Yeremi 40 - BII BILA

Yeremi kila caltan Mispa

¹ Yeremi va o yiyaa a yɔlɔn vanaa kaasoa ndáà fula Yerusalɛm a Yuda le kɔlan a nda Babilɔn-nda tɛɛn. Kɛ mí Nebusaradan bolle kpalilla soli ndu vanaa kaasoa tɛɛn, le ndu yɔɔ Rama. O kon kɔɔli, mí Mɛlɛka soaa o ndu Yeremi lo.

² Lɔ́ɔ́ pá mí Yeremi kɔa, mí bolle kpalilla veelu ndu, mó dimul ndu aa: «Mɛlɛka Hala nɔmndo ndóò cii nin sɔɛi dɛnɛ palaa ho dimi.

³ Mí Mɛlɛka peelu ɲɛ ndóò dimi-o, kani la cua hakio a Mɛlɛka, mí la kɛɛ ndu diom. Lelan hee co niaa coo ni.

⁴ Sisa, i co hau yɔlɔn co nɔm o ba-on timbi. Taa cɛl pɛ le kɔlan naa ŋiɔn Babilɔn, mì kɔ handu nɔm hɔlten coo, n kɔɛ. Taa yeema yɛ le lakɔ le, mɛɛ kɔa le. Má cè lɛŋnden nden kpow! Nɛɛ-nɛɛ n yeema pɛ le kɔlan, a kɔɛ.»

^5-6 Kɛ le mɛɛ Yeremi yala muli le yɛ, mí Nebusaradan dimi vɛlɛ aa: «A tiwba ma muungu o Kedalia po Ahikam-ndo, po imama Safan-ndo lo, o masaa Babilɔn siinguu simlacinɔɔ le kobilan Yuda-o pɛɛn. Mà kɔ lo o ndu lo vannda tɛɛn, te kon te, a kɔɛ nɛɛ n yeema-a.» Mí simlacinɔ kpalilla ke ndu ɲɛm dian le dio nɛi-tɛɛn a ɲɛ-sɔlaa. O kon mó mal ndu n'pelu. O kon mí Yeremi kɔa Mispa o Kedalia lo, mó kɔ va ndu o bɛngu coo vanaa lo o lɛŋnden nin-nda tɛɛn.

Yudaa cuungian Kedalia ikɛi

⁷ Nduyɛ, simlacia kundala vanaa cɔvaa va vɔ yondoo nin. Má tuɛi maa masaa Babilɔn cii Kedalia po Ahikam-ndo siinguu masa ibungaa vanaa bala fondoa ndáà mɛi o lɛŋnden nin-nda coo, vanpiaandua, vanlaandua a cuaambɔa Yuda kpow.

⁸ Mí simlacia kan muungu o Kedalia lo Mispa, nda co ha ni: Ismaɛl po Netania-o, Yohanan a Yonatan poaa Karea-a, Seraya po Tanhumɛt-o, poaa Efai fula Netofa-o, a Yesania po Maaka-o, a poaa va nda kɔɔli-a.

⁹ Mí Kedalia po Ahikam-ndo, po imama Safan-ndo mɛnalan nda a poaa va nda kɔɔli-a kpow, mó dimul nda aa: «Siòòŋii bii niaa le Babilɔn-nda baalaa tosallo le. La cal o lɛŋnden nin mì la va masaa Babilɔn o ba bɛngu, o kon mì la vannun a kɔlɲulu.

¹⁰ Ya i co lo Mispa nanu mì va hɔlte niaa Babilɔŋaa vanin hunɔɔ-a tɛɛn. Kɛ niaa la kɔ va mɔiyan a cuɛiyan toosiaa, mì la va kulun koaman kiɔndɔɔ, mì la manda, mì la lo o kobila niaa biinin-ndan nin.»

¹¹ Mí Yuifia va o lɛŋnde Moab len nin-nda, a va o lɛŋnde Amɔnnda nin-nda, a va o lɛŋnde Edɔmnda nin-nda a á va o lɛŋii tɔ̀ɛi nin-nda kpow a tuɛi maa masaa Babilɔn mɛi vannda tiŋ o tàndá Yuda-o nin, mó handu Kedalia po Ahikam-ndo, po imama Safan-ndo masaa nda coo.

¹² O kon mí Yuifia kpow a fula o fondala nda va a sɛŋian-nda, má kɔa Mispa o Kedalia lo o tàndá Yuda-o nin. Má kɔ soli cuɛiyan a mɔiyan taw, má kiandu vɛlɛ tɔlɔɔlan taw.

A dii Kedalia

¹³ Mí Yohanan po Karea-o nda simlacia vanaa cɔvaa va yondoo nin-nda kpow a hun o Kedalia lo Mispa.

¹⁴ Má dimul ndu aa: «A sina pá maa Baalis masa Amɔnnda vem Ismaɛl po Netania-o le nɔm hunɔɔ diyɔɔ? Kɛ Kedalia po Ahikam-ndo laalan nda le.

¹⁵ O kon mí Yohanan po Karea-o kɔ dimul Kedalia o vionnɔnndo nin Mispa aa: «Cɛl mì kɔ dii Ismaɛl, po Netania-o. Vana-vana sinanin te. Vɛ̀ɛ̀ mà cɛl mò dii nɔm? O dii nɔm pɛ, Yuifia cuungian haa nɔm ikɛi-ya kpow a co sɛŋin!»

¹⁶ Mí Kedalia po Ahikam-ndo mulul Yohanan po Karea-o aa: «Tosa kon te, kani ɲɛ n co dimio a Ismaɛl-lo co toɲa le.