Yeremi 33 - BII BILA

Kpema sɛnɛiyo yiinun le Yerusalɛm

¹ Yeremi va vɔ o biyɔɔ nin o bɛ́ɛ̀ cɛi kaasoo, mí Mɛlɛka soaa o ndu lo o diinndɔɔ aa:

² «Diom Vana co dɛnndan kpow tosaa-o soo-o co ho ni, o co lan toosiaa mò va lan peeloo-o, o nɔ diolan aa Mɛlɛka-o aa:

³ ‹Veelu ya, mì mulul nɔm, mì cɔm nɔm dɛnnda bɛndulan, dɛnnda viannanndan, la n sina le lan pɛɛn.›

⁴ Kani diom Mɛlɛka, Hala Israɛlla dimi le cɛila kobio ho a cɛila masaa Yuda, la nda co hunɔɔ pesi mà koombiaa a mɔɛi cɔwve lan-ndo co hoo ni aa:

⁵ Fondo fúú niaa cɔlɔbanin Babilɔnnda le kpaakio tangullo le kobi niaa biyɔɔ ni. Kani telen niaa kuelnin nda-o, i kuinin vanvílɛ́iya cɛilan nin a kɔl ni fulaa bɛndoo. I mululnin kobi kalaa kɔɔ le dɛnnda kɔlvesɛila nda tosa lan.

⁶ Kɛ i dɔawnin nda danda mà muungu maa paandu. Mì singi cɛila ndalan, mà sɔla kɔlɲuloo, mà va nila ɲulu.

⁷ I minginin vanaa ndáà bii Yuda-a, a ndáà bii Israɛl mí ndáà kɔa a nda o biyɔɔ nin-nda mɛɛ nda va o tasendɔ yɛ.

⁸ I dindinin nda le hakila ndáà cua a ya lan kpow. Mì mal nda haki le nila kalula nda tosa, má cua hakio a ya lan.

⁹ O kon ɲɔɔ hɛnannin ya le diola Yerusalɛm-ndan veeloo, biiloo a bɛɛlen le vanin le ya vanaa-mangalaa-isɔaa co o lɛŋnden coo kpow-va tɛɛn. Telen nda tuɛinin dɛnɛ kɛndɛ ya tosalnin nda-o-o, siòònde a misimisio biinin nda le naŋɔɔ a le dɛnɛ kɛndɛ ya tosalnin nda kon kpow-vo.»

¹⁰ Diom Mɛlɛka dimi-o co hoo ni aa: «Niaa vannda Yuda, la co dimio aa: ‹Lɛŋnden nden le vesa, vanaciee co lɛ lenin te, visia co lɛ lenin te.›» A toɲa, vanndacieea a visia co lɛ o tàndá Yuda-o a o nɛila Yerusalɛm-ndan coo le. Kɛ nduyɛ, vana hun tuɛinin vɛlɛ

¹¹ yoondiaala kɔlkɛndɛlan, a kponyolan, vana hun tuɛinin vɛlɛ condun vanaa co nɔlan kilaa sɛnɛi-ya a vanaa vanin hunɔɔ a sálàla malaa balikalan o Cɛi-Hala-o nin-nda. A vanin dimio aa: La biilu Mɛlɛka-Nɔ-Kpaayaa-Kpow-vo, kani Mɛlɛka naŋ, ɲíí ndɔɛi co le lɔ́ɔ́-lɔ́ɔ̀!› A toɲa, i minginin lɛŋnden nden mɛɛ le va o tasendɔ yɛ, diom Mɛlɛka dimi-o co kon ni.»

¹² Diom Mɛlɛka-Nɔ-Kpaayaa-Kpow-vo dimi vɛlɛ-o co hoo ni aa: «Hèélan la hun vanin vɛlɛ le vanaa mandaa n'cɔlua cɔlua ndaa yambɔɔ pɛngio o lɛŋnde len nin a o kobila ndɔlan nin kpow. Lɛŋnde len le co fondo, n'vanndaciee co lenin te, n'cɔlu vɛlɛ le.

