Talelan 3 - BII BILA

Tiindanndo kɛsio o Hala nin

¹ «Po nuu sei! Pɔɛɛnun pɛɛkula nilan te, mandan tɔŋnda nilan nɔm o kɔl,

² kani lan la cɔɔlunin palɛi nɔmnde bɛndi ni, lan la cɔɔlunin vɔsila nɔmndan a kɔlɲulu nɔmndo ni.

³ Sakpoyɛi a toɲaa bɛnda mì la fáŋàn o kela nɔmndo nin te, yiinun ndan o labolo, sɛva lan o pɛngɛi kɔl nɔmndo coo.

⁴ O kon, Hala a vanndacieea canin nɔm ɲia, ma sɔla diola kɛndɛlan.

⁵ Sɔɔnun Mɛlɛka o ba a kɔl nɔmndo kpow, tííndàn dɛnɛ sinaa nɔmndo le.

⁶ Kindin le hɛnan Mɛlɛka-o sinaa o dɛnnda n co tosaa lan kpede nin, ndu siɛɛnduunin nɛila nɔmndan ni.

⁷ Nɔm pila cánnùn vana kɔlkalu le, kɛ nɔ siòòŋii Mɛlɛka-e mà kpakpala dɛnɛ vɔɔndo.

⁸ Kon vanin kɛndia le dialun nɔmndon ni, pɛngio le paala nɔmndan.

⁹ Biilu Mɛlɛka a ɲɛm nɔmndon, mà yɔngu ndu ɲɛm tasen n co sɔlaa o vali nɔmndo nin-ndon.

¹⁰ O kon, kondala nɔmndan la vanin lapiaalan cá-cá, mɔima sɛnɛiyan ma vanin taw o fɛngɛla nɔmndan nin.

¹¹ Po nuu sei! Ca sila Mɛlɛka-o ɲɛ fondoo le, nɔ nɛyɔnndo a kanalan ndɔɔ le.

¹² Kani sɔɛi Mɛlɛka soaa vana o kaola-o ni le ndu silaa, mɛɛ fuɲaa soaa hɔ́ɔ́ ndɔɔ nuaa le ndu silaa yɛ.

Kɔlkaloo, dɛnɛ kɛndɔɔ o co ni

¹³ Dɛnɛ kɛndɔɔ co le vana saalun kɔlkaloo-o, le vana sɔla dɛnɛ sinaa-o.

¹⁴ Kani tɔnɔ kɔlkaloo lueilul vana-o hiow naŋɔɔ a tɔnɔ volion lueilul vana-o, kɔmnde ndɔlen le hiow tɔnɔɔ a sianion.

¹⁵ Kɔlkaloo hiow va o sɔvɛ a powta báà kàlàlan. Ɲɛ-ɲɛ vana yeema siiman tɔnɔɔ a kɔlkaloo le.

¹⁶ Yoomu vilɛiyo co kɔlkaloo o ba kɛndɔɔ nin, bolofaa a biiloo co ndu o ba mɛllo nin.

¹⁷ Nɛila kɛndɛlan nɛila ndɔlan la co ni, pemama ndɔan ma yɔngu vana kɔlɲuloo.

¹⁸ Yɔm yɔngu cindaa-o kɔlkaloo co le vanaa holnun ndu-a ni, vanaa bii ndu kpíŋ-nda co o dɛnɛ kɛndɔɔ nin.

¹⁹ A kɔlkaloo Mɛlɛka kila lɛŋnden ni, mó simi halataalaa yili a dɛnɛ sinaa.

²⁰ A dɛnɛ sinaa ndɔɔ mɛnndan o soonndan nin lɛŋ ma hel o lɛŋnden coo ni, mí yumbuyumboo va mɔ́mndo cucɔɔ.

Mɛlɛka kanda vana kɔlkaloo ni

²¹ Po nuu sei! Manda kɔlkaloo a dɛnɛ sinaa, fáŋà hɔlla lecoo mì la kɔɛ nɔm levil te.

²² Lan la malanin nɔm ni ma vili ceen sɔvɛɔ a ceen yeelɛiyo.

²³ O kon, a kɔanin o nɛi nɔmndo coo a kɔlɲuloo, ɲɛ-ɲɛ a keinin koondan ma del te.

²⁴ Hini bɛɛ icɔl, siòòŋii biinin nɔm te. A hini dɔ́ɔ́ pɛ, a hiownun o lɔan cundun.

²⁵ A buulannin le dɛnɛ isiòòn voolu vana-o le, a buulannin le vanaa kɔlvesɛiya del vana coo-a le,

²⁶ Kani Mɛlɛka mandanin nɔm o kɔlkɛsiaa nin, o faaŋiaanin yaŋɔɔlan nɔm o pelon bɛngu.

Le caanda kaolaa a le nda malaa

²⁷ Taa nɔ pɛ seo, kɛ́ɛ̀ le vana co o bahavɛiyo nin-ndo kɛndɛi tosallo le.

²⁸ Taa nɔ pɛ ɲɔɔ o ba o foofo, dímùl vanndo aa ‹Kɔ siɔdii a muungu nanu i ke nɔm ɲɛ vaa nuaa› le.

²⁹ Te vanndo vannun pɛ icali nɔm ikɛi nila ɲulu, túù le ndu dɛnɛ vɔɔndo tosallo le.

³⁰ Te vanndo tosal nɔm dɛnɛ vɔɔn te, núwviàà sɔngɔɔ ndu o n'dial fondo fúú le.

³¹ Paŋala bíì nɔm le vana kɔlvesɛiyo le, del kelala ndɔlan o pilɛ bɛɛ kɔɔli le.

³² Kani vana kɔlvesɛiyo nɛinun bɔɔ Mɛlɛka, kɛ ò cɔ̀m vanaa sandaa kɔl ndɔɔ.

³³ Danga fula Mɛlɛka o ba-o co o vana kɔlvesɛiyo lo cɛinin, kɛ ò dɔàw calta vanaa sandaa duaa.

³⁴ Mamɔɔ Mɛlɛka mam vanaa mam ndu mamɔɔ tɛɛndanndo-a ni, mò tosal vanaa tuisin nda pila tootoo-a kɛndɛi.

³⁵ Vanaa kɔlkalua sɔlanin biiloo maa kɛ́, kɛ diɔmnda nda sɔlanin pɛɛsa hiow pɛɛsalan kpede-o.»