Yeremi 19 - BII BILA

Kpɛɛnɛi piɔlɛi-ye

¹ Mí Mɛlɛka dimul ya Yeremi aa: «Kɔ piondu kpɛɛnɛi puluei vana cɔavaa n'kpɛɛnɔɔ o ba. Mà hɛli kaasoŋaa kɔlkalua vannda tɛɛn, mà hɛli nda vɛlɛ vanaa-solia-lasálàá tɛɛn.

² Mà fula o dio Kpɛɛnɛn Piɔlɛiyo, mà kɔɛ o Bóllo Bɛn-Hinnɔm nin, mà yonda sɔɛi ya dimulnin nɔm-nde lon.

³ Mà dimi aa: La yaŋnun diom Mɛlɛka-o, niaa masaa Yuda a niaa Yerusalɛmnda! Diom Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: ‹I co dɛnɛ palaa tuisi o fondaa hoo coo, vana-vana tuei Pɛ sɔɛi ken, kɔndɔfili bɛndoo biinin ndu.

⁴ Kani a kɛɛ ya, má nɔɔliaa fondaa ho o halaa celennda sálàlan solullo, halaa nda pila, fuɲaa ndaa mamaa a masaa Yuda a sina le-a pɛɛn. Má pei fondaa ho a kooma vanaa tɛɛmbuu isɔɔ le-a.

⁵ Má tengul Baal tombon, le poaa ndaa sálàla loamaalan solio lon. Nduyɛ o co ya léè dimul nda le dɛnɛ vaa lende tosaa le, kabi i dimi ken te, yiyan kon bɛɛ del-la le.

⁶ Lelan, mí Mɛlɛka dimi aa: «Paale co hunɔɔ, fondaa ho veelun ndɛnin aa: «Tofɛt», te kon te «Bóllo Bɛn-Hinnɔm» te, kɛ o veelunnin aa: «Ból diuvaa n'vanndo».

⁷ O fonda kon ya tɛɛmbuunin tuula Yerusalɛm ndan a tuula Yuda lan ni. Mì tosa mì yaamɔaa ndaa diw nda o cɔwvo, mì yɔngu duàá a tivolla dialun ndan, mà de mun.

⁸ I co mɔnɛ soli a kobio ho, mì vanaa hiavannda kpow a handun balan o lasondo. Vanaa vanin keiyo lon-nda kpow a kpinganin a mɔnɛi telen nda canin ɲɛ ya co tosanin a nda-o.

⁹ Yaamɔa ndaa hunnin mà tiila kobi ndaa le ndu delɔɔ coo. Dɛnɛ palaa bɛndoo toalnin vanaa vanin o kobi kalaa nin-nda coo háá mà de cuaa ndaa, mì nda pila sɔaman.

¹⁰ O kon kɔɔli, a pɛl kpɛɛnɛi ken vanaa vanin kan lon-nda o hɔl, a dimul nda aa:

¹¹ «Diom Mɛlɛka-Nɔ-Kpaayaa-Kpow-vo dimi-o co hoo ni aa: ‹Mɛɛ ya pɛl kpɛɛnɛi he nuaa yɛ ya pialnin vannda o kobio ho nin ni, i nɔla lɛ toosian te.› A kumbunin vanvílɛ́iya Tofɛt lon, kani fonda celen venin te.

¹² Mɛɛ ya tosa a Tofɛt nuaa yɛ ya solinin mɔnɛ a kobio ho a á vanaa co lenin-nda ni. O Mɛlɛka dimi-o co kon ni.

¹³ Cɛilan Yerusalɛm, a cɛila masaa Yuda la siŋnunnin ɲɛ nɔɔlɛiyo maa Tofɛt, cɛila kɛ́-kɛ̀ nda va lan sálàlan lomɔɔ o yindɔla ndalan coo le loeon, ma va halaa celennda ansan a sálàla mamɔilan solullo lan pɛɛn.»

¹⁴ Mɛɛ Yeremi fula Tofɛt nɛɛ Mɛlɛka ndóò vem ndu sɔɛi ndɔɛi tɛɛnguuo-a, mó kɔa o bɛ́ɛ̀ Cɛi-Hala-o nin, mó dimul vannda kpow aa:

¹⁵ «Diom Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: ‹I co dɛnɛ palaa yáà dimi le tuisio kobio ho coo-o tuisi, mò tol ndu a o ceen balu ndu-on coo, kani vanaa co lenin-nda kendu bɔɔ bollen, a kɛɛ le sɔɔn ya co nda dimullo-on biyɔɔ.›»