Talelan 7 - BII BILA

Vanalanɔ tiamaa nɔla mò hiŋ poombɔ piaandoo hɔlla

¹ «Po nuu sei! Bii sɔɔn nun kpáŋ, ma mandan tɔŋnda nilan o kɔl.

² Manda tɔŋnda nilan haliko ma viow yoomu. Manda pɛɛkula nilan mɛɛ n co hɔlta kúlta nɔmndan mandaa yɛ.

³ Yiinun ndan o n'su ma sɛva lan o pɛngɛi kɔl nɔmndo coo.

⁴ Cɔ kɔlkaloo maa yema nɔm, ma ce dɛnɛ sinaa maa caan nɔm,

⁵ haliko mi kɔlkaloo a dɛnɛ sinaa manda nɔm, ma kpakpala vanalanɔ tiamaa, ma kpakpala lanɔ pila sondo yeelɛiyo.

⁶ Paale pum, i va o dio-pɔmbɔ cɛi nuu, i va tofaa o bɛ́ɛ̀,

⁷ mí ca poombɔ piaandu nɔ mahul too pum o vanaa nɔ taasi le-a tɛɛn, mí dɔaw ndu taasi poambɔa piaandua tɛɛn.

⁸ O va kɔlan o nɛi, mó kei o kolokoloo pum ikɛi, nɛɛ vanalanɔ tiamaa pum va-a, mí poombɔ kon bii kɔlan o pɔm-pɔmbɔ o cɛi cua kon.

⁹ A Paale delaalen kon yɔŋnun ni, a tuma fitilio, telen ɲumndan ma kandu tolɔɔ-o.

¹⁰ Mí vanalanɔ kon hun ndu demullo. O va o dovianndo maa vanalanɔ suundɛi. Ndóò nɔ kɔlkalu vɔɔndo taw.

¹¹ Vanalanɔ poopoo bɛndoo a vanalanɔ maloo-maloo o va ni. Ndóò kɛsi pelei o ndu lo cɛinin te.

¹² Lɔ́ɔ́ pum o fulan o nɛi, lɔ́ɔ́ pum o kɔɛnnun o fondala fɛkɛilan. O va simndan cumullo o kolokololan kpow ikɛi.

¹³ Mɛɛ o demul poombɔ piaandu kon, mó kɔman ndu, mó kafalan ndu, mó dimi a yongaa aa:

¹⁴ ‹Yáà baa yoolen o Hala lo le sálàla kɔlɲululan solio. Hau ya soli sálàla lan ni mí timbi yoole len.

¹⁵ Lelan ya fula ni mí hun nɔm o hɔl. Yáà yeema mì yáà sina nɔm, nduyɛ i saalun nɔm.

¹⁶ I cii kpele ni hinia toosiaa, mí pɛngɛliaa kolalan lecoo. Kolala keesela pooɲɛila kɛndɛla fula Esipte lan ya pɛngɛliaa lecoo ni.

¹⁷ I cucu ɲɛla cun kɛndɛlan o kpele nuu coo: mir, aloɛs a sinamɔm.

¹⁸ Lelan hun n kɔ lon mì n kɔ lɔl tiɔmɔɔ háá siɔdii, hun n kɔ mì n kɔ tuei tiɔmɔɔ yeela tɛfulu.

¹⁹ Kani pɔnɔ nuu co cɛinin te, o kɔɛ kelaa nɛɛ levil lándán.

²⁰ O kɔɛ a bɔlɔ mandaa n'volio a volion n'piaa lenin ca. Fɔ mì paangei he tɛnda tɛɛn malan o muungu nanu.›

²¹ Mí vanalanɔ kon nɔla poombɔ kon a sondo, mó tiw ndu ba a sondo yeelaa ndɔɔ.

²² Mí poombɔɔ kandu dɔ́ɔ́ kɔlan ndu kɔɔli maa naw nda co kɔlan o fonda diyaa n'cɔloo-o, maa vana seemɛi nda yii o kpɛɔ le ndu soŋɔ̀ɔ́-o,

²³ háá mí kɔɛi buli ndu kɔllo. O va ndu kɔlan kɔɔli maa yow haw o yalaa nin-ndo, o ve bɛɛ sina maa yoomu ndɔɔ le o va vɔngul kon te.

²⁴ Lelan sisa, niaa poaa nia, la yaŋ ya nilan, la yaŋ nilan ɲɛkɛndɛi o sɔɛi co fulaa ya o sondo-e.

²⁵ Cɛ̀l mì kɔl nɔmndo yusa nɔm nin le vanalanɔ vaa lende delɔɔ kɔɔli o nɛila ndɔlan coo le. Luɛì laasianndo ndu kɔɔli o kàŋnda ndɔlan coo le.

²⁶ Kani o mal nin vanpiaandua taw, vanpiaandua o diw-va kpow, vanaa mayoomua nda yɔŋnun ni.

²⁷ Nɛiyo le kɔlan ciee-piɔ́m cɛi ndɔɔ co ni, nɛi yaa vana piɔ́m di-o calta ndɔlan la co ni.»