Yeremi 32 - BII BILA

Yeremi pendu lɛŋnden

¹ Sɔɛi Mɛlɛka dimul Yeremi o vɔsi tɔ́ndɔ Sedekia va masalen tosaa Yuda-o, o vɔsi tɔ́ a o ŋɔmaandɔ Nebukanɛsar va masalen tosaa-o.

² O telen kon vanaa cɔwva Babilɔn ndáà tiila Yerusalɛm ni, Yeremi vanaa-tɛɛngaa-diom Hala-o va o kaasoo o bɛ́ɛ̀ masaa Yuda.

³ Sedekia masaa Yuda ndóò mal ndu o kaasoo ni, kani mó cɛɛŋun a vana-tɛɛngaa-diom Hala-o o kɔɔ aa o dimi o diola Mɛlɛka lan maa o co kobio ho malɔɔ masaa Babilɔn o ba, mò bii ndu.

⁴ Sedekia masaa Yuda helunnin Babilɔnnda le. Kɛ o sɔlanin malɔɔ masaa Babilɔn o ba. O canin Nebukanɛsar hɔllaa-hɔlla, mì ndu pila soo o ndu lo vakpa.

⁵ A kɔanin a Sedekia Babilɔn, lon o lonin ni háá mi cɛn le ndu vali tosa. Te la tɔɔndan pɛ le Babilɔnnda simullo, la tiwnin nda ba le. Sɔɛi fula Mɛlɛka o sondo-e co ken ni.

⁶ Mí Yeremi dimi aa: «Sɔɛi Mɛlɛka soo o ya lo-e co hee nin aa:

⁷ ‹Hananeɛl po Salum bom nɔm-ndo co hunɔɔ o nɔm ndo, mó dimul nɔm maa nɔm piondu yondo ni co Anatɔt-o, kani nɔm nɔ dí le ndu piondɔɔ mo va le nɔm ni.›»

⁸ Lekɛ́ndɛi yɛ, mí Hananeɛl po bom nuu komal-la o bɛ́ɛ̀ kaasoo mɛɛ Mɛlɛka ndóò dimul-la yɛ, mó dimul-la aa: «Piondu yondo ni co Anatɔt o tàndá Bɛnyamɛn-ndo nin-ndo, kani a nɔ dí le ndu piondɔɔ a le ndu loo, lelan piondu ndu.» O kon mí sina dɔ́ɔ́ maa Mɛlɛka va sɔɛi o ya lo ni.

⁹ Mí piandu yondo kon Anatɔt po bom nuu o ba, Hanameɛl pɛɛn. Mí tuu volin latámán tɔ́ a n'ŋɔmmɛw.

¹⁰ Mí sɛva sɛbɛla leseilan, mí pila pondale nile ya pila len lecoo, mí tuu volion o ɲɛ tuvaa coo seiya o hɔl.

¹¹ O kon kɔɔli, mí cua niko sɛbɛla leseila lan o pilɛ, o yáà handu pondale nilen lecoo-o, a o va o kumbia-o mɛɛ tɔŋndo dimi yɛ,

¹² mí yɔngu Baruk po Neriya-o, po imama Maseya-o, Hanameɛl po bom nuu a seyaa handu suon o sɛbɛ lesei kon coo-a o hɔl. Yuifia va vɛlɛ o bɛ́ɛ̀ o cɛi kaasu kon-nda kpow o hɔl dɛnɛ kon tosan ni.

¹³ O kon mí dimul Baruk vannda kpow o hɔl aa:

¹⁴ «Diom Mɛlɛka-Nɔ-Kpaayaa-Kpow-vo, Hala Israɛl-lo dimi-o co hoo ni aa: ‹Cua Sɛbɛla leseilan ndan, sɛbɛ pondalen le co coo-o a o co o kumbia-o, mà vow lan o kpɛɛnɛi puuluei nin, haliko mi la viow lamandaa le lɔ́ɔ́ levil.

¹⁵ Kani diom Mɛlɛka-Nɔ-Kpaayaa-Kpow-vo, o co Hala Israɛlla-o dimi-o co hoo ni maa vannda piandu vɔnin cɛilan, yondolan, a nakɔla n'rɛsɛnndan o lɛŋnden nden nin.»