¹³ Saa hiawnin vɛlɛ o ba vana cɔm nda-o bɛngu, o kobila co o pembon coo lan nin, la co o dɛngbɛlan nin-ndan nin, la co o tàndàá Nekɛv nin-ndan, o tàndá Bɛnyamɛn-ndo nin, Yerusalɛm balɔɔ a o kobila Yuda lan nin.» Diom Mɛlɛka dimi-o co kon ni.

Hala muungu lɛ mo bii ɲɛ o yii kpemaa le yɔngoo-o le

¹⁴ Mí Mɛlɛka dimi aa: «Paale vanin mì peelu sɔɔn dɛnɛ kɛndɛn ya dimi le cɛi Israɛlla a cɛi Yudaa-on.

¹⁵ Telen kon hun tiiya pɛ, i solulnin David lɛvii dɛnɛ sandɛi. Lɛvii ken tosanin dɛnɛ sandaa a dɛnɛ peelanndo o lɛŋnden nin.

¹⁶ O palɛi ken, Yuda sɔlanin cindaa, o kon mì Yerusalɛmnda cal a nila ɲulu o calta ndalan, kobi kon veelunnin aa: «Mɛlɛka co dɛnɛ sandaa naa ni.»

¹⁷ Diom Mɛlɛka dimi-o co hoo ni aa: «David folanin vana o polale ndɔlen nin lɔ́ɔ́-lɔ́ɔ̀ le calle o kpɛŋɛ lemasa nin le masalen tosaa Israɛlla coo le.

¹⁸ Leviaa-solia-lasálàá vanin vɛlɛ le ya sálàla loamaalan solullo lɔ́ɔ́-lɔ́ɔ̀, le ya cuɛima cun kɛnɛan lumndo a le ya sálàla bɛɛndiaa isɔɔlan solullo lepalaa-lepala.

¹⁹ Mí Mɛlɛka soaa vɛlɛ o Yeremi lo, mó dimul ndu aa:

²⁰ «Ya Mɛlɛka co sɔɛi he dimio ni: Vɛ̀ɛ̀ la nɔla pá tɔŋ ya hendul paalen a ɲumndan-ndo tɛɛmbuu? Vɛ̀ɛ̀ la nɔla pá paalen kuunaa fulaa te kon te ɲumndan kuunaa toolɔɔ?

²¹ Lende koni, kpema ya yiilu David vana ni baalaa-o tembunin te. Vana-vana kuunanin vɛlɛ cuavaa-imamaa David-a masalen tosaa Yerusalɛm lɔ́ɔ́-lɔ́ɔ̀ le, cuavaa-imamaa Levii-a bɛɛ a pɛnginin a ya sálàlan solullo le.

²² Vana nɔla loeon co o halataala-on cɔm te, vana nɔla vɛlɛ sióóŋun co o mɛmma ihɛllan kɔngɔ-on cɔm te. Kani n co bɔɔ sɛ́lɛ́. Lende ya kuinin cuavaa-imamaa David-a a cuavaa-imamaa Levii-a ni, vanaa-solia-lasálàà niaa pɛɛn.

²³ Mí Mɛlɛka dimul Yeremi aa:

²⁴ Vɛ̀ɛ̀ a co tueyɔɔ ɲɛ vannda ha co dimio-o le? A co dimio aa ya cii yungula tiɔnnda yáà hɛli lan kɛɛ, Israɛlla a Yudaa pɛɛn. Nuaa nda co yungu nuu yio kiolɔnndo ni, a nɔ o kɔl maa a co lɛ lelɛŋ a ba nda le.

²⁵ Ɲɛ ya Mɛlɛka dimi-o co hoo ni: I cii kpemaa yii a paalen a á ɲumndan, mí kɛsul halataalaa a lɛŋnden tɔŋndan.

²⁶ La ca ko aa mì kɛɛ poaa Yakɔb-a a poaa David vana ni baala-a? Vɛ̀ɛ̀ i kɛɛnin le simlacia simnin cuavaa Abraham-nda, a Isaak-a a cuavaa Yakɔb-a laci-a hɛlio o poaa ndaa tɛɛn? Kɛì-kɛì bɛɛ! Kani ɲííye co ya a nda, i minginin vanaa ndaa nda kɔɛ o biyɔɔ nin-nda o nda lo.»