Yeremi 13 - BII BILA

Maa yáwle siɔŋɛi Israɛl a Yuda co ni

¹ Mí Mɛlɛka dimul-la nuaa aa: «Kɔ mà pendu yáwle kola keese len, mà yiinun nden o can, kɛ pɔɔla len o mɛnndan nin te.»

² Mí piandu yáwlen mɛɛ Mɛlɛka dimul-la yɛ, mí yiinun nden o caŋ.

³ Mí Mɛlɛka soaa o ya lo o diinndɔɔ mó dimul-la aa:

⁴ «Cɔn a yáwle n pendu mì le co nɔm o caŋ-nden, mà kɔɛ o peo Efrate, mà kɔ vion nden o tɛɛngii pow bandiláà nin.»

⁵ Mí kɔa, mí vian nden o peo Efrate kɔngɔ lon, mɛɛ Mɛlɛka ndóò dimul-la yɛ.

⁶ Palɛi bɔɔ-bɔɔ o kon kɔɔli, mí Mɛlɛka dimul-la aa: «Cɔn ma muungu o peo Efrate, mà kɔ cua yáwle yáà dimul nɔm le vionɔɔ lon-nden.»

⁷ Mí muungu Efrate, mí mɛɛndian le yáwle yáà ven-nden, mí cua len nɛɛ yáà kɛsi len-nda. Kɛ mí ca maa le sɛ, léè nɛŋi lɛ mako kɛ́-kɛ̀ le.

⁸ O kon mí Mɛlɛka soaa o ya lo, mó dimul-la aa:

⁹ «O ya Mɛlɛka dimi-o co hoo ni: Nuaa ya tɛɛmbuunin ɲɛ heelu Yudaa hɔlla-o ni, hɔlaa bɛndua Yerusalɛmnda heelu kan-nda pɛɛn.

¹⁰ Nduyɛ vanaa vɔɔŋaa co kɛɔ nilan yaŋɔɔ o sɔɛi nii, mà va yiyannda nda pila lan tosaa le yiinɔnndo a halaa celennda nda co ni, a co nda vɛlɛ vulan baŋɔɔ o labɛngunin le nda sooloo. Màá vanaa kalaa muungu maa yáwlen nden, le nɛŋi lɛ len ɲɛ-ɲɛ le len!

¹¹ Mí Mɛlɛka dimi aa: Kani mɛɛ vana yiinun yáwlen o can yɛ, lende yáà yiinun masalen Israɛl a len Yuda ni, haliko mi yáà ke nda tɔ́ɔ́ nuu, mì ndáà va vanaa nia, biilu nuu a naŋɔɔ nuu. Kɛ a yeŋ ya lani le few.»

Mɔiyan a kɔltuw Hala-o

¹² «Kɔ dimul nda aa: ‹O Mɛlɛka, Hala Israɛlla dimi-o co hoo ni aa: Le mɔiyan bɔlɔla yáwla vovaa mamɔilan la co ni.› Taa mulul nɔm pɛ aa: ‹Naa bɛɛ n sina ken maa le mɔiyan bɔlɔla yáwla vovaa mamɔilan la co ni,›

¹³ a dimul nda aa: ‹O Mɛlɛka dimio co hoo ni aa: I co tosa mì mɔiyan ma bii vanaa co o lɛŋnden nden nin-nda kpede, masaa co icali o kpɛŋɛ lemasa David-o nin-nda, vanaa-solia-lasálàá, vanaa-tɛɛngaa-diom Hala-a a vannda Yerusalɛm kpow.

¹⁴ Mì tosa mì nda pila kuindian, kala-ncuawva nda cuavaa ndaa. Sɔɛi fula ya Mɛlɛka o sondo-e co ken ni. I hɛlinin vana-vana le. Ɲíí kɛ́-kɛ̀ biinin ya, mì i kuuna ya nda cii tɛɛmbuu le.›»

La yaŋ nilan lɔ́ɔ́ pá mi telenndo hiow

¹⁵ La mɛi-yɔ, mì la yaŋ nilan, la kindi nilan te, kani Mɛlɛka co sɔɛi o niaa lo ni.

