Tite 3 - BII BILA

Mɛɛ vana Hala-o bɛnda mò va vilio yɛ

¹ Yiyilan vanaa laalannda maa a tuisin tootoo a simlacia a á masaa lelɛŋnda, mà bii sɔɔn ndan, mà va a bɛɛndiannda lɔ́ɔ́-lɔ́ɔ̀ le dɛnnda kɛndɛlan kpow tosaa.

² A dimi dɛnɛ vɔɔn vana-vana le, a va vanaa kɔlta ɲulua a vanaa kɔlta kɛndɛa, mà va vanaa tuisiannda a vannda kpow.

³ Kani naa bɛɛ diɔmnda naa n va paandu ni, vanaa bii isɔɔ le-a, n va o pɔwlan nin. N va cɛa le yeemɛi vɔɔŋun súú-súù ka a le yeemɛi ɲɛm kɛndɔn. N va kɔlvesɛiyo tosaa mí n va yeemɛi vɔɔnde. Náà n nɛinun vannda, mí nda bɛɛ va nɛyɔnndo a naa.

⁴ Kɛ lɔ́ɔ́ Hala Vana naa Ciindiaa cɔm kɛndɛi ndɔɛi a kaola ndɔɔ le vanndacieea-o,

⁵ mó ciindiaa naa, o ve le dɛnnda sandaala naa pila n tosa lan te, kɛ le ɲíí o tuinun naa-e. Mó ciindiaa naa a kpaaya Hala Kɔl-Diandaa, mó pulu naa pulɔɔ sɛnɛi-yo.

⁶ Kani Hala sɛŋi naa Kɔl-Diandaa kon coo o diola Yeesu Krista Vana Ciindiaa naa,

⁷ haliko mo siinguu naa vanaa sandaa o kɛndɛi ndɔɛi bɛngu, o kon mì n sɔla cinda fɛɛn-fɛɛndo, o naa n co tiindanndo-o.

⁸ Sɔɛi toɲɛi co hee ni. I yeema ma tiinda pelei lecoo ɲɛkɛndɛi, haliko mi vanaa laalan Hala-a yɔngun nda pila, mà va dɛnnda kɛndɛlan tosaa. Dɛnnda naŋ mì la co vannda tɔnɔɔ lueiloo lan.

⁹ Kɛ vow sondoo o sɔɔn idiɔmndon nin te, diola fuɲaa-mamaa dimio o polalen, sɔngɔlan a sɛɛngianndan o tɔŋndo coo. Kani n yɔngù vana tɔnɔ oo tɔnɔ le, n nɛŋì vana ɲɛ-ɲɛ le.

¹⁰ Kanalan vana co sɛyanndo lueiyo vannda tɛɛn-ndo lepilɛ, mà kanalan ndu vɛlɛ o diinndɔɔ, o kon kɔɔli, a faŋan ndu kɔɔli.

¹¹ Sínà maa vana vaa lende co lɛ o nɛi sandaa coo le, o hakio nin o co ni, ndu pila cii yaalan.

Sɔɔn mɛɛlan

¹² I vem dɔ́ɔ́ pɛ Artemas, te kon te Tsisike o nɔm ndo, a kindin a komal-la Nikopolis, kani lon ya tuu le sialten hivio ni.

¹³ Kindin mà mala Senas, vana sinaa dɛnɛ bɛndu latɔŋndo nda Apolɔs le kɔla ndalan, haliko ɲɛ-ɲɛ va nda lepɛŋ te.

¹⁴ Mɛɛ mì vanaa naa bɛɛ a pɛɛku, mà yɔngun le dɛnnda kɛndɛlan tosaa, mà malà vanaa co o balahavɛilan nin-nda, yɔŋii nda kɛɛ mako nɛŋi.

¹⁵ Vanaa co ya ikɛi nanun-nda kpow a yil nɔm. Yil vanaa kaola naa le laalanndo-a. Màá niaa kpow sɔla dɛnɛ kɛndɔɔ!