Talelan 6 - BII BILA

Silaa le vanndo hawnɔnndo

¹ «Po nuu sei! Taa hawnun pɛ vanndo le kuee o cua-o, taa hawnun pɛ sɔɛi le vanndo ma sɔɔ laba le ndi mulio,

² taa luei pɛ bollen o sɔɛi pum nin a tombola nɔmndo, mì nɔm pila handun sɔɛi pum coo a sondo nɔmndo,

³ po nuu, ɲɛ n bɛnda ma tosa-o co hoo ni: a bɛnda ma toosiaa sɔɛi ken. Kani nɔm pila malnun vana isɔɔ kon o ba ni. Lelan kɔ ma kɔ tɛɛlun ndu, ma lamban ndu kɔɔli lafi-lafi.

⁴ Hínì ma lɔl te, kúmbù hɔlten hali ɲɛ-pɔmbɔ le,

⁵ fɔ ma toosiaa sɔɛi ken, ma hɛlun mɛɛ púvɔ́ɔ́ hialun doosunɔɔ nuaa yɛ, ma poondan mɛɛ yowvo poondan o yala vana biyaa n'yowvo nin yɛ.

Vana siɛlɛiyo

⁶ Nɔm vana siɛlɛiyo ho sei! Cɔn-ndɔ ma kɔ tofa vali sisinndo co tosaa-o. Mɛɛndan-ndɔ dɛnnda ndɔlan, ma sɔla kɔlkaloo.

⁷ Sisinndo nɔ simlacinɔ le, o nɔ mɛlɛsoŋnɔ le, o nɔ vana bɛndu le.

⁸ Kɛ a vɔɔlen o cuungiaa balo ndɔɔ ni, a telen koavaa o nuwviaa ɲɛdiaa ndɔɔ ni.

⁹ Nɔm vana siɛlɛiyo yɛ, háá telen kuɛɛ nɛ n lo yɛnin ihini? Telen kuɛɛ n can yɛnin o lɔan?

¹⁰ A yeema ma kelu lɔlen ɲɛ-pɔmbɔ, ma siɛndin, ma kumbu hɔlten le telen bingi, ma kafala balan, ma siɛndi kɔɔ le telen pɔmbɔ.

¹¹ O telen kon nin, bala fondolan la voolunin nɔm maa vana del vannda coo-o. Kuɛi kpuvanin nɔm mɛɛ vana nɔ ɲɛm cɔwvon o ba-o kpuva vana yɛ.

Ɲɛ co le vana laasianndo-o

¹² Vana fondoo vana sendu loo co ni. A còòlan o sondo o kelaa ni.

¹³ O co hɔlten kindaa le caanda palaa, o co sɔɛi a n'pelu, o co sɔɛi a tuuliaa a n'su.

¹⁴ Laasianndo co ndu o piaa o kɔl. Telen oo telen o co dɛnɛ vɔɔndo tuunɔnndo o kɔl, o co sɔngɔlan keiyo malɔɔ tuŋ.

¹⁵ Lelan dɛnɛ palaa co ndu tolɔɔ coo cɔ́-cɔ́ ni. O yomiyominin, o sɔlanin cɛw le.

Dɛnnda nɛinun Mɛlɛka lan

¹⁶ Dɛnndan tan ŋɔmpum la nɛinun Mɛlɛka ni, la co bɛɛ laŋɔmmɛw.

¹⁷ Lan la co lan ni: Tofa yongaa, sondo dimia lacòòvaa, bala diw vanaa tɛɛmbuu isɔɔ le-a lan,

¹⁸ kɔl tuu tuula yɔŋ vɔɔnndan-ndo, pelun ɲaanun le kɔlan dɛnɛ vɔɔndo tosaa-on,

¹⁹ sei lacòòvaa tɛnda seilen a còòlan-ndo a vana mɛli sɔngɔlan puapilɛa tɛɛn-ndo.

Mɛɛ vana kpakpala dɛnɛ suundɛiyo yɛ

²⁰ Po nuu sei! Mandan tɔŋ fuɲa nɔmndo o kɔl, kɛɛ sila kala nɔmndo le.

²¹ Lueinun ndan o kɔl le lɔ́ɔ́-lɔ́ɔ̀, baanun ndan o labolo maa yɔɔva.

²² Lan la cɔmnin nɔm mɛɛ n bɛnda le kelaa yɛ ni. Lan la mandanin nɔm o kpele nɔmndo coo ni. Lan la silanin nɔm tuma n tiandunin-ndo ni.

²³ Kani tɔŋndo, fitinaa o co ni, pɛɛkoo, ɲɛ-tengaa o co ni, kanalannda silaalan, nɛi cindaa la co ni.

²⁴ La malanin nɔm ma kpakpala vanalanɔ vɔɔndo, ma kpakpala sondo yeelaa lanɔ co laa nɔm too.

²⁵ Fúlà naŋɔɔ ndɔɔ lehɔl o kɔl nɔmndo nin te. Del o tɔɔndan nin le hɔlta koongola ndɔlan te.

²⁶ Vanalanɔ suundɛiyo ndu, o hìnì kɔl a volion ɲɛ-pɔmbɔ. Kɛ vanalanɔ co o nɔu-vo ndu, yaŋɔɔlen o hendul vana le yoomu nɔmndo ciiyo ni.

²⁷ Vanndo nɔla pá mò vownun yinnden o yifɔ mì volɔɔla ndɔlan la kɛɛ ŋɔ?

²⁸ Vanndo nɔla pá mò kela o dɛngulta biyaalan coo mì bɛngula ndɔlan la kɛɛ ŋɔ?

²⁹ Lende koni i co vɛlɛ a vanapɔnɔ co a lanɔ pilaa-o ni. Vana-vana yɛɛnun pɛ ndu ba, ndu tuisin sangaa coo.

³⁰ Vana pɛɛsa vuiyo le tùú yiaan ma co ndu nɛiyo mò ciimbuu ɲɛ pum le dioo-o le.

³¹ Kɛ taa bii ndu pɛ, o sala ɲɛ pila kon kundalan tan ŋɔmmɛw. O kon, o yɔngu ɲɛm o nɔ o ndu lo cɛinin-ndon kpede.

³² Kɛ vana-vana tɛm pɛ a vanalanɔ co laa ndɔ loo, vana bolle hiŋnanndo vana kon co ni. Kani vana yeema le ndu pila tɛɛmbɔnndo-o tosa lende ni.

³³ Vanapɔnɔ vaa lende, pawve a bɛɛtambɛiyo co le ndu ni, siɛmbulan la cuunin ndu kuee lɔ́ɔ́-lɔ́ɔ̀ le.

³⁴ Kani paŋalaa lueì vanapɔnɔɔ o yolɛi ni. Paale o vanin màá mingio len, ɲíí biinin ndu le.

³⁵ O biinin ɲɛ-ɲɛ le ndu tɛɛlɔnndo le. Hali vana kenin bɛɛ ndu ɲɔɔn taw-taw, o mel sɔɛi ken te.»