Talelan 27 - BII BILA

¹ Sangalan le ɲɛ n tosanin siɔdii-o le, kani a sinà bɛɛ ɲɛ yɔŋnunnin hau-vo le.

² Vanaa celen naŋ mà sangala nɔm ni, kɛ o va nɔm pila le, o co fisa mì vana celen lisa nɔm.

³ Pow bɛndoo lusul, sióónndon bɛɛ n lusul, kɛ kɔltambɛiyo diɔm sondo vesɛiyo hiow ɲɛm mun kpede lusullo.

⁴ Kɔltuwvo vɔw taw, yolɛi bɛɛ maa mɛmma hunaa i co ni. Kɛ nɛ̀ɛ́ nɔlà ba paŋalaa simullo?

⁵ Vanndo tɔɔmbuu ndɔɔ cɔmndo vakpa co fisa a vaa canyɛi viannanndo a ndu.

⁶ Sɔvun caan nɔm cɔ̀m nɔm-ndon cɔm canyɛi ndɔɛi ni. Kɛ le vana huiyo fúú yaamɔɔ kɔɔmian vana ni.

⁷ Vana co o pumaa-o, hali va malɛɔ nɛwvo o nɛ̀w ndu a labɛngu ni. Kɛ vana yiaan ma co nɛiyo-o ndu, ɲɔɔ lol bɛɛ, yeelaa o yeela ndu o sondo ni.

⁸ Maa yow co kelanndo vɛɛnnde ndɔlen levil-lo vana kɔɛ kaunalen lɛŋnde ndɔlen levil-lo co ni.

⁹ Cuɛima cun kɛndɛan a lasikɔlɔɔ nɛŋi vana kɔllo, kɛ mamɔɔla icanyalan la co fisa a lasikɔlɔ báà kala bɛndoo.

¹⁰ Mal caan nɔm te, mal vɛlɛ caaŋoo fuɲa nɔm te. Kɔa o bɛ nɔm ndo, te kon te o pɔmbɔ nɔm ndo paale dɛnɔɔ co nɔm pala len te, kani vana niaa cɛɛlian caltan-ndo co fisa a bɛ nɔm, te kon te a pɔmbɔ nɔm co levil-lo.

¹¹ Po nuu sei! Kela kela kɔlkaloo ma nɛŋi ya kɔl. O kon, i tiwnin ba mì mulul vanaa co ya diomnda vɔɔnndan keo-va.

¹² Vana taasio ce pɛ dɛnɛ palaa hunɔɔ, o vennun. Kɛ vanaa bii dɛnɛ bila le-a nda kɔnndan tuŋ, sanga fula pɛ o tol nda coo.

¹³ Te vanndo komal nɔm pɛ mò lɔɔnun ibuŋ le vana n sina loo kueo yɔngoo, bii volɔɔ ndɔ cuɛinanndo ndu o ba o landei nin. O lɔɔnun pɛ ibuŋ mò dimul nɔm le miallo kueo keo, bii ndu landei o ba.

¹⁴ Idii púŋ-púŋ, vanndo pena pɛ vana nda cal nɛɛ pilɛ-o yilɔɔ coocoo kpélén, maa yei yilɔɔ vaa lende co ni.

¹⁵ Vanalanɔ lasɔngɔɔ co ko maa kookole mɛnndan ma cuu fulaa nin o paale piɔɔlen te len.

¹⁶ Vana-vana dimi pɛ le káà kon ndu solio o ba, mɛɛ vana kon ndu yeema le hoeiye simio, te kon te le cuɛiyan biyɔɔ a ba nin-ndo.

¹⁷ Maa mɛɛ cilinnde cɛɛŋa cilinnde yɛ, lende vanndacieea siinguu vanacieo o sɔvɛ ni.

¹⁸ Vana caa pɛ tɔlɔɔ biyɔɔ, a de kɔmnde ndɔlen. Vana baalaa diikun pɛ vana ndɔ bɛndoo o sɔla bɛɛlen.

¹⁹ Maa mɛɛ vana ca vundule vana pila len le holnan o mɛnndan coo yɛ, lende koni vana ca yiyannda vanacieo ndu o hɔl ni.

²⁰ Ciee-piɔ́m a soon bɛndoo pe a vanndacieea le, lende koni, hɔltan la sanga a cɔu le.

²¹ Yinnden le cɔm súú volin humbon a sianion co-o ni. Vanacieo ndu, ɲɛ vannda dimi a ndu-o cɔm vana súú o co-o ni.

²² Vana cu bɛɛ diɔm sondo vesɛiyo o ciei nin mɛɛ vana cu kullon a sunndo yɛ, diɔmii ndɔɛi mel ndu le.

²³ Kindin ma sina saa nɔmnda a pilɛn-pilɛnnda, ma nɔ hɔlten cɔlua nɔmaa kundaa coo,

²⁴ kani bolofaa co ɲɛ lɔ́ɔ́-lɔ́ɔ̀ le, pondale lemasalen bɛɛ le co ɲɛ fɛɛn-fɛɛn te.

²⁵ Kiolu billo yondoo nin, telen o sɛnɛiyo co va puiyo-o a cɔwviaa bil vesɛiyo o pembon coo.

²⁶ Manda saa ma hun sɔla kolalan a yiiŋii ndɛi. Manda cuinnda mà hun pisi nda le lɛŋnden piondɔɔ.

²⁷ Nɔnɔ bɛndu cuinaa nɔmnda vanin solio-o, la dɔwnun balo a ndu niaa yungu nɔmndo a buɛyaa nɔmaa laandua.