Yeremi 1 - BII BILA

¹ Sɔɔn Yeremi, po Hilkiya, va vana-solia-lasálà pilɛ Anatɔt, o tàndá Bɛnyamɛn-ndo nin-ndo dimi-on yɔŋnun mun ni.

² Mí diom Mɛlɛka-o dimulun ndu o vɔsi tɔ́ a o yàándɔ Yosia po Amon-ndo va masalen tosaa Yuda-o.

³ Lende koni o soo o ndu lo o telen Yehoyakim, po Yosia-o va masalen tosaa Yuda-o, kɔ bii háá o vɔsi tɔ́ a ò pilɛndɔ Sedekia, po Yosia-o va o masalen coo Yuda-o, kɔlan háá o telen nda kɔɛ a Yerusalɛmnda o biyɔɔ nin o paangii ŋuɛɛnundɔɛi-yo ni.

Hala veelu Yeremi le vaa vana-tɛɛngaa-diom ndɔɔ

⁴ Mí diom Mɛlɛka-o dimulun ya aa:

⁵ «Lɔ́ɔ́ pá ya hun cɔw nɔm kala nɔm o dembe, yáà sina nin nɔm. Lɔ́ɔ́ pá mó vialu nɔm, yáà hɛli nin nɔm le siŋnɔnndo vana-tɛɛngaa-diom Hala-o le sɔɛi o vanaa-mangalaa-isɔɔa lo!»

⁶ Mí muli aa: «Éé! Maalii Hala, i cee sɔɛi le, kani cuaambɔɔ ya co ni.»

⁷ Kɛ mí Mɛlɛka mulul-la aa: «Dimi le maa cuaambɔɔ n co ni. Kani a kɔanin o vanaa ya co nɔm vomɔɔ o nda lo-a lo, mà tɛɛngul nda ɲɛ-ɲɛ ya dimulnin nɔm.

⁸ Siòòŋii bii nɔm a nda le, kani i vanin nɔm ikɛi le nɔm baŋaa.» Mɛlɛka soo nuaa ni.

⁹ O kon mí Mɛlɛka siɛndi baa, mó pilan ya sondoo, mó dimul-la aa: «Tofa vɔ, i vow sɔɔn nun nɔm o sondo.

¹⁰ I vem nɔm hau o vanaa-mangalaa-isɔɔa lo, mà kuel masɛi, haliko ma suingi, ma koombiaa, ma diw, ma tɛɛmbuu, Kɛ ma cɔw, ma tɔl.»

Lɛvii yɔm amanndiee a kpɛɛnɛi ŋolɛi

¹¹ Mí diom Mɛlɛka-o dimulun ya aa: «Yeremi, yɛɛ n co yɛ cɔu?» Mí mulul ndu aa: «Lɛvii yɔm amanndiee ya co cɔu ni.»

¹² Mí Mɛlɛka dimul-la aa: «A caa cɔ! Kani i co sɔɛi nii keleŋa peelu.»

¹³ Mí diom Mɛlɛka-o dimulun ya o diinndɔɔ aa: «Yɛɛ n co yɛ cɔu?» Mí muli aa: «Kpɛɛnɛi co ŋolɔɔ-e ya co cɔu ni, i coŋ a ba luaŋ-ndo (mí muli hɔlla a too.)»

¹⁴ O kon mí Mɛlɛka dimul-la aa: «A ba luaŋ-ndo dɛnɛ palaa co fula ni mò tol vanaa co o lɛŋnden-nden nin-nda kpow coo.

¹⁵ Kani i co vanaa-mangalaa-isɔaa co o masɛi co a ba luaŋ-ndo nin-nda veelu. Sɔɛi fula ya Mɛlɛka o sondo-e co ken ni! A hunnin kpow mì vana-vana kɛsi kpɛŋɛ lemasa ndɔɔ o diolan Yerusalɛm sondoo, o sungbule kpakio balɔɔ sɔ́ a o kobila Yuda lan kpow balɔɔ.

¹⁶ I kilulnin nda yamɛi le dɛnnda vɔɔnnda nda tosa lan kpow, kani a mal-la má loam ansan le halaa celennda, má baŋ vulan ɲɛm nda pila cɔw-von o labɛngunin.

¹⁷ Lelan nɔm Yeremi, yiinun yáwlen kpeekpei, mà tɛɛngul nda ɲɛ-ɲɛ ya dimulnin nɔm. Ɲiiya nda o hɔl te, yɔŋii ya tosa mà ɲiiya niko nda o hɔl kpeekpei.

¹⁸ I kɛsi nɔm hau lɛŋnden nden kpow coo maa kobi kpaaya bɛndu, maa sungbule icilin, maa kpaki n'daɲa masaa Yuda kpow coo, simlacia ndɔa kpow, vanaa-solia-lasálàà ndɔa a vanaa co o lɛŋnden nin-nda coo.

¹⁹ A cɔlɔbanin nɔm, kɛ a nɔlanin nɔm ɲɛ-ɲɛ tosa le. Kani i co nɔm ikɛi le nɔm baŋaa.» Ya Mɛlɛka soo nuaa ni.