Yeremi 23 - BII BILA

Sɔɛi dimin le simlacia vɔɔnda-e

¹ Mí Mɛlɛka dimi aa: «Dɛnɛ palaa vanin o bɔɔ. Simlacia vanaa nia co cɔlua malɔɔ ɲawvo, ma va laasianndo ba-ba fee.»

² Lelan sɔɛi fula Mɛlɛka Hala Israɛlla o sondo le simlacia kan-nde co hee ni aa: «La mal cɔlua nia ma laasian ba-ba fee, la hendu nda hɔlten coo le. Ya bɛɛ, i co niaa mululɔn le dɛnnda niaala vɔɔnndan.

³ O kon mì ya pila nuwviaa a tɔ̀a lo-a o lɛŋii yáà sɛŋi nda-e nin kpow, mì mingi nda o hèé ndaa nin. I vangalanin nda lon mà kui taw.

⁴ I handunin nda vanaa mandaa n'cɔlua kpeekpeiya coo. A vueinunnin nda le, a lueinin nda isiòòn te. O kɛ́-kɛ̀ laasian ndɛnin mò lo le.» Sɔɛi fula Mɛlɛka o sondo-e co ken ni.

⁵ Mɛlɛka dimi aa: «Paale co hunɔɔ, mì tosa mì hɔ́ɔ́ velun o polale David len nin, masa kɛndɛ kɔlkaloo o vanin ni. O tosanin masalen o lɛŋnden nin o sakpoyɛi a o sandei nin.

⁶ O paale ndɔlen Yuda sɔlanin baŋaa ni, Israɛlla vanin nila ɲulu fɛɛ. Diola nda kenin ndu lan la vanin ni aa: ‹Mɛlɛka vana naa ciindiaa.›

⁷ A toɲa, Mɛlɛka dimi aa: «Paale co hunɔɔ, vannda ve lɛnin mɛnan aa: ‹Le Mɛlɛka yoomaa, o soli Israɛlla Esipte-o› le.

⁸ Kɛ a vanin mɛnanndo aa: «Le Mɛlɛka yoomaa, o soli Israɛlla o lɛŋnde maluaŋ-nden nin a o lɛŋii kɛ́-kɛ̀ ndóò tow nda nin, mó mingi nda o lɛŋnde ndalen nin-ndo!›»

Sɔɛi dimin le vanaa-tɛɛngaa-diom Hala-a vɔɔnda-e

⁹ Sɔɛi dimin le vanaa-tɛɛngaa-diom Hala-a-e co hee ni. «Kɔl nuu co o sangaa nin, diallon kpede n co ya ɲiiyaa. I muungu maa vana hiw ba mɔiyan kolɔɔ-o, maa vana co o kpaaya mamɔiyo bɛngu-o le Mɛlɛka a le sɔɛi o dimul-la-e aa:

¹⁰ «Lɛŋnden le pɛ a vanaa co suundaa-a. Le co o mɔnɛi nin le dangala pɛ len coo lan. Billo vesan o vɔ̀lɛ́la co o lɛŋnden nin-ndan kpede. Le kɔlan dɛnɛ vɔɔndo tosaa nda caa kiltan ni, le dɛnnda niŋ te lan nda fula diallon ni.

¹¹ Hali vanaa-tɛɛngaa-diom Hala-a a vanaa-solia-lasálàá a vow balan o laasiaa nin. Háá o cɛi nuu nin, foofola dɛnnda ndala vɔɔnndan la co lon.» Sɔɛi fula Mɛlɛka o sondo-e co ken ni.

¹² «Lelan nɛi ndaa culukunin ni. A kuindiannin o ɲumndan nin mà deli. Vɔsi ya mululunnin nda-o, i co nda dɛnɛ palaa tuisi coo.» Sɔɛi fula Mɛlɛka o sondo-e co ken ni.

¹³ Mí ca dɛnnda nɛinun ya lan vanaa-tɛɛngaa-diom Hala-a tɛɛn, o diola hala Baal tan nda va sɔɛi ni, mà luei vanaa nia o pɔwlan nin, Israɛlla pɛɛn.

¹⁴ Kɛ vanaa-tɛɛngaa-diom Hala-a Yerusalɛm nda, mí ca maa dɛnnda lamààlan nda cal coo ni: a co suundaa, a co còòlan dimio, a co vanaa tosaa dɛnnda vɔɔnda simndan kɔɔli. Vana-vana co kɛɔ le dɛnɛ vɔɔndo malɔɔ. Nda kpow a muungu ya o hɔl maa vannda Sodɔm, hiyan kɛ́-kɛ̀ co vannda Yerusalɛm a haa Komɔr tɛɛn te.