¹⁶ La biilu Mɛlɛka Hala niaa, lɔ́ɔ́ pá o hun tuisi ɲumndan, lɔ́ɔ́ pá niaa kandu boŋio o pembun co o ɲumndan nin-ndon. La va ɲɛ-tengaa kɔl, kɛ mó mangala ndu ɲumma bɛnduan, mó mingi ndu maa piɔɔ helaa.

¹⁷ Te la yeŋ nilan o kanalanndo ho le, i caŋnin o vionnɔnndo nin le yonga niaa bɛndoo. Hɔlta nilan la tuisinin mɛmɛan taw-taw, kani a co kɔlan a kunda cɔlua Mɛlɛka-a o biyɔɔ nin.

Yoongu Hala yɔngu le yungu masaa-o

¹⁸ Dimul masaa nda kalaa masaa aa: «La cal lɛŋ! Kani mɔsil lemasa kɛndɛ va nia o lebol-lo del lɛŋ.

¹⁹ Kobilan a ba too la cuu kindan, vana-vana co lɛ le lan kumbi le, kani a kɔɛ a vannda Yuda kpow o biyɔɔ nin, a kɔɛ a nda kpow.

Siɛmbulan la tol Yerusalɛm

²⁰ Yerusalɛm heelu vɔ hɔlla mà tofa, yaamɔaa nɔmnda co hunɔɔ fulaa a ba luaŋ-ndo-a. Ɔ́ɔ̀ cɔlua kundaa ya yɔngu nɔm mandaa-a? Ɔ́ɔ̀ saa n va cɔmnɔnndo-a?

²¹ Yɛɛ n dimi yɛnin telen vanaa niaa dɛli-a cannin mà simul nɔm le nɔm kpaayaa sɔlaa coo-o? A sanganin mɛɛ vanalanɔɔ sanga o violɔɔ nuaa yɛ.

²² O kon a ɲunannin aa: ‹Ko le yɛɛ nɛ kpeekpei dɛnɔɔ ho tosan yɛ ya?› Taa ce pɛ mì vannda kpeeŋa doma nɔm bɛndoo, taa ce pɛ mà kpuva nɔm, mɛɛ le hakila n tosa sɛ́lɛ́ bɛndoo taw lan ni.

²³ Vɛ̀ɛ̀ Etiopiinɔɔ nɔla divɔ̀ɔ̀ yáw ndɔɔ mangala? Vɛ̀ɛ̀ tambillo nɔla pá pooɲia yáw ndɔɔ mangala? Lende koni o co ni, la hiw nin dɛlio a dɛnɛ vɔɔndo, la tiw lɛ ba mulinndo mi la tosa dɛnɛ kɛndɔɔ le.

²⁴ I co niaa sɛŋi maa pui, o hoeyii fula o lɛŋnde veselɛilen nin-nde sɛŋi-o.

²⁵ Ɲɛ co nɔm Yerusalɛm cumndo-o co kon ni, o ya kɛsul nɔm-ndo pɛɛn. Sɔɛi fula ya Mɛlɛka o sondo-e co ken ni, kani a pɔɛɛnun ya, má kɔngan halaa fondoa.

²⁶ Lelan ya bɛɛ, i co nɔm domaa heelu háá o lebol, mì vannda ce nɔm tum fondo kpendekele.

²⁷ I saalun nɔm a tiɔmɔɔ nɔmndo, kuŋnda iyeemala nɔmndan, a suunda nɔm leyulaa o pembun co yondolan nin-ndon coo. Mí ca dɛnnda nɔmnda nɔɔlɛilan. Nɔm Yerusalɛm pɛɛn! Taanin! Lɔ́ɔ́ kuɛɛ kpeekpei n diandu yɛnin?