Yeremi 31 - BII BILA

¹ Diom Mɛlɛka soo-o co hoo ni aa: «Paale vanin mì siŋnun Hala yungula Israɛlla kpow, mì nda siŋnun vanaa nia.»

Israɛlaa lo yoomu-a muungu o nda lo

² O Mɛlɛka dimi-o co hoo ni aa: «I tosal vanaa mɔɛi cɔwve bendu-a kɛndɛi o lɛŋnde veselɛilen nin, lelan pɛngio vanin le Israɛlla.

³ Levil polon Mɛlɛka cɔmnun ya ni, mì dimul ndu aa: ‹I kaola nɔm le lɔ́ɔ́-lɔ́ɔ̀, lelan ya co nɔm canyɛi nii cɔm ni.›

⁴ I minginin nɔm tangul, nɔm cuanndo Israɛl, a muungunin ma cua dundula nɔmndan, mì la sim niaa vanaa kponyoa latulu.

⁵ Má mingi nakɔla n'rɛsɛnndan soli o pembon Samari coo, o kon mì vanaa lanakɔa de lan tɔnɔ.

⁶ Paale hunnin vɛlɛ mì kpalilla yonda o pembun co o tàndá Efraim-ndo nin-ndon coo aa: ‹La cɔn mì n helnun Siɔn o Mɛlɛka Hala naa lo.›

⁷ Kani Mɛlɛka dimi aa: ‹La yonda a kɔlkɛndɔɔ le Israɛl, la viow kponyoo a kɔlta niaalan kpow, le lɛŋnde hiow lɛŋii vanaa-mangalaa-isɔɔa len.› La yonda mì la dimi aa: ‹Mɛlɛka, cííndiaa vanaa nɔmnda, Israɛlla lo yoomu-a pɛɛn.›

⁸ I co nda cua o lɛŋnde maluaŋnden mì mingi nda, mì cuungiaa nda fulaa o lɛŋii levil-ville nin. Vana-vana vanin ndon: vanaa sumɛiya a namtaa, komsaa a vanaa lafolia, sɛ́lɛ́ bɛndoo pila nda cuungiannin ndon ni.

⁹ À co hunɔɔ a caŋndan, mì liilaa nda o tɛɛlɔnnda ndalan nin. I kɔanin a nda o peela pɔmbɔla mɛnndan ma co taw lan, mì kei a nda o nɛi co bɛɛn-bɛɛn o kɔlan-ndo, nɛɛ nda boŋnin mà del te-a. Kani fuɲaa ya co le Israɛl ni, Efraim co po ni tasoo ni.»

¹⁰ Niaa vanaa-mangalaa-isɔɔa, lá yaŋnún sɔɛi Mɛlɛka-e, mì la dimi ndi o lɛŋii ibungai co leville nin aa: ‹Mɛlɛka ndóò sɛŋi Israɛlla ba-ba fee, kɛ o co nda mingi mɔɔsiaa, mò handu nda hɔlten coo mɛɛ vana mandaa n'cɔloo handu cɔlua ndɔa hɔlten coo yɛ.

¹¹ Kani Mɛlɛka baŋa Israɛlla, o soli nda yaamɔɔ hiow nda kpaayaa-o o ba.

¹² A hunnin a yoondiaala kɔlkɛndɛlan o pembei Siɔn coo, a vanin ifili-filiei o ɲɛm Mɛlɛka yɔngu nda-on coo: maalon, mɔima yɛngian, cuɛima sɛnɛiyan, saa, cuinnda a nawva. A vanin maa nakɔ co o pɔɔliaa ɲɛkɛndɛi-yo, dɛnɛ palaa ve lɛnin nda kɔɔli le.

¹³ O kon cuaambɔa laandua vanin yolan a ɲaaloo, felengia a bɛndua yuuvɛiya dɔawnunnin ɲaale latulu. I minginin mɔnɛi ndɛi ɲaaloo, mì ɲɔɔlu nda. I yɔngunin nda kɔlɲulu bɛndoo o dɛnɛ paalaa kɔɔli.

¹⁴ I piminin vanaa-solia-lasálàá visin macuɛiyon, mì vanaa nia pim ɲɛm nin kɛndɔn.›» Sɔɛi fula Mɛlɛka o sondo-e co ken ni.