Piɛile Yeremi len

¹⁶ Yáà ciiyo Baruk po Neriya-o sɛbɛ lesei kon yɔngoo, mí piɛi Mɛlɛka aa:

¹⁷ «Àá Maalii Hala, nɔm siɛndi ba nɔmndo ni, má soli halataalaa a lɛŋnden, a kpaaya nɔm bɛndoo. Ɲɛ-ɲɛ kindu a nɔm te.

¹⁸ A tosal vanndacieea dɛnɛ kɛndɔɔ háá o lambi vaa pilɛndɔɔ, kɛ te kala-ncuawva tosa pɛ hakio, a tuisi cuavaa ndaa sangaa coo le tɛɛmbuu kon. Hala co o bɔɔ-o a Hala kpaayaa n co ni, diola nɔmndan aa: ‹Mɛlɛka-Nɔ-Kpaayaa-Kpow-vo.›

¹⁹ A nɔ bɔɔ tuula bɛndulan, la n peelu a kpaaya bɛndoo lan pɛɛn! A nɔ hɔlten o kelala vanndacieea coo. Mɛɛ kela vana-vana co yɛ n bii vanndacieea ni, mɛɛ kɔmnde dɛnnda ndalan le co yɛ.

²⁰ A tosa sindɛ dɛnnda kɔndɔfiltan a kaamaalan o lɛŋnde Esipte len nin. Háá hau, tɔ́ɔ́ nɔmndo co o bɔɔ Israɛlla a vanndacieea tɛɛn mɛɛ naa n co ndi cɔu sunsun yɛ.

²¹ A soli vanaa nɔmnda, Israɛlaa o lɛŋnde Esipte len nin a ba nɔm mayoomu bɛndoo, a dɛnnda kɔndɔfiltan a kaamaala n va tosaa lan, mí siòònde bii vannda taw.

²² Má ke nda lɛŋnde nɔm óò mɛnalan fuɲaa ndaa mamaa le nda yɔngoo len, lɛŋnde cɔlua a tɔlɔɔlan la naŋ nin taw-taw len pɛɛn.

²³ Má hun cal o lɛŋnde len nin. Kɛ a tui nɔm diom te, a kela o tɔŋnda nɔmndan coo le, a tosa dɛnnda nɔm óò dimul nda le tosaa kpow lan te. Le hee n cuu dɛnnda palaalan ndan kpow ni!

²⁴ Sunsun, Babilɔnnda co kpaakio tangullo le nambaa mà bii kobio. Kobio delnin Babilɔŋaa tiila ndu a cɔwvo-a o ba, mà cuu o mɔɛi cɔwve bɛngu, yima fofolan a nàà n'kɔnyaa. Kámáá a ce le! Ɲɛ n dimi-o peelun.

²⁵ Kobio hoo co delɔɔ Babilɔnnda o ba, Maalii Hala, le yɛɛ nɛ n co yɛ ya niko dimullo aa ya piondu lɛŋnden a volion mì cua seiya?»

Mɛlɛka mulul Yeremi

²⁶ O kon mí Mɛlɛka dimul Yeremi aa:

²⁷ «Ya Mɛlɛka, ya co Hala le ɲaa yoomaa kpow ni. Vɛ̀ɛ̀ dɛnɛ pum co, o kendu a ya-o?»

²⁸ Lelan diom Mɛlɛka dimi-o co hoo ni aa: «I co kobio ho malɔɔ Babilɔnnda a Nebukanɛsar masa ndaa o ba, mà bii ndu.

²⁹ Babilɔŋaa delnin kobio ho coo a cɔwvo-a malnin ndu yin, mà lom cɛila ndáà lum Baal ansan o yindɔla ndalan coo lan, cɛila ndáà solul ndu sálàla mamɔilan lenin le ya kɔllo tɛɛmbuuo lan pɛɛn.

³⁰ Kani kabi o cuaambɔyɛi ndɛi nin, dɛnnda hɛnan ya le lan kposon Israɛlla a Yudaa co tosaa ni. A toɲa, ɲɛ-ɲɛ celen Israɛlla co coo le, fɔ ya kɔllo tɛɛmbuuo.» Sɔɛi fula Mɛlɛka o sondo-e co ken ni.