¹⁵ Lelan o Mɛlɛka-Nɔ-Kpaayaa-Kpow-vo dimi a vanaa-tɛɛngaa-diom Hala-a kan-ndo co hoo ni aa: «I co nda mɔnɛi miɔɔ ma de ndi, mì koesi nda bɔ̀tàá. Kani nda vanaa-tɛɛngaa-diom Hala-a Yerusalɛm tosa ni, mí dɛnɛ vɔɔndo tiw o lɛŋnden nin kpede.»

Vanaa-tɛɛngaa-diom Hala-a lacòòvaa

¹⁶ O Mɛlɛka-Nɔ-Kpaayaa-Kpow-vo dimi-o co hoo ni aa: «La yaŋnun sɔɔn vanaa-tɛɛngaa-diom Hala-a kalaa le, huiyo fúú nda co niaa ni. Sɔɔn nda co niaa dimullo-on, nda pila co mun yiyanndo ni. O co ya Mɛlɛka o ba le n fula le.

¹⁷ Vanaa co ya mamɔɔ-a co dimio aa: ‹Mɛlɛka dimi aa kɔlɲuloo vanin le niaa ni.› Vanaa co kan yiyannda nda pila lan kínɛí tolɔɔ kɔɔli-a co dimio aa: ‹Dɛnɛ palaa komalnin niaa le.›

¹⁸ Kɛ ɔ́ɔ̀ vana va lon telen ya va kon sɔɛi yo? Nɛ̀ɛ́-nɛ̀ ce yɛ ya o sɔɛi, mó tuɛi ɲɛ ya dimi-o? Nɛ̀ɛ́-nɛ̀ yaŋ yɛ nilan o sɔɔn nun, mó bii mun bila?»

(Yeremi)

¹⁹ La tofa vɔ hoeyii felenfelennde hunɔɔ: kɔltuw Mɛlɛka-o co o nɛi, piɔɔ hoeyii fùkù-fùkù kon pɛɛn, o co vanaa tosaa dɛnnda vɔɔnda tolɔɔ coo.

²⁰ Kɔltuw Mɛlɛka-o cuunin te, háá fɔ mì ɲɛ o kelu le tosaa-o cuu peelɔn. Paale vanin mì la hun bii bila.

(Mɛlɛka)

²¹ I vim vanaa-tɛɛngaa-diom Hala-a kan te, ma va kɔlan a kiltan. I dimul nda ɲɛ-ɲɛ le, ma va kɔlan sɔɛi a diola nilan o sondo.

²² Te ndáà va pɛ nɛɛ ya va sɔɛi-ya, a va vanaa nia sɔɔn ya dimi-on tɛɛngul, mì ndáà faŋa nda o nɛi nda vɔɔndo coo, mì ndáà mal dɛnnda vɔɔnnda nda co tosaa lan.»

Mɛlɛka co nɛɛ-nɛɛ ka o ceendo coo

²³ Sɔɛi fula Mɛlɛka o sondo-e co hee ni aa: «Mò va maa Hala ca sɔɔn co ndu macɛlu-on koni ya co ni? Ɛ-ɛ, Hala ca vɛlɛ sɔɔn levillon-ndo ya co ni!

²⁴ Vɛ̀ɛ̀ vanndo nɔla vionnɔnndo nɛɛ yililia pum mì bumba ndu cɔu?» Sɔɛi fula Mɛlɛka o sondo-e co hee ni. «I co nɛɛ-nɛɛ fee, o halataala a o lɛŋnden coo, vɛ̀ɛ̀ la sina ken te?» Mɛlɛka ɲuna lende ni.

La tuu billo a kullon te

²⁵ Ya Mɛlɛka, i tuei ɲɛ vanaa-tɛɛngaa-diom Hala-a co dimio-o. A co dimio maa o diola nilan nda co sɔɛi ni, kɛ còòlan fúú. A co dimio aa: ‹I sɔl lɔan, i ce vundulen.›

²⁶ Yɛɛ nɛ vanaa-tɛɛngaa-diom Hala-a ha nɔ yɛ o kɔl, ma co vannda còòlan dimullo? Sɔɔn nda pila co toosiaa-on. Háá lɔ́ɔ́ kuɛɛ ɲɔɔ lo yɛnin tosanndo lende?

