, te kon te a yima fofolan. Kandɔɔ a cuaambɔa kɔ bii a kaasonnda, a delinin o mɔɛi cɔwve bɛngu te kon te ma cuu a yima fofolan. Vannda cuanin nda tɔɔmaseloo le mɛnanndo, te kon te le sɔɔn lasiɛmboo dimio.

¹³ I simulnin vanaa kila caltan Esipte-a, mí tosa a nda mɛɛ ya tosa a vannda Yerusalɛm yɛ, mì cii nda a mɔɛi cɔwve, yima fofolan, te kon te a nàà n'kɔnyaa.

¹⁴ O vanaa lo yoomu Yuda, má kɔa vionnɔnndo Esipte-a tɛɛn, vana-vana nɔlanin ɲaanɔnndo le. Vana-vana helunnin piɔ́mndo le. Vana-vana fulanin ndon mò muungu Yuda le, nɛɛ nda co yeemaa taw le muungoo calle-a pɛɛn. A muungunin ndon te few, fɔ vanaa cɔwvo bumbanin-nda a pum.›»

Sálàla nda solul piɔm nɔ diolan aa masa laandoo o halataala-o lan

¹⁵ O kon mí vanpiaandua ndáà sina nin maa laandaa ndaa va halaa celennda sálàlan solullo-a kpow, a vanlaandua sɛ́lɛ́ bɛndua a va lon-nda, a vanaa-vanaa va icali Patrɔs o lɛŋnde Esipte len nin a mulul Yeremi aa:

¹⁶ «Dimi pɛɛ aa o diola Mɛlɛka lan n co sɔɛi o naa lo ni, n yeŋnin nɔm lani le.

¹⁷ Ɲɛ naa n dimi-o naa n co peelu ni. N vanin Astartee hala laandu co o halataala-o sálàla cuɛima cun kɛndɛlan lumndo a ndu sálàla mamɔilan solullo, mɛɛ naa n dema tosa háá hau yɛ. Lende koni vanaa naa, masaa naa a simlacia naa dema tosa o kobilan Yuda nin a o nɛilan Yerusalɛm coo ni. Mí baloo kui naa o ba, mí ɲɛ-ɲɛ va naa kɔlan o ba o kɛndɛ, dɛnɛ palaa ve naa kɔɔli le.

¹⁸ Kɛ kabi naa n mɛɛlu ndu sálàla cuɛima cun kɛndɛlan a lamamɔilan solul, mí pɛŋnden, cɔwlan a yima fofolan má toal naa coo.

¹⁹ Mí vanlaandua dimi vɛlɛ aa: «Telen naa n va masa laandoo o halataala sálàla cuɛima cun kɛndɛ lan a sálàla mamɔilan solullo-o, mò va maa piaandaa naa ve o sina nin te? Telen naa n va ndu dɛɛ nɔ tuuliaala ndɔlan-ndo tuŋndo a ndu sálàla mamɔilan solullo-o, a va sinaa yau!

²⁰ O kon mí Yeremi dimul vanaa kan kpow, vanpiaandua, vanlaandua a vanaa-vanaa ndáà yɔngu ndu muli kon aa:

²¹ Sálàla niaa va lomɔɔ o kobilan Yuda nin a o nɛilan Yerusalɛm coo niaa fuɲaa niaa, masaa niaa, simlacia niaa a vannda kpow lan, vɛ̀ɛ̀ o co a lan o kɔɔ le Mɛlɛka co sɔɛi he nuaa le? Niaa ca ko aa o pɔɛɛnun?

²² Mɛlɛka ndóò tiw lɛ ba dɛnnda niaala vɔɔnndan a mààla niaa va tosaa lan biuvɔnndo le. Lelan lɛŋnde niaalen le siŋnun bémbélan ni, mí vannda piaw len. A lɛŋnde len vannda co tɔɔmaseloo cuaa ni le mɛnanndo a le dangaa dɔvɔɔ mɛɛ niaa co hau cɔu nuaa yɛ.

²³ Le tùú niaa solul halaa celennda sálàlan, mí la cua hakilan a Mɛlɛka, la tui ndu diom te, la bii silala ndɔlan a tɔŋnda ndɔlan te yɛ, lelan dɛnnda palaalan ndan la co niaa coo ni.»

²⁴ Mí Yeremi dimul vɛlɛ vanaa kan kpow, vanpiaandua a vanlaandua aa: «Niaa Yudaa co o lɛŋnde Esipte len nin-nda kpow, la yaŋnun-ndɔ diom Mɛlɛka-o.

²⁵ Diom Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: ‹La cii dimi niaa laandaa niaa maa ɲɛ niaa dimi-o niaa tosanin le hala laandu co o halataala-o ni, maa la lumnin ndu sálàla cuɛima cun kɛndɛlan mì la solul ndu sálàla mamɔilan. Nduyɛ, mí la peelu sɔɔn mun.› Mɛɛ la tosa mɛɛ niaa dimi lende yɛ.

²⁶ Lelan, niaa Yudaa co icali o lɛŋnde Esipte len nin-nda kpow, la yaŋnun diom ya Mɛlɛka co niaa dimullo-o: I cii mɛnan o diola nila bɛndu lan maa o lɛŋnde Esipte len nin kpow, vanaa-vanaa fula Yuda, vana-vana bɛnda lɛ mo pɛl-la diolan o mɛnanndo, mò dimi le aa: «Le Maalii Hala yoomaa.»

²⁷ I co nda tolɔɔ kɔɔli, o venin le nda dɛnɛ kɛndɛ tosal te, kɛ le o vɔɔndo caŋɛi. Yudaa co Esipte-a kpow a cuunin o mɔɛi cɔwve bɛngu, te kon te a yima fofolan. Hali vanndo ndu pilɛ o lonin yoomu le.

²⁸ Vannda ɲɛ-pɔmbɔ daama hialunnin mɔɛi cɔwve ni, mà mal Esipte, mà muungu o tàndá Yuda-o. O kon vanaa lonin kan yoomu o vanaa ndáà kɔɛ kan caltan Esipte-a tɛɛn-nda sinanin te sɔɛi nda dimi-e peelunnin ni, te kon te i ya dimi-e.

²⁹ Sɔɛi fula ya Mɛlɛka o sondo-e co hee ni maa: «Esipte nanu ya lɔaanin niaa ni. Mì cɔm niaa tɔɔmaseloo. O kon niaa sinanin ni maa toɲaa sɔɔn ya dimi le niaa dɛnɛ palaa tuisio coo-on co ni. Tɔɔmasele kon co hoo ni.

³⁰ Ɲɛ Mɛlɛka dimio co ho ni aa: «I co Hɔfra, masaa Esipte, malɔɔ yaamɔaa ndɔa yeema le ndu diyɔɔ-a o ba, mɛɛ ya mal Sedesia, masaa Yuda, Nebukanɛsar masaa Babilɔn o yɛ, yaamɔɔ ndɔ óò yeema kon le ndu diyɔɔ-o pɛɛn.» Sɔɛi fula ya Mɛlɛka o sondo-e co ken ni.