Yeremi 2 - BII BILA

Israɛlla mulul Hala ndaa kɔɔ

¹ Mí diom Mɛlɛka-o dimulun vɛlɛ ya aa:

² «Kɔ, mà kɔ yonda Yerusalɛmnda o lani, mà dimul nda maa o Mɛlɛka dimi-o co hoo ni aa: ‹I loonun a mɛɛ nɔm óò lo o lediom coo lɔ́ɔ́ n va felengi-o yɛ, mɛɛ nɔm óò kaola ya lɔ́ɔ́ naa n va o nɔ̀u nin-ndo yɛ. A va ya kɔlan kɔɔli o lɛŋnde veselɛilen nin, o lɛŋnde niŋ tɔlɔɔ le len nin.

³ Le ya Mɛlɛka kínɛí Israɛl va ni, ndu va ɲɛ tasoo o ɲɛm nun coo ni. Vana-vana óò de ndu pɛ, vanan kon ndóò del kasi, dɛnɛ palaa ndóò tol vana kon coo. Ya Mɛlɛka soo nuaa ni.

⁴ Yungu Yakɔb-o, la yaŋ nilan o diom Mɛlɛka dimi-o. Niaa yungula fula o cɛi Israɛl-lo nin-ndan, la yaŋnun.›

⁵ Diom Mɛlɛka dimi-o co hoo ni aa: ‹Dɛnɛ vɔɔn yɛɛ fuɲaa niaa mamaa saalun yɛ o ya nin? Le kɔlɔ yɛɛ nɛ nda faŋan yɛ ya kɔɔli má kɔa ɲɛm fondo-fondon kɔɔli, mí nda pila siŋnun vanaa fondoa?›

⁶ A ɲunan te aa: ‹Kuɛɛ nɛ Mɛlɛka co yɛ? Kuɛɛ o co yɛ, o soli naa Esipte-o, o sim naa laci le heeloo a naa o lɛŋnde veselɛilen nin-ndo, o lɛŋnde nɔ mamɛn te len nin, lɛŋnde bólta yingilaalen pɛɛn. O lɛŋnde veselɛilen nin, nɛɛ vana nɔla kei le-a, nɛɛ vanaciee nɔla calle le-a pɛɛn?

⁷ Nduyɛ, mí hun a niaa o lɛŋnde naŋ tɔlɔɔlan-nden nin, haliko mi niáà de kɔmnde ndɔle kɛndɛlen. Kɛ mɛɛ niaa hin, mí la nɔɔliaa lɛŋnde nilen, mí la siinguu kɛ́ nuu mààlan.›

⁸ Vanaa-solia-lasálàá ɲuna le aa: ‹Kuɛɛ nɛ Mɛlɛka co yɛ?› Vanaa nɔ tɔŋndo o ba-a sina ya le, simlacia luɛi nila kalulan tosaa a ya, mí vanaa-tɛɛngaa-diom Hala-a muungu sɔɛi o diola piɔmndo Baal-tan, mí nda kpow a del ɲɛm fondon kɔɔli.

⁹ Lelan i co vɛlɛ niaa kɔɔsal. Ya Mɛlɛka co sɔɛi nuaa ni. I co vɛlɛ cuavaa niaa imamaa kɔɔsal.

¹⁰ La kɔ Kitim, lɛŋii co o mɛnndan tɛɛn-nde pɛɛn, mì la vem vannda mà kɔ fɛfɛla kobio Kedar, mà kɔ mɛɛndian ɲɛkɛndɛi, mì la sina te dɛnɛ súú vaa nuaa tosan nin!

¹¹ Vɛ̀ɛ̀ vanaa-mangalaa-isɔɔa pum co lon, a singa halaa ndaa-a, hali o va bɛɛ maa a co halaa kpeekpei le? Nduyɛ, vanaa nia nda cii biilu ndaa, o co Hala ndaa-o singa a halaa nɔla vana baŋa le-a.

¹² Lelan niaa vanaa co o halataala-a, la yɔŋnun yoloma-yoloma. Siòòŋii bɛnduei bìí niaa mì la ɲiiya. Ya Mɛlɛka co sɔɛi nuaa ni.

