Talelan 30 - BII BILA

Sɔɔn Akur-on

¹ Sɔɔn bɛndun Akur po Yake-o dimi-on. Sɔɔn langbanɔ kon dimul Itiɛl-lon, Itiɛl nda Ukal.

² «A toɲa, ya hiow va diɔm o vanndacieea tɛɛn, i nɔ sina dɛnɛ sinaa maa vanaciee le.

³ Lepilɛ bɛɛ i pɛɛku dɛnɛ kɔlkalu le, i nɔ sinapɛngu a ɲɛ diandaa o kɔɔ le.

⁴ Nɛ̀ɛ́ hel-lɛ nin o halataala? Nɛ̀ɛ́ cɛn yɛ nin o halataala mó toal? Nɛ̀ɛ́ bii yɛ nin hoeiye o ba ninndo? Nɛ̀ɛ́ vow yɛ nin mɛnndan o volɔɔ ndɔ cuɛinanndo nin? Nɛ̀ɛ́ handu yɛ pɛɛngula lelɛŋndan? Ɔ́ɔ̀ diola ndɔlan? Vɛ̀ɛ̀ po ndɔɔ nɔ yɛ diolan? Taa sinà pɛ, dimul-la!

⁵ Sɔɔn Hala-on kpow n co n'diandaa valan. Ndu co kɔ̀ɔ̀ cɔwvo le vanaa viannun ndu o ba bɛngu-a kpow ni.

⁶ Handu ɲɛ-ɲɛ o sɔɔn ndɔn coo le, yɔŋii o soo nɔm mò ce nɔm vana lacòòvaa.

⁷ Hala nuu, ɲɛlan tan tiɔn kpé ya co nɔm ɲuna ni, tuŋ ya lan te lɔ́ɔ́ pá mì vi.

⁸ Yɔɔ vanafondoyɛi a sɔɔn lacòòvan ya levil. Ke ya bolofaa bɛndu le, siinguu ya vɛlɛ vana bala fondo le. Ke ya mɛɛ o bɛndà le kpekula nilan toosiaa yɛ daama.

⁹ Kani te i hiw pɛ sɔlaa, i kɔɛ le nɔm pɔɛɛnɔnndo, i ɲuna dɔ́ɔ́ aa: ‹Nɛ̀ɛ́ co yɛ Mɛlɛka?› Te i hiw vɛlɛ pɛ vaa bala fondo, mì yɔŋ vuilen, i ke nɔm Hala nuu diola vɔɔnndan.

¹⁰ Cóngù buɛiyo vana ndɔ bɛndoo o hɔl te, yɔŋii o mɛna nɔm ma sanga le tɛɛmbuu nɔmndo.

¹¹ Vanaa pum mɛnaa nda mɛna fuɲaa ndaa ni, à dimi vɛlɛ sɔɔn kɛndɛ a kalaa velu nda-a le.

¹² Vanaa pum a yiyan maa a co a diandaa, nda yɛ a pilun bɛɛ a nɔɔla co nda-o le.

¹³ Vannda pum yongaa pila nda nɔ ni. Tofa tɛɛndanndo nda tofa caanda ni.

¹⁴ Vannda pum ciŋndon nda maa mɔɔn n'cɔw, yaalelan nda maa n'mɔɔ, le vanaa ikɔɔa tiaamoo mà faŋa nda o lɛŋnden coo a le vanaa bala fondoa faŋaa vanndacieea tɛɛn.»

Talela soo a kundalan o kɔɔ lan

¹⁵ Hoondo nɔ cuavaa laandua a ŋiɔn, a co dimio aa: «Yɔngu! Yɔngu!» Ɲɛlan tan yáá la co ni, la pim te lan, la dimi lɔ́ɔ́-lɔ́ɔ̀ le aa: «O va nuaa».

¹⁶ Ciee-piɔ́m, vanalanɔ vilu hɔ́ɔ́ loo, a lɛŋnde vesɛile nɔ mamɛn te len. Ɲɛ hiɔɔlundɔɔ co vɛlɛ: yinnden le dimi lɔ́ɔ́-lɔ́ɔ̀ le aa: «O va nuaa».

¹⁷ Te vanndo mam pɛ fuɲa ndɔ, mò kɛɛ le diom kala ndɔ-o biyɔɔ, basabasakoendea pee pɔmbɔa buuluunin ndu, mì kovɛa cuawva de ndu.

¹⁸ Ɲɛlan la co tan yáá, la ya bumba bila biyɔɔ lan, o hiɔɔlundɔɔ co vɛlɛ, o ya sina loo:

¹⁹ nɛi kovɔ́ɔ̀ kei o coocoo-o, nɛi kɛwvo kei o pow kpovaa coo-o, a nɛi dɛ̀ndɔ̀ɔ́ kei o mɛmma ihɛllan coo-o. O hiɔɔlundɔɔ: kàŋ vanapɔnɔɔ kei le kɔlan o vanalanɔɔ lo-o.

²⁰ Tofa vɔ ɲɛ vanalanɔ suundɛiyo tosa-o: O cii pɛ dio ndɔ kon, o vɔɔsuu sondoo, o dimi aa: «I tosa sɔɛi vɔɔn kɛ́-kɛ̀ le!»

²¹ Dɛnndan tan yáá la co ceendo hɔlla hiŋndo ni, ɲɛlan tan hiɔɔlu la co ndu palaa ni:

²² cɛɔ siŋnɔnndo masaa, vana seemɛiyo pumndo ɲɛdiaa,

²³ vanalanɔ vɔɔndo nɔu sɔlaa. Dɛnɛ hiɔɔlundɔɔ: buɛi laandoo kɛ́ vana ndɔ bɛndoo loo.

²⁴ Ɲa yoomaa pɔmbɔ-pɔmbɔa pum co súúlan tan hiɔɔlu o ceendo coo, kɛ kɔlkaloo pila nda nɔ ni:

²⁵ sisinnda nɔ kpaaya le, kɛ a vɔɔlen nda cuungiaa balo ndaa ni.

²⁶ Damannda nɔ kpaaya le, kɛ mà toosiaa lɔlta ndalan o powta kpovalan tɛɛn coocoo pɔ́.

²⁷ Sóónɔa nɔ masa le, kɛ mà kela a kundalan o polalen ɲɛkɛndɛi.

²⁸ Leenda, vana nɔla mì vana bii nda a ba, kɛ mà kɔ luɛi o cɛi lemasaa nin di.

²⁹ Visia co nda yáá, a caa kɔlan a kɛɛsɔnndo-a. À co bɛɛ a hiɔɔlu:

³⁰ Yàlàá, ndu hiow kpaayaa o visia yondoa tɛɛn kpow, o ɲeenun ɲɛ-ɲɛ loo,

³¹ kongil nɔ nin kpasan-ndo, cuin toovio, a masa co kɔlan vanaa ndɔa cɔwva laci-o.

³² Te seemaa bii nɔm pɛ, mì kuundianndo luɛi nɔm o kɔl, kɛ ma yiyan o kon kɔɔli, mɛɛ bii niko sondo nɔmndo dɛ!

³³ Kani vana lɔɔ pɛ nɔnɔɔ, o cal o kendu sikpa. Vana kundu pɛ milinndo, koovan ma fula. Vana kundu pɛ kɔltuwvo, sɛɛngianndo cɛn.