Talelan 9 - BII BILA

Kɔlkaloo co veeloo

¹ Kɔlkaloo sɛl sungbuan man ŋɔmmɛw mó tangul cɛi ndɔɔ.

² Mó diw cɔlua ndɔa, mó kindi mɔima ndɔan, mó toosiaa ɲɛdiaa.

³ Mó viam buɛyaa ndɔa laandua le kɔlan yondaa o fondala hiow helɔɔ o kobio nin-ndan coo aa:

⁴ «Niaa vanaa bii dɛnɛ bila le-a, la hun kpengei he nanu.» Mó dimul vanaa pe lebol te-a aa:

⁵ «La hun dio ɲɛdiaa nuu, mì la kol mɔima ya toosiaa-an!

⁶ La mal diɔmnde mì la va yoomu, la bii nɛi dɛnɛ sinaa.»

Vana kɔlkaloo nda vana mamaa n'vanndo

⁷ «Vana sila pɛ vana man vannda mamɔɔ tɛɛndanndo-o, o ce nɔm fúú. Vana sila pɛ vana kɔlvesɛiyo, o yeow nɔm.

⁸ Cɔ̀m vana mamaa n'vanndo sɔvun ndɔn te, yɔŋii o pɛɛsa nɔm. Kɛ cɔm vana kɔlkaloo sɔvun ndɔn, mò kaola nɔm.

⁹ Sila vana kɔlkaloo, mò cɔɔlu kɔlkaloo sɔla. Pɛɛku vana sandaa, mì dɛnɛ ndɔ sinaa cɔɔlun.

¹⁰ Siòòŋii Mɛlɛka nɔu, ndu co kɔlkaloo kandɔɔ ni. Kɔlkaloo co dɛnɛ sinaa vanaa diandaa ni.

¹¹ Ya Kɔlkaloo, i cɔɔlunin yoomu nɔmndo bɛndi, mì cɔɔlu vɔsila nɔmndan kui.

¹² Taa co pɛ vana kɔlkaloo, mɛɛ a dianin ndu tɔnɔ. Te vana mamaa n'vanndo n co yɛ ni, mɛɛ sanga-sanga va pɛ o co le nɔm.»

Diɔmnde co diɔmnda veeloo

¹³ Maa vanalanɔ kindu kɔl too, o bii ɲɛ-ɲɛ bila loo diɔmnde co ni.

¹⁴ O cɛn pɛ, o cal o cɛi ndɔɔ sondoo, o fonda yesa hiow helɔɔ o kobio nin-ndo.

¹⁵ Lon ò lo ni mò veelu vanaa co hiovɔɔ má va kɔnndan sanaa-a aa:

¹⁶ «Niaa diɔmnda ha sei! La kei-yɔ nanu.» Mò dimul vanaa pe lebol te-a aa:

¹⁷ «Mɔima levuiyan ma yeela, ɲɛdiaa vana dia o vionnɔnndo nin-ndo naŋ bɔɔ.»

¹⁸ Nduyɛ, vanaa kan a co sina maa o ciee vanaa vi nin-nda le nda co kɔlan lende le. À co bɛɛ sina maa ciee-piɔ́m te o veelu nda lende le.