¹⁵ O Mɛlɛka dimi-o co hoo ni aa: «Yéélan la co sɔɛi Rama. Koŋullo a caŋnda fúkpàà-fùkpààlan la co sɔɛi lon. Rasɛl co cuavaa ndɔa caŋndo ni, o kɛɛ ɲɔɔlu nda co ndu-o, kani cuavaa ndɔa cuu.»

¹⁶ Kɛ ɲɛ Mɛlɛka dimul ndu-o co hoo ni aa: «Mei caŋndo mà vɔɔsuu mɛmɛan, kani i kenin nɔm sala sanga nɔmndo, cuavaa nɔmnda fulanin o lɛŋii yaamɔaa ndaa nin mà muungu.» Sɔɛi fula Mɛlɛka o sondo-e co ken ni.

¹⁷ Siɔdii nɔmndo naŋnin, cuavaa nɔmnda muungunin o lɛŋnde ndalen nin.

¹⁸ I tuei cɛɛŋɔnnda vannda Efraim co lan ɲɛkɛndɛi, a co dimio aa: ‹A lɔɔ naa bɔɔ a hɔlta kalalan le naa mingio o nɛi, maa mɛɛ nda sila naw tova nila kaloo yɛ. Kɛ mingin naa o ibuŋ mì n muungu lekɛ́ndɛi. Kani nɔm Mɛlɛka co Hala naa ni.

¹⁹ A toɲa náà n kɔɛ nɔm levil, kɛ sunsun n sina maa n cee tosa le. N sina tɛɛmbuula naalan mí n biinun balan o lebol, siɛmbulan la bii naa mí n kiolu vai le dɛnnda naa n tosa o cuaambɔyɛi nin-ndan.›

²⁰ Efraim co po ni kaolaa ni, po ya handu kɔllo coo-o. Telen oo telen ya va pɛ ndu dɛnɛ palaa tuisio coo, kɔllo faŋan ya o ndu lo le. Yiyanndo tuŋ ya yiyan ndu coo ni. Kani kaolaa pila ya kaola ndu ni, ɲííye pila ya nɔ a ndu ni.» Sɔɛi fula Mɛlɛka o sondo-e co ken ni.

²¹ Baŋ tɔɔmaselelan o nɛi nɔmndo demullo, caa kɔlan o nɛiyo coo, o nɛi n co kɔlan coo-o pɛɛn. Mbɔ̀ muungu nanu, Israɛl ya kaola-o, muungu o kobila nɔmndan nin.

²² Háá telen kuɛɛ n lo yɛnin balɔɔ nɛɛ-nɛɛ ka, nɔm cuaambɔ laandu lanila kaloo ho? Kani Mɛlɛka soli dɛnɛ sɛnɛiyo o lɛŋnden coo, vanalanɔɔ co nin kela vanapɔnɔɔ ni.

Mingio tangullo a kpema sɛnɛiyo

²³ O Mɛlɛka-Nɔ-Kpaayaa-Kpow-vo, Hala Israɛl-lo dimi-o co hoo ni aa: «Telen ya minginin tàndá Yuda-o a kobila ndɔlan maa paandu-o, vannda diminin vɛlɛ aa: ‹Màá Mɛlɛka dɔw nɔm duaa, calta dɛnɛ sandaa, pembii diandɛi!›

²⁴ O kon vanaa co yondolan nin-nda a vanaa co o kobila Yuda lan nin-nda, vanaa vàá a vanaa mandaa n'cɔlua a calnin latulu o lɛŋnde len nin.

²⁵ Kani i kenin vanaa co o sangaa nin-nda kɔlɲuloo mì mingi vanaa nɔ lɛ mayoomu le-a yoomuan.

²⁶ Lelan vannda diminin aa: ‹Yáà tiondɔɔ mí ca maa lɔma ya lɔl-lan ma mala ya.›

²⁷ Mɛlɛka dimi aa: «Nanu a telen bingi, i tosanin mì vanndacieea a cɔlua tiw Israɛl a Yuda mɛɛ vana saŋ yɛiye o ciɛi nin nuaa yɛ.

