Tite 2 - BII BILA

Kaannde sandaalen

¹ Kɛ nɔm yɛ, pɛɛku vannda kaannde sandaalen.

² Pɛɛku bɛndua yuuvɛiya mà va vanaa tosa dɛnndan tùúlen-nda, vanaa lebɛɛa, vanaa bii kɔltan o dɛnndan nin-nda a vanaa nɔ laalan kpeekpeiyo o kaolaa a o biuvɔnndo nin-nda.

³ Pɛɛku vɛlɛ vanlaandua yuuvɛiya, mà va vanaa diandaa o kela ndaa nin. A va vanaa dimi sɔɔn vɔɔnndon-nda le, a yɔngun mɔiyan te. A va vanaa yɔngu silala kɛndɛlan-nda,

⁴ o kon mà pɛɛku felengia laandua co o nɔ̀lan-nda le piaandua ndaa a cuavaa ndaa kaolaa,

⁵ mà va vanaa bii kɔlta ndalan-nda, a vanaa dendu Mɛlɛka o hɔl-la. Mà va vanaa bii cɛila ndalan-nda, vanaa kɛndɛa a vanaa ke piaandaa ndaa bɛɛlen-nda, yɔŋii vannda dimi sɔɔn vɔɔnndon a sɔɛi Hala-e o kɔɔ.

⁶ Lende vɛlɛ koni, pɛɛku langbaa felengia mà va vanaa bii kɔlta ndalan o dɛnndan kpow nin-nda.

⁷ Nɔm pila cɔm tɔɔmaseloo o dɛnnda kɛndɛlan tosaa nin, mì pɛɛku nɔmndo dendu, mò va pɛɛku kpeekpeiyo.

⁸ Mì sɔɔn nɔmndon n sandu, vana nɔla mun sɛɛngiaa le, o kon mì yaamɔɔa laasian, a nɔla lɛ ɲɛ-ɲɛ vɔɔn dimi a naa o kɔɔ le.

⁹ Pɛɛkuu cɛa, mà tuisin tootoo o dɛnndan kpow nin a vanaa ndaa bɛndua, mà hɛnan nda, a sɛɛngiaa nda le,

¹⁰ a ciimbuu ɲɛ-ɲɛ nda kɔɔli le. Kɛ a va dɛnɛ kɛndɔɔ tosaa lɔ́ɔ́-lɔ́ɔ̀, mà lo o lediom coo, haliko mi vannda ke pɛɛkula Hala Vana ciindiaa naa bɛɛlen.

¹¹ Kani Hala cɔm kɛndɛi ndɔɛi, i yɔngú vannda kpow cindaa-e.

¹² Kɛndɛi kalɛi co naa pɛɛkoo le laalan lepɛŋndo a yeemɛi vɔɔnde o ceendo ho coo malɔɔ, mì n kela kela kɛndɔɔ, kela sandaa, mì n kela a laalanndo o palɛi he sisa nin.

¹³ Nuaa naa n bɛnda ni mì n cum palɛi naa n co tiindanndo-e, a paale biilu Hala naa bɛndoo, a Yeesu Krista Vana naa ciindiaa cɔmnunnin-nden.

¹⁴ O yɔngún ndu pila le naa, le naa solio o dɛnnda vɔɔnndan nin kpow, mó siinguu naa vanaa diandaa co le ndu-a, haliko mi n va vanaa dialun fulaa le dɛnnda kɛndɛlan tosaa-o.

¹⁵ Dɛnnda n bɛnda ma pɛɛku vannda lan la co laan ni. Luei nda yoomuan mà soo nda a kpaayaa. Cɛ̀l mì vana-vana kelun nɔm yii le.