¹³ Kani sala tiɔn vanaa nia tosa dɛnɛ vɔɔndo ni: a kɛɛ ya vana co soon mɛmma cindaa-o, má tuwnun soonnda mandaa mamɛnndan, o co yɛ soonnda kɛndɛ le, mɛmma cel lenin te.›

Vana mulul Mɛlɛka kɔɔ pɛ mɔnɛi bii ndu

¹⁴ Vɛ̀ɛ̀ cɛ nda pendu-o Israɛl co ni baa cɛ velun vana ndɔ bɛndoo o bɛngu coo-o? Kɛ le yɛɛ o del-lɛ niko lɛŋii celen o ba?

¹⁵ Yàlàà cuawva co kuuliaa ndu coo, a co diomnda ndalan solio, a co lɛŋnde ndɔlen tɛɛmbuuo a labɛɛla. O cii kobila ndɔlan lomɔɔ mí vannda piaw kpede.

¹⁶ Hali vannda Nɔf a haa Tapanɛs, a co nɔm kpokpoo yunga.

¹⁷ Kon kpow tosalannin nɔm, nɔm Israɛl, le tùú n kɛɛ Mɛlɛka Hala nɔmndo, o telen o va nɔm nɛi kɛndɔɔ cɔmndo-o.

¹⁸ Vɛ niko nɛi Esipte-o biyɔɔ? Bàà le mɛmma peo Nil kɔlan kolɔɔ ni? Le yɛɛ n bii yɛ nɛiyo le kɔlan Asiri? Bàà le kɔlan mɛmma peo Efrate kolɔɔ ni?

¹⁹ Máà dɛnɛ vɔɔn n tosa-o sila nɔm, mì sandii lepɛŋii nɔmnde saangiaa nɔm! O kon n sinanin ni, mà ce maa dɛnɛ vɔɔndo a dɛnɛ palaa o co le Maalii Hala nɔmndo kɛɔ a le siòòŋii ndɔɛi kɛɔ nɔu ni.» Sɔɛi fula ya Maalii, Mɛlɛka-Nɔ-Kpaayaa-Kpow-vo o sondo-e co ken ni.

Vanalanɔ lo o lediom coo loo Israɛl co ni

²⁰ Mí Mɛlɛka dimi aa: «Israɛl, o co lɛhau le n luɛi nila kalulan a ya le, má tɛɛmbuu nɔu naa ŋiɔn tɛɛn, o kon má dimi aa a yeema lɛ ma va o lecɛ nin te. Kani a co keiyo piɔmnda sooloo o pembon kpow coo a o yɔmii puiyɛi kpow bɛngu.

²¹ Nduyɛ, yáà tɔl nɔm maa nakɔ n'rɛsɛn kɛndɛ-kɛndɛ, maa tɔlɔɔ tum kɛndɛ-kɛndɛ. Vɛ̀ɛ̀ n looku yɛ kɔllo mangalan a ya o lepilɔɔ nuaa? Le yɛɛ n muungu yɛ maa rɛsɛn foofiɛi nda fula nɛɛ celen pɔ́-o?

²² Hali pulun bɛɛ a sodaa mà vownun sɛnndan coo taw, haki nɔmndo faŋannin te. O vanin ya o hɔl kpendekele. Ya Maalii, ya co Mɛlɛka-o soo nuaa ni.

²³ Vɛ má dimi aa: ‹I nɔɔlian te, i del Baal kɔɔli le ndu sooluu le?› Tofa vɔ foofola bɛngula nɔmndan o bóllo nin! O bɛnda ma sina dɛnɛ n tosa-o, nɔm ɲɔɔmɛɛ téndé co kelanndo ba-ba ka-o.

²⁴ Nɔm sofɛlɛ laandu yondoo ho, a dɛli a kelaa o lɛŋnde veselɛilen nin, yeemɛi cɛn nɔm pɛ, a cua hoeiye a milin, a sandu lan, ɲɛ-ɲɛ nɔla nɔm simi le. Sofɛlɛa piaandua nuwviaa nɔm-nda kpow, a sanganin le nɔm saalɔnndo le, kani paangii nɔmnde tiiya pɛ, a kindu saalɔn te.