²⁷ A yeema mi vanaa nia pɔɛɛnun a ya, a lɔma sɔlaama nda co cɔu vellaa-velle-an. Lende koni fuɲaa ndaa mamaa ndáà pɔɛɛnun ya ni, má mulin o Baal lo.

²⁸ Vana-tɛɛngaa-diom Hala sɔl pɛ lɔma ndɔ, ndu cɔm vannda lɔma o sɔl-lan! Kɛ te i yɔngu ndu pɛ yoongoo pum, o bɛnda mò tɛɛnguu ndu lende kpafii!» Vana tuu billo a kullon te. Mɛlɛka dimi lende ni.

²⁹ Sɔɛi fula Mɛlɛka o sondo-e co hee ni aa: Maa leyin sɔɛi nii co ni, maa kunduva pesipesi pow bandíláà-o.

³⁰ Lelan, sɔɛi fula Mɛlɛka o sondo-e co hee ni aa: «I co vanaa-tɛɛngaa-diom Hala-a co sɔɛi nii yɛlɛmaa-a ciŋilan.»

³¹ A toɲa, sɔɛi fula Mɛlɛka o sondo-e co hee ni aa: «Vanaa siingun kan nda pila vanaa-tɛɛngaa-diom Hala-a, i co nda ciŋilan. A sina kan hiyan co sɔɛi ndɛi a i nii tɛɛn te-a pɛɛn.

³² I co vanaa co kan vunduma fondoan cɔu-va ciŋilan.» Sɔɛi fula Mɛlɛka o sondo-e co hee ni. O còòla lan tombolaa nda luei vanaa nia o pɔwlan nin ni. Nduyɛ, i vim nda lekiila kɛ́-kɛ̀ le. I dimul nda ɲɛ-ɲɛ le. A co vanaa nia mako kɛ́-kɛ̀ soli le.» Mɛlɛka soo lende ni.

Mò va maa volɔɔl lusulaa sɔɛi Mɛlɛka-e co ni?

³³ Mí Mɛlɛka dimul Yeremi aa: «Vana-vana ɲuna nɔm pɛ, o va vana-tɛɛngaa-diom Hala, o va vana-solia-lasálà aa: ‹Ɔ́ɔ̀ yoongu Mɛlɛka nɔ le naa-o? Ɔ́ɔ̀ volɔɔla o co lɛ naa siilu lan?› A muli aa: ‹Mɛlɛka dimi aa niaa co volɔɔlan le ndu ni. Lelan o co niaa tuisi.› Mɛlɛka soo lende ni.

³⁴ Vana-vana dimi pɛ aa volɔɔlan ya siiluu ndu ni, o va vana-tɛɛngaa-diom Hala, o va vana-solia-lasálà te kon te vana celenndo, i kuelnin ndu a yungu ndɔɔ.

³⁵ O niaa bɛnda mì la ɲuunian vellaa-velle-o co hoo ni aa: ‹Vɛɛ Mɛlɛka muli yɛ?› Te kon te aa: ‹Yɛɛ Mɛlɛka dimi yɛ?›

³⁶ Kɛ la dimi lɛ aa volɔɔlan te sɔɛi Mɛlɛka-e co le dɛ! Sɔɔn niaan niaa pila-on co volɔɔla niaalan ni, kani la co sɔɔn Hala nɔ yoomoo o ba-on tundɔɔ, Mɛlɛka-Nɔ-Kpaayaa-Kpow-vo, Hala naa pɛɛn.

³⁷ Nuaa n ɲunanin vana-tɛɛngaa-diom Hala-o ni aa: ‹Vɛɛ Mɛlɛka mulul-lɛ nɔm, vɛ̀ɛ̀ o dimul-lɛ nɔm?›

³⁸ A kuuna Mɛlɛka kuuna niaa kon-ndo kpede, te la va pɛ hiovɔɔ laci a dimio aa volɔɔlan Mɛlɛka siiluu niaa ni, mɛɛ sɔɛi ndu Mɛlɛka dimi-e co hee ni aa:

³⁹ «I co niaa siilɔn o congú maa lavolɔɔ, mò kɔ viow niaa polon, niaa a kobi ya yɔngu niaa a fuɲaa niaa-o.

⁴⁰ I co tosa mì siɛmbulan la bii niaa le lɔ́ɔ́-lɔ́ɔ̀, la sɔla lɛnin bɛɛle va le niaa len te. Vana-vana pɔɛɛnunnin a ken o kɔɔ le.»