Yeremi 24 - BII BILA

Kambɛila tiɔnnda n'voosu lan

¹ Mí Mɛlɛka cɔm ya kambɛila tiɔnnda n'voosulan, la va lakɛsiaalan o Cɛi-Hala-o hɔl-ndɔ. Nebukanɛsar masaa Babilɔn ndóò bii nin Yekoniahu po Yehoyakim, masaa Yuda-o, simlacia Yuda, sumnda a vanaa caa baalala laba súú-súù ka-a, mó kɔa a nda Babilɔn.

² Voosun va o kambɛi tasoo nin-ndon va n kɛndɛ-kɛndɛ maa voosun tasen keleŋa divɔɔ-on. Voosun va o kambɛi diinndɔɔ nin-ndon mun niŋ te, vanáà nɔla mun dio le, kani tambei pila mun óò tambu ni.

³ Mí Mɛlɛka ɲuna ya aa: «Yeremi, yɛɛ nɛ n co yɛ cɔu?» Mí mulul ndu aa: «Vooson ya co cɔu ni, naŋɔɔ pila n naŋ-ndon naŋ ni, n niŋ toon yɛ, vana nɔla bɛɛ mun dioo le, kani n tambu bɔɔ.»

⁴ O kon mí sɔɛi Mɛlɛka-e dimulun ya aa:

⁵ «Sɔɛi ya Mɛlɛka Hala Israɛlla dimi-e co hee ni: Mɛɛ voosun kɛndɔn n naŋ o tofaa yɛ, lende koni ya co vanaa nda bii haa Yuda, mí toaw nda nanu, má kɔa a nda háá Babilɔn-nda co ni.

⁶ I canin nda mì tuinun nda iɲíí, mì mingi nda o lɛŋnden nden nin. I siminin nda yili, i tɛɛmbuu lɛnin nda le. I tɔalnin nda, i sungu lɛnin nda le.

⁷ I kenin nda sinapɛngoo, mà bii bila maa ya co Mɛlɛka ni. A muungunin ya o ibuŋ a kɔlta ndalan kpow. O kon a vanin vanaa nia, mì ya i va Hala ndaa.

⁸ Kɛ ɲɛ ya Mɛlɛka co dimi le Sedekia masaa Yuda, le simlacia ndɔa, le vanaa kɛ́-kɛ́ lo yoomu Yerusalɛm, a faŋan o lɛŋnde len nin te-a a vanaa kɔɛ Esipte-a-o co hoo ni: mɛɛ vana tosa a voosun hiw ba tambei, n nɔla lɛ dionnɔn te-on yɛ ya co tosa a nda ni.

⁹ O kon siòònde biinin masɛi co o ceendo coo-e kpow a dɛnɛ palaa ya tuisinin nda coo-o. O lɛŋii ya sɛŋinin nda nin-nde kpede, vannda vanin tɔɔmaseloo cuaa a nda, le vanndo siɛmbulan tuisio, le ndu mamɔɔ, le ndu yeowlan a le ndu dangaa dɔvɔɔ.

¹⁰ I tuisinin nda cɔwvo coo, yima fofolan a nàà n'kɔnyaa háá mà cuu o lɛŋnde ya yɔngu nda len nin, le ya yɔngu fuɲaa ndaa mamaa a nda pila len pɛɛn.»