Yeremi 37 - BII BILA

Masaa Sedekia ɲuna Yeremi isɔɔ

¹ Mí Nebukanɛsar masaa Babilɔn suili Sedekia po Yosia-o masaa o tàndá Yuda-o coo. O kon mí Sedekia tosa masalen o fonda Konia po Yehoyakim-ndo.

² Kɛ vana-vana yeŋnun kanalan Mɛlɛka-o o sɔɔn Yeremi vana-tɛɛngaa-diom Hala-o va dimio-on te: ndu pila, simlacia ndɔa, vannda Yuda, vana-vana yeŋnun te.

³ Mí masaa Sedekia viam Yɛhukal po Selemia-o nda Sofoni po Maaseya vana-solia-lasálàá-o, o Yeremi vana-tɛɛngaa-diom Hala-o lo le ndu dimullo aa: «Piɛi Mɛlɛka, mà tɛɛlun ndu le naa.»

⁴ Nduyɛ, ndáà mel lɔ Yeremi o kaasoo le. O va kelanndo o ba ndɔɔ coo vannda tɛɛn.

⁵ Telen vanaa cɔvaa masaa Esipte-a mal Esipte ma va hunɔɔ-o, Babilɔn-nda va Yerusalɛm tiilaa ni. Kɛ ndáà tueyɔɔ lende, má mal, má muungu a makɔɔ ɲɛ-pɔmbɔ.

⁶ O kon mí Mɛlɛka soaa o Yeremi lo, mó dimul ndu aa:

⁷ «Diom Mɛlɛka Hala Israɛlla dimi-o co hoo ni aa: La kɔ dimul masaa Yuda, o vem niaa ya ɲunaa-o aa: Vanaa cɔvaa ndáà fula Esipte le niaa hunɔɔ cɔwvo malaa-a muungun o nda lo Esipte.

⁸ Babilɔnnda co muungu nanu mà hun del kobio ho coo, mà lom ndu.

⁹ O ya Mɛlɛka co niaa dimul-lo co hoo ni: La pɔw le mì la yiyan maa Babilɔnnda co niaa faŋan kɔɔli mà kɔɛnnun. A kuenin te.

¹⁰ Hali o va bɛɛ maa la nɔla vanaa cɔvaa Babilɔŋaa co niaa haa kɔɔli a cɔwvo-a kpede, mò lo vanaa niaa yɔŋul-la daama, a pilɛn-pilɛŋaa kan cannin o cɛila-kolala-toandaala ndalan nin, mà hin kpow, mà mal kobio Yerusalɛm yin.»

A mal Yeremi o kaasoo

¹¹ Telen vanaa cɔvaa Babilɔn-nda mal tiŋ Yerusalɛm, má muungu a makɔɔ le vanaa cɔvaa masaa Esipte-a kpakpalaa-o,

¹² mí Yeremi yeema le malɔɔ Yerusalɛm, haliko mi ndóò kɔɛ o tàndá Bɛnyamɛn-ndo nin, mì ndóò kɔ sɔla lɛŋnden lendɔlen kɛ́ɔ o vanaa ndɔa lo.

¹³ Kɛ telen o tiiya o dio Bɛnyamɛn-ndo-o, mó komal bolle kpalilla diolan Yiria, po Selemia-o, po imama Hanania-o. Mí ndu Yiria bii Yeremi vana-tɛɛngaa-diom Hala-o, mó dimul ndu aa: «O Babilɔn-nda lo n co hiovɔɔ nuaa ni.»

¹⁴ Mí Yeremi muli aa: «Còòlan! I nɔ yiyan hiavaa o Babilɔnnda lo le.» Kɛ Yiria yeŋnun ndu bɛɛ le, mó bii Yeremi, mó kɔa a ndu o vanaa bɛndua lo.

¹⁵ Mí vanaa bɛndua kan tambu kɔltan a Yeremi, má lɔaa ndu, má mal ndu o kaasoo, o cɛi Yonatan vana sɛvaa-o nin, kani cɛi kon ndáà siinguu cɛi kaasoo ni.

¹⁶ Nuaa nda mal Yeremi o kaasoo ni. O cɛi va o lɛŋnden bɛngu-o nin, mó viaw lon taw.

¹⁷ Paale pilɛ, mí masaa Sedekia viam vannda Yeremi veelu, mó kɔ ɲuna ndu o vionnɔnndo nin o cɛi ndɔ lemasaa nin aa: «Vɛ̀ɛ̀ Mɛlɛka dimul-lɔ nɔm isɔɔ le ya tɛɛngul te?» Mí Yeremi muli aa: «O dimul-la isɔɔ le nɔm, aa nɔm delnin masaa Babilɔn o ba.»

¹⁸ O kon mí Yeremi ɲuna masaa Sedekia aa: «Sɔɛi yɛɛ ya tɛɛmbuu yɛ a nɔm, te kon te a simlacia nɔmnda te kon te a vanaa co o kobio ho nin-nda, mí la mal-la o kaasoo?

¹⁹ Ɔ́ɔ̀ ba vanaa-tɛɛngaa-diom Hala-a niaa co-o? A va niaa kan dimullo aa: «Masaa Babilɔn hinulnin niaa o lɛŋnden nden nin a cɔwvo le-a pɛɛn.»

²⁰ Lelan masaa, i tɛɛlun nɔm vana ni bɛndoo, mà yaŋ ya nilan, mà tuei tɛɛlɔn ya co nɔm-ndo! Mingi ya o Yanatan vana sɛvaa lo le, yɔŋii ya kɔ vu lon.»

²¹ Mí masaa Sedekia dimi le Yeremi mandaa o falii cɛi kaasoo nin, mà va ndu bulu tiilan ndáà pisi o nɛila vanaa loamaa bulua coo-o o pilɛ yɔngoo o paalen nin, háá mí bulu kon ndóò cuu cieo coo. Nuaa Yeremi lo o biyɔɔ nin o falii cɛi kaasoo nin ni.