Yeremi 21 - BII BILA

Mulio le masaa Sedekia

¹ Mí Mɛlɛka dimul Yeremi isɔɔ le masaa Sedekia. Masaa Sedekia kon ndóò vim Yeremi Pasur, po Malkia, nda Sofoni vana-solia-lasálàá-o, le ndu dimullo ni aa:

² «Ɲuna Mɛlɛka le naa, kani Nebukanɛsar masaa Babilɔn co naa hinullo a cɔwvo, bɔɔle mì Mɛlɛka tosa dɛnɛ kaamaa le naa, mì Nebukanɛsar kalaa kɔɛ naa levil polon.»

³ Mí Yeremi dimul nda aa: «La kɔ dimul Sedekia aa:

⁴ Diom Mɛlɛka, Hala Israɛlla dimi-o co hoo ni aa: ‹La co masaa Babilɔn a vanaa ndɔa cɔvaa hun simul niaa-a cɔlɔbaa. Kɛ i tosanin mì vanaa co cɔwvo tosaa o kpakio laci-a ɲaanun, mà muungu o kobio nin.

⁵ O kon, mì ya pila tol niaa coo a cɔwvo a hiilɛi kɔl ni fulaa bɛndoo. Mì cɔm niaa yoomuma nian a kpaaya ni bɛndoo.

⁶ I lɔaanin ɲaa yoomaa kɛ́-kɛ̀ co o kobio ho nin, vanndacieea a visia. Nda kpow a vunin a nàà n'kɔnyaa.

⁷ Mɛlɛka dimi maa o kon kɔɔli, o malnin Sedekia masaa Yuda, a simlacia ndɔa masaa Babilɔn o ba. Mò mal ndu vanaa nàà n'kɔnyaa mɛinin-nda o ba, a vanaa cɔwvo a yima fofolan ma mɛinin yoomu o kobio nin-nda o ba. I malnin nda yaamɔaa ndaa o ba, a yeema le nda diwvo-a pɛɛn. Nebukanɛsar diwnin nda. O tosalnin nda ikɛndɛ le, o mɛinin vɛlɛ vana-vana yoomu le, iɲíí bɛɛ biinin ndu le.›»

⁸ Le vanaa tɔ̀a yɛ, mì la dimul nda aa: «Diom Mɛlɛka dimi-o co hoo ni aa: ‹I mel niaa cindaa a piɔ́mndo cuan-cuaa.

⁹ Vana-vana lo pɛ o kobio ho nin nanu, ndu vunin o cɔwvo nin, te kon te a yima fofolan, te kon te vɛlɛ a nàà n'kɔnyaa. Kɛ vana-vana fula pɛ mò kɔ yɔngun Babilɔŋaa co niaa haa hinullo a cɔwvo-a, ndu lonin yoomu.

¹⁰ Kani i co kobio ho mululɔn, mì tosal ndu dɛnɛ vɔɔndo, o venin dɛnɛ kɛndɛ le. I malnin ndu masaa Babilɔn o ba mò mal ndu yin.›»

Sɔɛi dimin le yungu lemasaa-e

¹¹ Mà dimul yungu masaa Yuda-o aa: «La yaŋnun diom Mɛlɛka-o!

¹² Yungu David-o! Diom Mɛlɛka dimi-o co hoo ni aa: ‹La va dɛnɛ sandaa tosaa kandɔɔ idii. La soli vanaa nda co saangiaa-a vanaa co nda saangiaa-a o ba, yɔŋii kɔl ni tuwvo bii maa leyin, vana nɔlanin nden ɲumio le, le dɛnnda vɔɔnnda niaa co tosaa lan.

¹³ I bii niaa tɛɛ, niaa vanaa co o bóllo nin, a o pow bandílá co o dɛngbɔɔ nin-nda pɛɛn. Kani la co dimio maa vana hinnin mò del naa coo a cɔw le, vana lueilunin naa le.›»

¹⁴ Sɔɛi fula Mɛlɛka o sondo-e co hee ni aa: «I simulnin niaa mɛɛ dɛnnda niaalan la co yɛ, mì mal bundɛla niaalan yin, mì yinnden le lom bundɛla lan balɔɔ sɔ́.»