³¹ Kani kabi kobio ho kilan háá hun bii a paalen nden hau, kɔl tambɛiyo a kɔltuw bɛndoo tuŋ ya sɔla a ndu ni. Lelan maa i ca ndu bɛɛ a lehɔl te.

³² Israɛlla a Yudaa tɛɛmbuu ya kɔllo a dɛnnda vɔɔnnda nda tosa lan. Nda pila, masaa ndaa, simlacia ndaa, vanaa-solia-lasálàà ndaa a vanaa-tɛɛngaa-diom Hala-a ndaa, vannda Yuda a vanaa co Yerusalɛm-nda.

³³ A mulul-la hɔlla le, má mulul-la kɔɔ. Nduyɛ o co lɛhau le ya co nda pɛɛkoo le, kɛ a yeŋnun te, a bii silaa le.

³⁴ Má kɛsi ɲɛm lamáánndon o cɛi diola nilan la co veelɔnndo nin-ndo nin le ndu nɔɔliaa.

³⁵ Má tangul tombon le Baal o bóllo Bɛn-Hinnɔm nin, le Molɛk poaa ndaa a cuavaa ndaa laandua sálà loamaa solullo. O co yɛ ya le dimul nda ken te, yiyan ni kue bɛɛ o ken te. O dɛnnda lamààla lan tosaa nda luei Yudaa o pɔwlan nin ni.

³⁶ La co dimio a Yerusalɛm aa: «Cɔwvo, yima fofolan a nàà n'kɔnyaa tɛɛmbuu ndu mó del masaa Babilɔn o ba.» Kɛ ɲɛ ya Mɛlɛka, Hala Israɛlla co dimi a kobi kalaa-o co hoo ni aa:

³⁷ I co nda mɔɔsiaa fulaa o lɛŋii yáà puusiaa nda mí toaw nda a kɔltuwvo, a yolɛi a o kɔl ni fulaa nin-nde nin, mì mingi nda o fondaa ho, mì hun kɛsi nda lon nila ɲulu.

³⁸ A muungunin mà siŋnun vanaa nia, mì ya i va Hala ndaa.

³⁹ I yɔngunin nda kɔl pilɔɔ a yiyan pilɔɔ, haliko ma vo ya lɔ́ɔ́-lɔ́ɔ̀ le mɛɛ nda sɔla dɛnɛ kɛndɔɔ le nda pila a le cuavaa ndaa nda a makɔɔ yɛ.

⁴⁰ I yiinin kpema fɛɛn-fɛɛndo a nda. I mulul-lɛnin nda kɔɔ le. I tosalnin nda dɛnɛ kɛndɔɔ mì tosa ma vo ya o kɔlta ndalan nin, o kon a kue lɛnin ya levil te.

⁴¹ Ɲɔɔ hɛnannin ya le nda dɛnɛ kɛndɔɔ tosallo, o kon i tɔalnin nda tɔlɔɔ kpeekpeiyo o lɛŋnden nden nin a kɔl nuu kpow, a yiyan nuu kpow.

⁴² Kani Mɛlɛka dimi maa: mɛɛ yáà tuisi vannda ha dɛnɛ palaa bɛndoo hoo kpow coo yɛ, lende ya tuisinin nda vɛlɛ dɛnɛ kɛndɛ ya yiilu nda kpemaa-o coo ni.

⁴³ La co dimio aa: «Babilɔnnda o ba bɛngu lɛŋnden nden le va ni, le siŋnun nihau lɛŋnde vesɛilen, vanndacieea co lenin te, visia bɛɛ a co le.» Nduyɛ, vannda muungunin mà pendu lɛŋnde o lɛŋnden nden nin.

⁴⁴ A toɲa, vannda muungunin mà pendu yondolan a volion o tàndá Bɛnyamɛn-ndo nin a o Yerusalɛm balɔɔ, o kobila Yuda lan nin, o kobila co o pembon coo lan nin, o kobila co o dɛngbɔɔ nin-ndan a o kobila co o tàndàá Nekɛv nin-ndan nin, mà toosiaa sɛbɛla leseilan, mà hol pondan lecoo, mà sɔla seiya. Kani i minginin nda mɛɛ nda va paandu yɛ.» Sɔɛi fula Mɛlɛka o sondo-e co ken ni.