Talelan 5 - BII BILA

Mɛɛ vana kpakpala tɔɔndan vanalanɔ co laa nɔm too yɛ

¹ «Po nuu sei! Yaŋ nilan ɲɛkɛndɛi o kɔlkalu nuu. Yaŋnun mà tuei sɔɔn dɛnɛ sinaan nun válán,

² haliko ma bii yiyan taasio kpíŋ, mì cɔcɔn nɔmndon manda sinapɛngoo.

³ Kani sɔɔn fula vanalanɔ tiamaa o sondo-on yeela maa malɛ. Mɛɛ cuɛiyan ma tala yɛ sɔɔn fula ndu o sondo-on co ni.

⁴ Kɛ o mɛɛlulan, sɔɛi ndɔɛi ken lol kélélé maa ɲɛ lolo. I siɛɛmbiaa siembu-siembu maa mɔɛi cɔvii sondola tiɔn.

⁵ O piɔ́mndo nin pelun ndɔn co tolɔɔ lende ni. Ciee-piɔ́m di o co kɔlan tiiyaa ni.

⁶ O nɔ kpeku a nɛi yaa vana o yoomoo nin-ndo le. Nɛila ndɔlan la co laasianndo, ndu pila co ndi bila biyɔɔ le.

⁷ Lelan niaa poaa nia, la yaŋ ya nilan. La mal silala co ya fulaa o sondo lan lɛŋ te.

⁸ Nɔm po nuu sei! Kpakpala vanalanɔ vaa lende, sɔɔnguu o dio cɛi ndɔɔ sondoo le,

⁹ yɔŋii vanaa celen tɛɛmbuu hɔ́ɔ́yɛi nɔmnde, mì vanapɔnɔ kɔlvesɛiyo tɛɛmbuu yoomu nɔmndo,

¹⁰ yɔŋii vanaa celen dɔwnun balo a ɲɛm nɔmndon, mì vanaa n sina le-a pim tɔnɔ fula o sanga nɔmndo nin-ndo,

¹¹ yɔŋii n hun somisomin o mɛɛlula nɔmndan. Nduyɛ kɔɔle nɔmnden a dialun nɔmndon vanin telen kon n'sangaa yɔkɔɔ.

¹² O tosan yɛ pɛ lende, a diminin aa: ‹Ko le yɛɛ nɛ ya kɛɛ yɛ le silaa biyɔɔ? Ko le yɛɛ kpeekpei ya pɛɛsa yɛ kanalan nda va ya-o o kɔl nuu nin?

¹³ Ko yɛɛ vem yɛ ya diom vanaa va ya pɛɛkoo-a kɛɔ biyɔɔ? Ko le yɛɛ ya kɛɛ yɛ vanaa va ya pɛɛkoo-a nilan yaŋɔɔ?

¹⁴ Ndóò lo cobe mì siɛmbulan láà tol-la, mì yáà tambu labɛɛ sɛ́lɔ́ɔ́ o hɔl.›

Vanapɔnɔɔ bɛnda mò kaola lanɔ yil o felengiyɛi nin-ndo

¹⁵ Kol mɛmma co o soon mandaa mamɛn nɔmndo nin-ndan, ma co fulaa o soon kólaa nɔmndo nin-ndan.

¹⁶ Vɛ̀ɛ̀ ma cɛl mì mɛmma nɔmndan ma sɛŋin o bɛ́ɛ̀? Vɛ̀ɛ̀ ma lo tofaa mì peela pɔmbɔla nɔmndan la saŋnun o fal?

¹⁷ Mɛmma man ma bɛnda mì ma va le nɔm pilɛ kpé. A bɛnda ma kol man a vanaa celen latulu le.

¹⁸ Màá soon kólaa nɔmndo sɔla duaa! Dɔwnun ɲaale a laa nɔm n yil o felengiyɛi nin-ndo.

¹⁹ Maa kial laa nɔm co ni, o nɔ dí mò sɔla kaolaa nɔm pɔnɔɔ o ba. Maa púvɛ laa nɔm naŋ hɔlla ni. Dialun ndɔn bɛnda mì n pei nɔm kɔllo a yeemɛi, mì kaola ndɔɔ mingi nɔm yingo-yingo.

²⁰ Po nuu sei! Le yɛɛ nɛ n malnun yɛnin lanɔ pilaa o ba? Le yɛɛ nɛ yeemɛi bii yɛnin nɔm le vanalanɔ co laa nɔm too?

²¹ Siná maa Mɛlɛka co kelala vanacieo cɔu válán, o co dɛnnda ndɔlan kpede cɔu kpendekele.

²² Tɛɛmbuula vana kɔlvesɛiyo biinin la ndu pila maa leyaŋɔɔ. O kayakayannin o yoei haki ndɔɔ nin.

²³ O vunin le tùú o kɛɛ le pɛɛkoo cɛlɔɔ-o. O laasiannin le diɔmii ndɔɛi bɛndu-bɛnduei.»