Yeremi 15 - BII BILA

¹ Mí Mɛlɛka dimul-la aa: «Hali Moise nda Samiɛl a tɛɛlun bɛɛ ya le nda, i cɛlnin mì tuinun vannda iɲíí le. Tow nda mà faŋa nda ya o hɔl, a kɔ!

² Taa ɲuna nɔm pɛ aa: ‹Kuɛɛ naa n kɔ yɛ?› A mulul nda aa: ‹O Mɛlɛka dimi-o co hoo ni aa: Le piɔ́mndo, vana-vana kɔanin teengen. Nàá n'kɔnyaa kɔanin a vannda pum, a tiŋ vunin o cɔwvo nin, mì a pum vi a yima fofolan, mà kɔɛ vɛlɛ a à pum o biyɔɔ nin.

³ O nɛila hiɔɔlula lan coo ya co nda simul ni, ya Mɛlɛka dimi lende ni, a vunin o mɔɛi cɔwve bɛngu, mì tunnda sasu nda, mà yɛɛ nda lándán. O mɛɛlulan, mì duàá a tivolla de nda kpede.

⁴ Lende ya tosanin ni mì siòònde bii masɛi o lɛŋnden coo kpow. Le dɛnnda vɔɔnnda Manase po Esekia va masaa Yuda-o tosa Yerusalɛm-ndan ken kpow tosan ni.»

Mɛlɛka sanga a ɲííye tuinɔnndo

⁵ Mí Mɛlɛka dimi aa: «Yerusalɛm, nɛ̀ɛ́-nɛ̀ tuinun yɛnin nɔm iɲíí, mò tosal nɔm dɛnɛ kɛndɔɔ? Nɛ̀ɛ́-nɛ̀ mulul-lɛnin nɔm hɔlla le i co nɔm coo-e sinaa?»

⁶ Sɔɛi fula Mɛlɛka o sondo-e co hee ni aa: «Nɔm kɛɛ ya ni má mulul-la kɔɔ. Lelan ya cɛn ni mí hol nɔm baa le nɔm tɛɛmbuuo, kani i sanga nin a nɔm ɲííye tuinɔnndo.

⁷ O kobila co o lɛŋnden nin-ndan kpow, mí hul nda a fɛlɛ ni hɛyaa, mí hoeiye sɛŋi vanaa nia nɛɛ-nɛɛ ka, mí luei vanaa nia mulé le tuŋɔɔ ya tuŋ nda cuawva-o, kɛ a mangala kela ndaa le.

⁸ Mí kui vanlaandua piaandaa ndaa vi-a hiovɔɔ mɛɛ sióónndon co o mɛmma ihɛllan kɔngɔ yɛ. Mí cuu vana tɛɛmbua, mó del kalaa kuubanɔ cɔw felengoo coo. O ve kɔl te, mí tuisi ndu dɛnɛ palaa coo, mí luei ndu o kɔndɔfillo nin.

⁹ Vanalanɔ nda va bɛɛlen keo le cuavaa ŋɔmmɛw o velu-a-o siŋnun ɲɛ fondoo, mò malnun kɔl. A telen paalen o pol kpen, mó yiyan maa paalen le del. Mí siɛmbulan la bii ndu, mí bɛɛle ndɔlen le hialun ndu. I malnin vanaa lonin-nda yaamɔaa ndaa o ba, mà diw nda.» Sɔɛi fula Mɛlɛka o sondo-e co ken ni.

Yeremi cɛɛŋun mí Mɛlɛka mulul ndu (Yeremi)

¹⁰ Kala nuu, i kɔndu dɛnɛ fɔ, le violɔɔ n velu ya o ceendo coo-o. O lɛŋnden nin kpow, vana pilɛ bɛɛ nɔ sɔɛi nii kɛndɛ o kɔl te. Nduyɛ, kuee vana co ya le, vana nɔ kuee ni le, kɛ vannda kpow a co ya keiyo mɛɛniaalan.

¹¹ Nduyɛ mí Mɛlɛka dimul-la aa: «Dɛnɛ kɛndɔɔ co nɔm laci. I tosanin mì yaamɔaa nɔmnda tɛɛlun nɔm o telen nda vanin o dɛnɛ palaa nin-ndo.

¹² Vɛ̀ɛ̀ cilinnde nɔla ciliŋii kala-kalɛi, te kon te daɲɛi yomɔɔ?»

(Maalii)

¹³ «Yuda, i cii ɲɛm nɔmndon a bolofaa nɔmndo malɔɔ vannda o ba. Sálà n bɛnda le sɔlaa le hakila n tosa lan-ndo co kon ni, la n tosa o lɛŋnde nɔmnden coo lan pɛɛn.

¹⁴ I co niaa yɔɔ o biyɔɔ nin yaamɔaa niaa o ba o lɛŋnde niaa sina le len nin. Kani yinnde kɔl ni fulaa le saa, le niaa kpeekpei le bii lende ni.»

(Yeremi)

¹⁵ Kɛ nɔm Mɛlɛka, a sina dɛnndan kpow. Yiyan ya coo, mà tosal-la kɛndɛi. Mingul vanaa co ya saangiaa-a maa, lo biuvɔnndo a nda mì dɛnɛ pala ya le. Sina pɛngu maa le nɔm ya co yeowlan biuvɔnndo ni.

¹⁶ Mí candu sɔɔn nɔmndon, o kon mí dia mun. N co ya kɔllo nɛŋio, kani le nɔm ya co ni, nɔm Mɛlɛka, Hala-Nɔ-Kpaayaa-Kpow-vo.

¹⁷ I cel o kunda vanaa mam caanda-a coo le, i dɔwnun ɲaale naa ndaa le. Kɛ má baŋ ya calle ya pilɛ, kani má pei ya a kɔltuwvo.

¹⁸ Le yɛɛ nɛ sanga nuu nɔ yɛ lamɛɛlu le? Le yɛɛ nɛ bolin nuu co yɛ danda dɔwnɔn mò sengu le? Vɛ̀ɛ̀ ma siŋnun le ya maa pee pɔmbɔ hui vana-o, ɲin pum a komal mɛnndan ma piaa cá, paale celen a komal ma velan, vana nɔla ndu tiindan te?

¹⁹ Lelan diom Mɛlɛka dimi-o co hoo ni aa: «Taa muungu pɛ ya o ibuŋ, i minginin nɔm o baala nuu nin. Taa dimi sɔɔn laasi-laasi le, kɛ mà dimi sɔɔn kɔlkalon, mɛɛ nɔm vanin sondo nuu ni. Yudaa muungunin nɔm o ibuŋ, kɛ o co nɔm te muungunin nda o ibuŋ te.

²⁰ I siinguunin nɔm maa sungbule n'daɲale kálà-kálà vannda ha o hɔl. A cɔlɔbanin nɔm, kɛ a nɔlanin nɔm te, kani i co nɔm ikɛi le nɔm baŋaa a le nɔm ciindiaa. Sɔɛi fula ya Mɛlɛka o sondo-e co ken ni.

²¹ I baŋanin nɔm vanaa vɔɔnda o ba, mì ciindiaa nɔm vanaa diyaa o ba.»