Yeremi 38 - BII BILA

A mal Yeremi o soondo nin

¹ Mí Sefatia po Matan-ndo, Kedalia po Pasur-o, Yukal po Selemia-o, Pasur po Malkia-o a tuɛi sɔɔn Yeremi va vannda kpow dimullo-on aa:

² «Diom Mɛlɛka dimi-o co hoo ni aa: vana-vana lo pɛ o kobio ho nin, ndu vunin o mɔɛi cɔwve bɛngu, a yima fofolan, te kon te a nàà n'kɔnyaa. Kɛ vana-vana fula pɛ, mò kɔ yɔngun Babilɔn-nda, ndu lonin yoomu, hali mò sɔla lɛ ɲɛ celen o kon kɔɔli le.

³ Diom Mɛlɛka dimi-o co hoo ni aa: «I malnin kobio ho vanaa cɔvaa masaa Babilɔn o ba, má bii ndu.»

⁴ O kon mí simlacia dimul masaa aa: «Langbanɔɔ ho bɛnda mò sɔla piɔ́mndo! Kani sɔɔn o co dimio-on co vanaa cɔwva a vanaa lo o kobio nin-nda yoomuan solio. O yeema dɛnɛ kɛndɛ vannda ha le, fɔ dɛnɛ nda vɔɔndo daama.»

⁵ Mí masaa Sedekia mulul nda aa: «La ce ndu, mɛ̀ɛ́-mɛ̀ɛ́ niaa yeema pɛ la tosa. I co bɛɛ masa nuaa, kɛ i nɔla niaa kuuna le.»

⁶ O kon má bii Yeremi le ndu viovɔɔ o soon mamɛn Malkiyahu po masaa-o nin. O falii cɛi kaasoo soon kalaa va ni, má tuisi Yeremi lenin o yoei. Mɛmma ve o soon kalaa nin te, kɛ loolio va lenin, mà tuisi Yeremi o looli kon nin.

⁷ Langbanɔ Etiopiinɔ pum va lon diolan Ebɛd-Melɛk, vana sɔvɛɔ pila o va o cɛi lemasaa nin ni. Ndóò tueyɔɔ maa a mal Yeremi o soondo nin, masaa va icali o dio Bɛnyamɛn-ndo,

⁸ mí ndu Ebɛd-Melɛk fula o cɛi masaa nin, mó kɔ komal masaa, mó dimul ndu aa:

⁹ «Masaa, vana ni bɛndoo, dɛnɛ vɔɔndo vannda ha tosa le Yeremi vana-tɛɛngaa-diom Hala-o malɔɔ o soondo nin ni. O lonin ndon mò vi a yiaan, kani bulu co lɛ cieo coo le.»

¹⁰ Mí masaa dimul Ebɛd-Melɛk Etiopiinɔ aa: «Cua langbaa beleyaa, má kɔɛ a nda, mì la kɔ soli Yeremi o soondo nin lɔ́ɔ́ o vi-yɔ loo.»

¹¹ Mí Ebɛd-Melɛk cua langbaa n'van beleyaa, mó kɔa a nda o cɛi lemasaa nin, mó kɔ luei nda o cɛi va o cɛi mandaa bolofaa bɛngu-o nin. Má cua volɔɔla yuulula siɔŋiɛilan, má tuisul Yeremi lan o soondo nin o yoei.

¹² Mí Ebɛd-Melɛk Etiopiinɔ dimul Yeremi aa: «Vownun volɔɔla yuululan ndan nɔm o lavɔɔn, má kei yoei lecoo.» Yeremi tosaa lende,

¹³ má nan ndu a yoeì ken, má soli ndu o soondo nin, mí Yeremi lo o falii cɛi kaasoo lon.»

Sedekia ɲuna vɛlɛ Yeremi isɔɔ

¹⁴ Mí masaa Sedekia viam vannda le kɔlan hunɔɔ a Yeremi vanaa-tɛɛngaa-diom Hala-o, mó kɔa a ndu o luɛyɔɔ yàándɔ va o Cɛi-Hala-o-o. Mó kɔ dimul ndu aa: «I yeema mi ɲuna nɔm sɔɛi ndii pilɛ, vin ya ɲɛ-ɲɛ le.»

