Talelan 8 - BII BILA

Kɔlkaloo co sɔɛi o vannda lo

¹ Kɔlkaloo co veeloo, dɛnɛ sinaa co diomndo solio. Vɛ̀ɛ̀ la co tueyɔɔ le?

² O co isisi o pembum co o nɛilan lekɔɔ-on coo a o nɛila bɔɔŋianndan déŋ,

³ o co isisi o diola luɛyaala kobio sondoo, o co yondaa o fondala hiavaalan aa:

⁴ «Niaa vanndacieea sei! Niaa ya co veeloo ni. O niaa lo ya co sɔɛi nuaa ni.

⁵ Niaa vanaa kindu lakɔl te-a, la kindin le kɔlkaloo sɔlaa. Niaa vanaa pe lebol te-a, la kindin mì la sina dɛnɛ.

⁶ La yaŋ nilan mì dimul niaa sɔɛi sɔvɛi pum, mì dimul niaa ndi ɲɛkɛndɛi.

⁷ A toɲa, sɔɔn toɲan fula ya o sondo ni, kani sɔɔn lacòòvan nɛinun ya bɔɔ.

⁸ Sɔɔn nun kpede n'sandaa n co ni, i hui vana le, i dimi lacòò le.

⁹ Sɔɔn nun co sakpo le vana kendu kɔl-lo, sɔɔn toɲan n co le vana sinaa dɛnɔɔ ni.

¹⁰ La cɛl silala nilan, lan la co fisa a volion ni. Dɛnɛ sinaa hiow va ɲɛ sɔvɛ a sianin diandan.

¹¹ Kani ya Kɔlkaloo, i co fisa a yɔɔvaa, a kelan báà kalan. I co ɲɛ sɔvɛ hiovɔɔ ɲɛm niaa yeema-on.»

Kɔlkaloo cɔmnun

¹² «Ya Kɔlkaloo, naa taasio n co latulu ni, a dɛnɛ sinaa ya tosa dɛnndan ni.

¹³ Siòòŋii Mɛlɛka-e nɔu, dɛnɛ vɔɔndo kɛɔ co kon ni. Lelan yongaa, kuundianndo, dɛnnda vɔɔnndan a còòlan la hɛnan ya le.

¹⁴ Baala nuu co vanndacieea silaa a nda kanalanndo ni. Ya co dɛnɛ sinaa ni, ya nɔ kpaayaa ni.

¹⁵ Ya cɛl ni mì masaa tosa masalen, mì vanaa kialaa n'yamaa kelu yaman sandan.

¹⁶ Ya cɛl ni mì simlacia tosa masalen, mì vanaa tɔ́ɔ́a a vanaa kialaa n'yamaa tosa vali kennun nda-o.

¹⁷ Vanaa kaola ya-a, ya bɛɛ i kaola nda. Vanaa co ya nuwviaa-a co ya saalɔnndo.

¹⁸ Ya nɔ bolofaa, biiloo, ɲɛm kɛndɛn viaw-von a dɛnɛ sandaa ni.

¹⁹ Tɔnɔ nuu hiow va ɲɛ sɔvɛ a tɔnɔ sianin diandan, ɲɛ ya luei-yo hiow ɲɛ volin diandan luei-yo polon.

²⁰ O nɛi dɛnɛ sandaa coo ya co kɔlan ni, o pemale sakpoyɛi coo pɛɛn.

²¹ Lon ya ke vanaa yeema ya-a ɲɛm kɛndɔn ni mì n va kɛ́ɔ le nda, mì pei cɛila ndalan a bolofaa.

²² O kandɔɔ pá Mɛlɛka toosiaa ya ni, ya fɔlɔn o cɔw a ɲɛm o cɔw-von kpow,

²³ Kabi sindɛ-sindɛ o toosiaa ya ni, O kandɔn kon ɲɛ-ɲɛ ndóò ve vɔ le.

²⁴ Tuma ya velun-ndo mɛmma ihɛllan máà ve vɔ le, soonnda mamɛnndan láà ve vɔ le.

²⁵ Lɔ́ɔ́ pá pembon hun fula, lɔ́ɔ́ pá pembun pɔmbɔn hun vul, yáà velun nin.

²⁶ Mɛlɛka ndóò toosiaa vɔ lɛŋnden a yondoo le, hali tɛ́ɛ́nɛí tasei o cundoo nin lɛŋ.

²⁷ Tuma o tondu halataalaa-o i va nin, tuma o toosiaa pɛɛngulan o mɛmma ihɛllan sindɛ coo-o i va nin.

²⁸ Mó lɛɛnduu yumbuyumboo coocoo, mó ke tɛɛngun mɛmma ihɛllon kpaayaa,

²⁹ mó kilul mɛmma ihɛllan kpélénndo, ò ma bɛnda le hiovɔɔ loo. Mó kila fonda lɛŋnden le cal coo-o.

³⁰ Tuma kon kpow, i va ndu ikɛi, ya yɔŋnun vana vali kɔlkalu bɛndoo ndu ikɛi ni. Lepalaa-lepala, i va ndu ɲaaloo yɔngoo, i va pisultan ndu o hɔl tuŋ

³¹ o lɛŋnde o cɔw len coo. Cɔn nin paale len, o hɛnan bɔɔ ya le vaa vanndacieea tɛɛn.»

Vanaa duaa co vanaa yaŋ kɔlkaloo nilan-nda ni

³² «Poaa niaa sei! La yaŋ niko ya nilan, dɛnɛ kɛndɔɔ co le vanaa kan, vanaa kela o nɛila nilan coo-a.

³³ La kɛ́ɛ̀ kanalannda nilan te, la bii lan mì la sɔla kɔlkaloo.

³⁴ Dɛnɛ kɛndɔɔ co le vanaa yaŋ ya nilan, mà sim o dio nuu lepala-lepala, mà cumul dio cɛi nuu-a ni.

³⁵ Kani vana saalun ya pɛ ndu saalun yoomoo, o kon Mɛlɛka ce ndu ɲia.

³⁶ Kɛ vana pilan pɛ ya tana ndu kɔndu dɛnɛ. Vana-vana pɛɛsa ya pɛ, mɛɛ piɔ́mndo ndu yeema ni.»