²⁸ Háá hau, simullo tuŋ ya co nda ni, mí sungu nda, mí komba, mí kala nda, mí tɛɛmbuu, dɛnɛ palaa tuŋ ya va nda tuisio coo ni. Kɛ kɔɔlimandɔ nin, i co nda hɔlla mulul, i minginin nda cɔvɔɔ a nda mingio tɔlɔɔ.» Sɔɛi fula Mɛlɛka o sondo-e co ken ni.

²⁹ O telen kon vannda dimi lɛnin taloo ho le aa: ‹Fuɲaa de rɛsɛŋun puiyon, mí ciŋndon vaaliaa cuavaa ndaa.›

³⁰ Kani te vanndo de pɛ rɛsɛŋun puiyon, ndu ciŋndon vaaliaa ni. Vana-vana sɔlanin piɔ́mndo le yɔŋ vɔɔn ndɔ o tosa-o.

³¹ Mɛlɛka dimi aa: ‹Paale vanin mì yii kpema sɛnɛiyo a vannda Israɛl a á Yudaa.› Sɔɛi fula Mɛlɛka o sondo-e co ken ni.

³² O venin maa kpema ya yii a fuɲaa ndaa telen ya bii nda baa, le nda solio o lɛŋnde Esipte len nin-ndo le. Kpema kon ndu, má tɛɛmbuu ndu. Nduyɛ, ya va vana nda bɛndoo ni. Sɔɛi fula Mɛlɛka o sondo-e co ken ni.

³³ Mɛlɛka dimi aa: ‹Kpema va naa tɛɛn naa Israɛlla-o va hoo ni maa te palɛi ken hiow pɛ, i vownin tɔŋnda nilan nda nin mì sɛva vɛlɛ lan nda o lakɔl. I vanin Hala ndaa mì nda va vanaa nia.

³⁴ Vana-vana pɛɛku lɛnin caanda le. Vana dimul-lɛnin puapilɛ ndɔɔ aa: ‹La sina Mɛlɛka› le. Kani nda kpede a sinanin ya, kandɔɔ a cuaambɔɔ kɔ tiiya a kaasonɔɔ dí. Sɔɛi fula Mɛlɛka o sondo-e co ken ni. Kani i malnin nda haki le sɔvun ndan, i loonun ndɛnin a hakila ndalan te.

³⁵ Mɛlɛka, o kɛsi paalen o fonda ndɔɔ-o, o co ɲɛ-tengaa yɔngoo ipala-o, o dimul paangei a loeon le vaa ɲɛ-tengaa yɔngoo icɔl-lo, o tosa mí mɛmma ihɛllan ma hel kpungbuulan a ba ndɔ-o, o nɔ diolan aa Mɛlɛka-Nɔ-Kpaayaa-Kpow-vo-o dimi lende ni.

³⁶ Sɔɛi fula Mɛlɛka o sondo-e co hee ni: Te sɔɔn ya handu mun paandu-on pɛngi pɛ tosanndo, mɛɛ cuavaa-imamaa Israɛl-la bɛɛ ve lɛnin lelɛŋ a ba nda le.

³⁷ O Mɛlɛka dimi-o co hoo ni aa: Te vana nɔla pɛ helɔɔ halataalaa tuu te kon te yingila lelɛŋndo sinaa, mɛɛ i kɛɛnin cuavaa-imamaa Israɛl-la le dɛnnda vɔɔnnda kɛ́-kɛ̀ nda tosa lan! Sɔɛi fula Mɛlɛka o sondo-e co ken ni.»

³⁸ Sɔɛi fula Mɛlɛka o sondo-e co hee ni aa: «Ɲɔɔ bendu lɛ le, mì kobio mingi tangulɔn cɔnɔnndo o cɛi coocoo Hananeɛl-lo, kɔ bii o dio sɔngio.

³⁹ A salunin pɛɛngula sɛnɛila kobio kandɔɔ a ba paalen le del-lo, a kpengii pembei Karɛb, mì la tundu le kɔlan a ba Koat-o.

⁴⁰ Ból vanvílɛ́iya a ból lapullo kpede, keiyo a fondala helaalan kɔlan fulaa a bóllo Sedrɔn, kɔlan tiiyaa háá o sɔngilen o Dio-soa a ba paalen le can-ndo kpow vanin le Mɛlɛka ni. Ɲɛ-ɲɛ faŋan ndɛnin lecoo le, ɲɛ-ɲɛ sungun ndɛnin le fɛɛn a fɛɛn te.»