¹⁵ Mí Yeremi mulul Sedekia aa: «Te i dimul nɔm pɛ toɲaa, diyɔɔ n diinin ya ni. Te i yɔngu yɛ nɔm pɛ silaa pum, a biinin ndu le.»

¹⁶ Mí masaa Sedekia mɛnalan Yeremi o vionnɔnndo nin aa: «Te Mɛlɛka co yoomu, o ke naa yoomoo-o. I diinin nɔm te, i melnin nɔm vanaa yeema haa le nɔm diyɔɔ-a o ba le!»

¹⁷ O kon mí Yeremi dimul ndu Sedekia aa: «Diom Mɛlɛka, Hala-Nɔ-Kpaayaa-Kpow-vo, Hala Israɛlla dimi-o co hoo ni aa: Te nɔm pila a yungu nɔmndo kɔ yɔngun pɛ masaa Babilɔn, a sɔlanin baŋaa, kobio ho tembunin vɛlɛ o leyin nin te.

¹⁸ Kɛ te nɔm pila yɔngun simlacia masaa Babilɔn te, kobio ho delnin Babilɔn-nda o ba, mà lom ndu, nɔm pila bɛɛ, a helunnin nda le.

¹⁹ O kon mí masaa Sedekia dimul Yeremi aa: «Siòònde co ya a Yuifia yɔngun Babilɔnnda-a ni, yɔŋii nda mal-la nda o ba, mà saangiaa ya.»

²⁰ Mí Yeremi muli aa: «A melnin nɔm nda o ba le. Tuei-yɔ diom Mɛlɛka dimi-o aa ɲɛ-ɲɛ vɔɔn yɔŋnunin nɔm te, a lonin yoomu.

²¹ Kɛ taa kɛɛ pɛ le fulaa, mà kɔ yɔngun nda, diom Mɛlɛka dimul-la-o co hoo ni aa:

²² a kɔanin a vanlaandua co vɔ o cɛi lemasaa Yuda nin-nda kpow o simlacia masaa Babilɔn-ndo, o kon mà solul nɔm condei aa: «Bàà lekɛ́ndɛi nda bii nɔm o mɛnndan nin ni, caaŋaa nɔmaa kan pɛɛn. Nɔm óò ciiyo pelon lueiyo o loolio nin, má kialun nɔm kɔɔli.»

²³ Lende i co ni, a kɔanin a laandaa nɔmnda a á cuavaa nɔmaa laandua o Babilɔn-nda lo. Nɔm pila bɛɛ, a helunnin nda le, masaa Babilɔn holnin nɔm baa, mò mal kobio yin.»

²⁴ O kon mí Sedekia dimul Yeremi aa: «Taa yeema pɛ mà lo yoomu, mɛɛ cɔm vana-vana sɔɔn naa n dimi mun-ndon te.

²⁵ Te simlacia sina pɛ maa n suukan naa ŋiɔn, má hun dimul nɔm aa cɔm naa suukan niaa va niaa masaa-o yɔŋii naa n dii nɔm,

²⁶ a mulul nda aa: «Masaa ya va tɛɛlɔnndo ni, maa o yaa ya o Yonatan-ndo cɛinin te, yɔŋii ya kɔ vu lon.»

²⁷ Mí simlacia kpow a hun o Yeremi lo, má ɲuna ndu. Mó mulul nda mɛɛ masaa dimul ndu yɛ. O kon, má faŋan ndu kɔɔli, kani vana-vana sina sɔɛi nda suukan nda masaa-e le.

²⁸ Mí Yeremi lo o bɛ́ɛ̀ cɛi kaaso kon háá paale nda bii Yerusalɛm-nden. Tofa vɔ ɲɛ yɔŋnun lɔ́ɔ́ nda bii Yeruslɛm-ndo.