Yeremi 30 - BII BILA

O Hala dimi le Israɛl tosallo-o

¹ Mí Mɛlɛka soaa o Yeremi lo, mó dimul ndu aa:

² «O Mɛlɛka Hala Israɛl-lo dimi-o co hoo ni aa: ‹Sɛva sɔɔn ya dimul nɔm-ndon kpede o sɛbɔɔ nin.›»

³ Sɔɛi fula Mɛlɛka o sondo-e co hee ni maa paale vanin, mì mingi Israɛlla nda Yudaa lɛŋnde yáà yɔngu fuɲaa ndaa mamaa len o ba, yungu ni co o biyɔɔ nin-ndo pɛɛn. Mɛlɛka dimi lende ni.»

⁴ Sɔɔn Mɛlɛka dimi le Israɛl a le Yuda-on co mun ni.

⁵ O Mɛlɛka dimi-o co hoo ni aa: «N co ivóólun-vóólunnde tueyɔɔ. Siòònde ni, o co dɛnɛ kɔlɲulu le.

⁶ La ɲuuniaa vɔ hau sɔɛi ken mì la sina, te la ce nin vanapɔnɔɔ violɔɔ. Le yɛɛ nɛ ya co yɛ niko vanpiaandua kpow cɔu a balan nda o demboo coo mɛɛ dembe can vanalanɔ nɛi le violɔɔ? Le yɛɛ nɛ nda suuma yɛ má yii hɔlla nuaa?

⁷ Àá má cè dɛnɛ palaa! Le sel naa fɔ́! N ci vɔ lepaa maa leen te, telen imɔnɔɔ co hoo le polale Yakɔb len ni. Kɛ nduyɛ ɲɛ-ɲɛ yɔŋnunnin nda le.»

⁸ Sɔɛi fula Mɛlɛka-Nɔ-Kpaayaa-Kpow-vo o sondo-e co hee ni aa: «Paale len, i yimiyiminin yɔm ndɔ lebol co nɔm o ikɛsu-o, mì kilikili yoei, o kon a ve lɛnin baala tosa le n'mial te.

⁹ Ya Mɛlɛka Hala ndaa, a David masa ya kenin nda-o nda tosalnin baalaa ni.

¹⁰ Nɔm Israɛl vana ni baalaa yɛ, siòòŋii bii nɔm te, ya Mɛlɛka dimi lende ni, vu n'dial te, kani i co nɔm ciindiaa vanaa co levil-la o ba, mì baŋa cuavaa nɔmnda, mì soli nda o lɛŋnde nda co o biyɔɔ nin-nden nin. Yakɔb muungunin, o vanin o pɛngio nin nila ɲulu fɛɛ, vana-vana venin le ndu kpeeŋiaa le.»

¹¹ Sɔɛi fula Mɛlɛka o sondo-e co hee ni aa: «Kani i co nɔm ikɛi le nɔm ciindiaa, i diwnin vanaa-mangalaa-isɔɔa niaa va a sɛŋiannda tɛɛn-nda, kɛ niaa niaa, i diwnin niaa le. I saangiaanin nɔm, kɛ le nɔm mingio o nɛi sandaa coo ni, kani i nɔla nɔm biyɔɔ maa vana tɛɛmbuu isɔɔ loo le.»

¹² O Mɛlɛka dimi-o co hoo ni aa: «Dɛnɛ palaa nɔmndo nɔ danda le, yɔŋulɔn nɔmndo singu le.

¹³ Vana-vana co nɔm ahɔl mulul te. A dema boolɔnndan cɛw, kɛ nɔm nɔm, o nɔmndo nɔ makòó le.

¹⁴ Vanaa ndáà yeema nɔm-nda kpow a pɔɛɛn nɔm, a buulan ndɛ le nɔm te. Kani i lɔɔ nɔm maa yaamɔɔ. I tosa iɲíí a nɔm le nɔm mingio o nɛi le, kani tɛɛmbuula nɔmndan la va sɛ́lɛ́, tɛɛmbuula nɔmndan láà vɔw bɔɔ.

¹⁵ Le yɛɛ nɛ n co yɛ caŋndo a dɛnɛ palaa, le ɲɛ kindilaa cuunin nɔm kuee loo? Kani le tùú tɛɛmbuula nɔmndan la co sɛ́lɛ́, mì hakila nɔmndan la vɔw taw-vo ya tosal nɔm lende ni.

¹⁶ Kɛ vanaa co nɔm kotaa-a sɔlanin kotaa, hɛli co le, yaamɔaa nɔmnda kpede a kɔanin o biyɔɔ nin. Vannda ciimbuunin ɲɛm vanaa va ɲɛm niaan ciimbuuo-a, mà kɔɛnnun a ɲɛm vanaa kɔɛnnun a ɲɛm niaan-nda.

¹⁷ I minginin nɔm mɛɛ n va paandu yɛ, mì singi boolɔnnda nɔmndan. Kani a co nɔm veeloo aa: ‹Nɛŋi mako le›. Siɔn ni, vana-vana nɔ mako a ndu le.» Sɔɛi fula Mɛlɛka o sondo-e co ken ni.

¹⁸ O Mɛlɛka dimi-o co hoo ni aa: «I co niaa mingi o fonda niaa paandoo, niaa yungu Yakɔb-o, ɲííye vanin ya a calta ndalan, kobi kɛ́-kɛ̀ minginin tangulɔn o foofola ndɔlan coo, cɛila sɔvɛ-sɔvɛlan la muungunin o fondala ndalan.

¹⁹ Vana lonin kɔɔlikɔɔli mà tuei nda condon a yoondiaala kɔlkɛndɛ lan. I kuinin nda taw, a dɔɔnannin te, i siinguunin nda vanaa sɔvɛa, vana kilunnin nda yii le.

²⁰ Cuavaa ndɔa muungunin maa paandu, mà muungu cuungianndo ya o hɔl, i simulnin vanaa-vanaa co nda delɔɔ coo.

²¹ O nda pila tɛɛn simlacinɔ ndaa fulanin ni. Vana pilɛ o nda tɛɛn vanin nda bollen ni. I cɛlnin mò sɔɔnguu ya ikɛi, kani te o co mì cɛl vana le, nɛ̀ɛ́ tɔɔndan yɛ yoomu ndɔɔ pisio le ya sɔɔnguuo ikɛi? Mɛlɛka dimi lende ni.

²² O kon la muungunin vanaa nia mì va Hala niaa.

²³ Piɔɔ hoeyii fùkù-fùkùi Mɛlɛka-o co hunɔɔ, kɔltuw Mɛlɛka-o poondan, felenfelenndo cɛn, o co hiŋnɔnndo vanaa vɔɔnda o bollen coo.

²⁴ Kɔltuw bɛndu Mɛlɛka-o muungu le, mɛɛ mò tosa ɲɛ o bɛnda le tosaa-o kpede, ɲɛ va ndu o kɔl-lo pɛɛn. Paale vanin mì la bii ken bila.»