²⁵ Caa dɛ Israɛl! Yɔŋii n yɔŋulun o pelon mì bololen le vesa nɔm. Kɛ a co dimio aa: ‹Nɔm mein ka! Halaa celen ya yeema nin ni, nda ya co vɔ nin tolɔɔ kɔɔli ni.›

²⁶ Maa mɛɛ siɛmbulan la bii vuiyo telen nda bii ndu-o yɛ, lende koni la biinin Israɛlla ni: nda pila, masaa ndaa, simlacia ndaa, vanaa-solia-lasálàà ndaa a vanaa-tɛɛngaa-diom halaa ndaa.

²⁷ A co yɔmndo dimullo aa: ‹Nɔm co fuɲa naa ni›, mà va powvo dimullo aa: ‹Nɔm velu naa ni.› A toɲa, a cii ya kɔɔ mulul, a co lɛ ya tofa le, kɛ te dɛnɛ palaa tol pɛ nda coo, a dimul-la aa: ‹Cɔn ma ciindiaa naa!›

²⁸ Kɛ ya bɛɛ, i mululnin nda aa: ‹Kuɛɛ nɛ halaa niaa niaa toosiaa-a co yɛ? Taa nɔla pɛ, mɛɛ a cɔn niko mà faŋa niaa dɛnɛ palaa coo. Mɛɛ niaa nɔ kobilan yɛ koni niaa nɔ halaa ni, Éé niaa Yudaa!›

²⁹ Le yɛɛ niaa yeema yɛ le ya kɔɔsallo? Niaa kpow, la cɛn mí la simul-la. Ya Mɛlɛka co sɔɛi nuaa ni.

³⁰ I diw poaa niaa, kɛ sangan fondo fúú, kani a bii sila nuu le. Mí la diw vanaa-tɛɛngaa-diom Hala-a niaa maa yàlàá kɔltuw.

³¹ Niaa vannda sisa, la luɛi sɔɛi Mɛlɛka-e yii! Vɛ̀ɛ̀ lɛŋnde veselɛilen ya yɔŋnun le Israɛl ni, te kon te lɛŋnde ɲumma bɛndulen? Le yɛɛ nɛ vanaa nia co yɛ niko dimio aa: ‹N co o ba naa coo, n muungu lɛnin nɔm o ibuŋ te?›

³² Vɛ̀ɛ̀ cua laandoo pɔɛɛnun pá ɲɛm ndɔn kɛɛmianndon? Vɛ̀ɛ̀ vanalanɔ nda fula kɔɔli le nɔu-vo pɔɛɛnun pá kolacoole ndɔlen? Nduyɛ, o co nin hau lɔ́ɔ́ levil mí vanaa nia pɔɛɛnun ya.»

³³ «La caa bɔɔ nɛiyo nuwviaa le kɔlan kela suundɛiyo. La dɛli nin a keiyo o nɛi dɛnɛ vɔɔndo coo.

³⁴ Kooma vanaa tɛɛmbuu isɔɔ le-a ma suinun o domala niaalan kpengon. Nduyɛ, o co o diola niaa bɛŋi le niaa bii nda le.

³⁵ A kon kpow, la co mulio aa: ‹N tɛɛmbuu isɔɔ oo isɔɔ le, kɔltuw Mɛlɛka-o tulnin naa coo le.› Le mɛɛ niaa co dimio aa la tɛɛmbuu isɔɔ le yɛ, i co niaa iyama kiolɔɔ.

³⁶ Le yɛɛ nɛ niaa co yɛ keleŋa bɛndoo ho le kela niaa mangalaa? Siɛmbulan la biinin niaa a Esipte maa mɛɛ la bii niaa a Asiri yɛ.

³⁷ Lon bɛɛ, a balan o lebol niaa fulanin ni, kani Mɛlɛka kɛɛ vanaa niaa tiindan-nda, la sɔlanin vɛlɛ mala nda o ba le.»